ਚੀਨ ਵਿੱਚ ਇੱਕੋ ਪਰਿਵਾਰ ਦੇ 11 ਜੀਆਂ ਨੂੰ ਮੌਤ ਦੀ ਸਜ਼ਾ ਕਿਉਂ ਸੁਣਾਈ ਗਈ, ਪੂਰਾ ਮਾਮਲਾ ਜਾਣੋ
ਤਸਵੀਰ ਸਰੋਤ, CCTV
- ਲੇਖਕ, ਜੋਨਾਥਨ ਹੈੱਡ
- ਰੋਲ, ਦੱਖਣ-ਪੂਰਬੀ ਏਸ਼ੀਆ ਪੱਤਰਕਾਰ
- ਲੇਖਕ, ਟੇਸਾ ਵੋਂਗ
- ਰੋਲ, ਏਸ਼ੀਆ ਡਿਜੀਟਲ ਰਿਪੋਰਟਰ
ਚੀਨੀ ਸਰਕਾਰੀ ਪ੍ਰਸਾਰਕ ਸੀਸੀਟੀਵੀ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਸੋਮਵਾਰ ਨੂੰ ਪੂਰਬੀ ਸ਼ਹਿਰ ਵੈਂਝੂ ਵਿੱਚ ਮਿੰਗ ਪਰਿਵਾਰ ਦੇ ਕੁੱਲ 11 ਮੈਂਬਰਾਂ ਨੂੰ ਮੌਤ ਦੀ ਸਜ਼ਾ ਸੁਣਾਈ ਗਈ।
ਚੀਨੀ ਅਦਾਲਤ ਨੇ ਮਿਆਂਮਾਰ ਵਿੱਚ ਮਾੜੀ ਸਾਖ਼ ਰੱਖਣ ਵਾਲੇ ਇੱਕ ਪਰਿਵਾਰ ਦੇ ਮੈਂਬਰਾਂ ਵਿੱਚੋਂ 11 ਜੀਆਂ ਨੂੰ ਮੌਤ ਦੀ ਸਜ਼ਾ ਸੁਣਾਈ ਹੈ। ਇਸ ਪਰਿਵਾਰ ’ਤੇ ਇਲਜ਼ਾਮ ਸਨ ਕਿ ਉਹ ਧੋਖਾਧੜੀ ਦਾ ਗੈਂਗ ਚਲਾਉਂਦਾ ਸੀ।
ਮਿੰਗ ਪਰਿਵਾਰ ਦੇ ਦਰਜਨਾਂ ਮੈਂਬਰਾਂ ਨੂੰ ਅਪਰਾਧਿਕ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਦਾ ਦੋਸ਼ੀ ਪਾਇਆ ਗਿਆ, ਜਿਨ੍ਹਾਂ ਵਿੱਚੋਂ ਕਈਆਂ ਨੂੰ ਲੰਬੀਆਂ ਜੇਲ੍ਹਾਂ ਦੀਆਂ ਸਜ਼ਾਵਾਂ ਮਿਲੀਆਂ।
ਮਿੰਗ ਪਰਿਵਾਰ ਚਾਰ ਕਬੀਲਿਆਂ ਵਿੱਚੋਂ ਇੱਕ ਲਈ ਕੰਮ ਕਰਦਾ ਸੀ ਜੋ ਚੀਨ ਨਾਲ ਲੱਗਦੀ ਮਿਆਂਮਾਰ ਦੀ ਸਰਹੱਦ ਦੇ ਨੇੜੇ ਸਥਿਤ ਲੌਕਾਇੰਗ ਝੁੱਗੀ-ਝੌਂਪੜੀ ਵਰਗੇ ਕਸਬੇ ਨੂੰ ਚਲਾਉਂਦੇ ਸਨ ਅਤੇ ਇਸ ਨੂੰ ਜੂਏ, ਡਰੱਗ ਅਤੇ ਧੋਖਾਧੜੀ ਦੇ ਕੇਂਦਰ ਬਣਾ ਦਿੱਤਾ ਸੀ।
ਮਿਆਂਮਾਰ ਨੇ ਆਖ਼ਰਕਾਰ ਸਖ਼ਤੀ ਕੀਤੀ, 2023 ਵਿੱਚ ਇਨ੍ਹਾਂ ਪਰਿਵਾਰਾਂ ਦੇ ਕਈ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਅਤੇ ਉਨ੍ਹਾਂ ਨੂੰ ਚੀਨੀ ਅਧਿਕਾਰੀਆਂ ਦੇ ਹਵਾਲੇ ਕਰ ਦਿੱਤਾ।
ਤਸਵੀਰ ਸਰੋਤ, Getty Images
ਕੀ-ਕੀ ਸਜ਼ਾ ਸੁਣਾਈ ਗਈ
ਚੀਨ ਦੇ ਸਰਕਾਰੀ ਪ੍ਰਸਾਰਕ ਸੀਸੀਟੀਵੀ ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਸੋਮਵਾਰ ਨੂੰ ਪੂਰਬੀ ਸ਼ਹਿਰ ਵੈਂਝੂ ਵਿੱਚ ਮਿੰਗ ਪਰਿਵਾਰ ਦੇ ਕੁੱਲ 39 ਮੈਂਬਰਾਂ ਨੂੰ ਸਜ਼ਾ ਸੁਣਾਈ ਗਈ।
ਮੌਤ ਦੀ ਸਜ਼ਾ ਵਾਲੇ 11 ਮੈਂਬਰਾਂ ਤੋਂ ਇਲਾਵਾ, ਪੰਜ ਹੋਰਾਂ ਨੂੰ ਦੋ ਸਾਲ ਦੀ ਮੁਅੱਤਲੀ ਦੇ ਨਾਲ ਮੌਤ ਦੀ ਸਜ਼ਾ ਮਿਲੀ ਹੈ, 11 ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ ਅਤੇ ਬਾਕੀਆਂ ਨੂੰ ਪੰਜ ਤੋਂ 24 ਸਾਲ ਤੱਕ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ।
ਅਦਾਲਤ ਨੇ ਪਾਇਆ ਕਿ 2015 ਤੋਂ, ਮਿੰਗ ਪਰਿਵਾਰ ਅਤੇ ਹੋਰ ਅਪਰਾਧਿਕ ਸਮੂਹ ਧੋਖਾਧੜੀ, ਗ਼ੈਰ-ਕਾਨੂੰਨੀ ਕੈਸੀਨੋ, ਡਰੱਗ ਦੀ ਤਸਕਰੀ ਅਤੇ ਵੇਸਵਾਗਮਨੀ ਸਮੇਤ ਅਪਰਾਧਿਕ ਗਤੀਵਿਧੀਆਂ ਵਿੱਚ ਸ਼ਾਮਲ ਸਨ।
ਅਦਾਲਤ ਦੇ ਅਨੁਸਾਰ, ਉਨ੍ਹਾਂ ਦੀਆਂ ਜੂਆ ਅਤੇ ਘੁਟਾਲੇ ਦੀਆਂ ਗਤੀਵਿਧੀਆਂ ਨੇ 10 ਬਿਲੀਅਨ ਯੂਆਨ (1.4 ਬਿਲੀਅਨ ਡਾਲਰ) ਤੋਂ ਵੱਧ ਕਮਾਈ ਕੀਤੀ ਹੈ।
ਹੋਰਾਂ ਨੇ ਪਹਿਲਾਂ ਅੰਦਾਜ਼ਾ ਲਗਾਇਆ ਸੀ ਕਿ ਚਾਰ ਪਰਿਵਾਰਾਂ ਦੇ ਕੈਸੀਨੋ ਸਾਲਾਨਾ ਕਈ ਅਰਬ ਡਾਲਰ ਦਾ ਮਾਲੀਆ ਪੈਦਾ ਕਰ ਰਹੇ ਸਨ।
ਅਦਾਲਤ ਨੇ ਇਹ ਵੀ ਪਾਇਆ ਕਿ ਮਿੰਗ ਪਰਿਵਾਰ ਅਤੇ ਹੋਰ ਅਪਰਾਧਿਕ ਸਮੂਹ, ਕਈ ਘੁਟਾਲਿਆਂ ਦੇ ਚੱਲ ਰਹੇ ਕੇਂਦਰ ਦੇ ਕਰਮਚਾਰੀਆਂ ਦੀਆਂ ਮੌਤਾਂ ਲਈ ਜ਼ਿੰਮੇਵਾਰ ਸਨ, ਜਿਸ ਵਿੱਚ ਇੱਕ ਘਟਨਾ ਵੀ ਸ਼ਾਮਲ ਹੈ ਜਿਸ ਵਿੱਚ ਕਰਮਚਾਰੀਆਂ ਨੂੰ ਚੀਨ ਵਾਪਸ ਜਾਣ ਤੋਂ ਰੋਕਣ ਲਈ ਗੋਲੀ ਮਾਰਨਾ ਵੀ ਸ਼ਾਮਲ ਹੈ।
ਸ਼ੁਰੂ ਵਿੱਚ ਚੀਨ ਅਤੇ ਕਈ ਹੋਰ ਗੁਆਂਢੀ ਦੇਸ਼ਾਂ ਵਿੱਚ ਗ਼ੈਰ-ਕਾਨੂੰਨੀ ਜੂਏ ਦੀ ਚੀਨੀ ਮੰਗ ਦਾ ਫਾਇਦਾ ਚੁੱਕਣ ਲਈ ਵਿਕਸਤ ਕੀਤੇ ਗਏ, ਲੌਕਾਇੰਗ ਦੇ ਕੈਸੀਨੋ ਮਨੀ ਲਾਂਡਰਿੰਗ, ਤਸਕਰੀ ਅਤੇ ਦਰਜਨਾਂ ਘੁਟਾਲੇ ਕੇਂਦਰਾਂ ਲਈ ਇੱਕ ਲਾਭਦਾਇਕ ਪਲੇਟਫਾਰਮ ਬਣ ਗਏ।
ਇਸ ਨੂੰ ਸੰਯੁਕਤ ਰਾਸ਼ਟਰ ਦੁਆਰਾ "ਘੁਟਾਲੇ ਦੀ ਮਹਾਂਮਾਰੀ" ਐਲਾਨੇ ਗਏ ਮੁਹਿੰਮ ਦਾ ਇੰਜਨ-ਰੂਮ ਮੰਨਿਆ ਜਾਂਦਾ ਸੀ। ਇਸ ਵਿੱਚ 1,00,000 ਤੋਂ ਵੱਧ ਵਿਦੇਸ਼ੀ ਨਾਗਰਿਕਾਂ, ਜਿਨ੍ਹਾਂ ਵਿੱਚੋਂ ਕਈ ਚੀਨੀ ਸਨ, ਨੂੰ ਧੋਖਾਧੜੀ ਕੇਂਦਰਾਂ ਵਿੱਚ ਫਸਾਇਆ ਗਿਆ ਸੀ, ਜਿੱਥੇ ਉਨ੍ਹਾਂ ਨੂੰ ਕੈਦ ਕਰਕੇ ਕਈ ਘੰਟਿਆਂ ਤੱਕ ਕੰਮ ਕਰਵਾਇਆ ਗਿਆ।
ਉਨ੍ਹਾਂ ਵੱਲੋਂ ਬੜੇ ਹੀ ਬਾਰੀਕੀ ਨਾਲ ਧੋਖਾਧੜੀ ਆਪ੍ਰੇਸ਼ਨ ਚਲਾਏ ਗਏ ਤੇ ਪੂਰੀ ਦੁਨੀਆਂ ਤੋਂ ਲੋਕਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ।
ਤਸਵੀਰ ਸਰੋਤ, Getty Images
ਮਿੰਗ ਪਰਿਵਾਰ ਕਦੇ ਮਿਆਂਮਾਰ ਦੇ ਸ਼ੈਨ ਰਾਜ ਵਿੱਚ ਸਭ ਤੋਂ ਸ਼ਕਤੀਸ਼ਾਲੀ ਸੀ ਅਤੇ ਲੌਕਾਇੰਗ ਵਿੱਚ ਧੋਖਾਧੜੀ ਕੇਂਦਰ ਚਲਾਉਂਦਾ ਸੀ, ਤੇ ਉਸ ਵਿੱਚ ਘੱਟੋ-ਘੱਟ 10,000 ਕਰਮਚਾਰੀ ਸਨ। ਸਭ ਤੋਂ ਘਾਤਕ ਕਰਾਊਚਿੰਗ ਟਾਈਗਰ ਵਿਲਾ ਨਾਮਕ ਇੱਕ ਕੰਪਲੈਕਸ ਸੀ, ਜਿੱਥੇ ਕਰਮਚਾਰੀਆਂ ਨੂੰ ਨਿਯਮਿਤ ਤੌਰ 'ਤੇ ਕੁੱਟਿਆ ਅਤੇ ਤਸੀਹੇ ਦਿੱਤੇ ਜਾਂਦੇ ਸਨ।
ਫਿਰ, ਦੋ ਸਾਲ ਪਹਿਲਾਂ, ਵਿਦਰੋਹੀ ਸਮੂਹਾਂ ਦੇ ਇੱਕ ਗਠਜੋੜ ਨੇ ਇੱਕ ਹਮਲਾ ਸ਼ੁਰੂ ਕੀਤਾ ਜਿਸਨੇ ਮਿਆਂਮਾਰ ਦੀ ਫੌਜ ਨੂੰ ਸ਼ੈਨ ਰਾਜ ਦੇ ਵੱਡੇ ਖੇਤਰਾਂ ਤੋਂ ਭਜਾ ਦਿੱਤਾ ਅਤੇ ਲੌਕਾਇੰਗ ਦਾ ਕੰਟ੍ਰੋਲ ਆਪਣੇ ਕਬਜ਼ੇ ਵਿੱਚ ਲੈ ਲਿਆ। ਮੰਨਿਆ ਜਾਂਦਾ ਹੈ ਕਿ ਚੀਨ, ਜਿਸ ਦਾ ਇਨ੍ਹਾਂ ਸਮੂਹਾਂ 'ਤੇ ਮਹੱਤਵਪੂਰਨ ਪ੍ਰਭਾਵ ਹੈ, ਨੇ ਇਸ ਹਮਲੇ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ।
ਪਰਿਵਾਰ ਦੇ ਮੁਖੀ, ਮਿੰਗ ਜ਼ੁਏਚਾਂਗ ਨੇ ਕਥਿਤ ਤੌਰ 'ਤੇ ਖੁਦਕੁਸ਼ੀ ਕਰ ਲਈ ਸੀ। ਪਰਿਵਾਰ ਦੇ ਹੋਰ ਮੈਂਬਰਾਂ ਨੂੰ ਚੀਨੀ ਅਧਿਕਾਰੀਆਂ ਦੇ ਹਵਾਲੇ ਕਰ ਦਿੱਤਾ ਗਿਆ ਸੀ। ਕੁਝ ਨੇ ਪਛਤਾਵੇ ਨਾਲ ਇਕਬਾਲ ਕੀਤਾ ਹੈ।
ਇਨ੍ਹਾਂ ਘੁਟਾਲਾ ਕੇਂਦਰਾਂ 'ਤੇ ਕੰਮ ਕਰਨ ਵਾਲੇ ਹਜ਼ਾਰਾਂ ਲੋਕਾਂ ਨੂੰ ਚੀਨੀ ਪੁਲਿਸ ਦੇ ਹਵਾਲੇ ਵੀ ਕਰ ਦਿੱਤਾ ਗਿਆ ਹੈ।
ਇਨ੍ਹਾਂ ਸਜ਼ਾਵਾਂ ਨਾਲ, ਚੀਨ ਆਪਣੀਆਂ ਸਰਹੱਦਾਂ 'ਤੇ ਚੱਲ ਰਹੇ ਘੁਟਾਲੇ ਦੇ ਕਾਰੋਬਾਰ 'ਤੇ ਕਾਰਵਾਈ ਕਰਨ ਦੇ ਆਪਣੇ ਦ੍ਰਿੜ ਇਰਾਦੇ ਦਾ ਸੰਕੇਤ ਦੇ ਰਿਹਾ ਹੈ। ਬੀਜਿੰਗ ਦੇ ਦਬਾਅ ਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਥਾਈਲੈਂਡ ਨੂੰ ਮਿਆਂਮਾਰ ਸਰਹੱਦ ਦੇ ਨਾਲ ਘੁਟਾਲਾ ਕੇਂਦਰਾਂ 'ਤੇ ਕਾਰਵਾਈ ਕਰਨ ਲਈ ਵੀ ਪ੍ਰੇਰਿਤ ਕੀਤਾ।
ਇਸ ਦੇ ਬਾਵਜੂਦ, ਕਾਰੋਬਾਰ ਨੇ ਆਪਣੇ ਆਪ ਨੂੰ ਢਾਲਿਆ ਹੈ ਅਤੇ ਹੁਣ ਕੰਬੋਡੀਆ ਵਿੱਚ ਵੱਡੇ ਪੱਧਰ 'ਤੇ ਕੰਮ ਕਰਦਾ ਹੈ, ਹਾਲਾਂਕਿ ਇਹ ਮਿਆਂਮਾਰ ਵਿੱਚ ਪ੍ਰਚਲਿਤ ਹੈ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
