ਬੀਬੀਸੀ ਪੰਜਾਬੀ 'ਤੇ ਉਹ ਖ਼ਬਰਾਂ ਜੋ ਸ਼ਾਇਦ ਤੁਸੀਂ ਮਿਸ ਕਰ ਗਏ
ਤਸਵੀਰ ਸਰੋਤ, Getty Images
ਪਿਆਰੇ ਪਾਠਕੋ, ਇਸ ਹਫ਼ਤੇ ਪੰਜਾਬ ਤੇ ਦੁਨੀਆਂ ਵਿੱਚ ਕਈ ਗਤੀਵਿਧੀਆਂ ਹੋਈਆਂ ਹਨ ਜੋ ਅਸੀਂ ਤੁਹਾਡੇ ਤੱਕ ਪਹੁੰਚਾਈਆਂ ਹਨ ਪਰ ਜੇ ਤੁਸੀਂ ਕੋਈ ਕਹਾਣੀ ਮਿਸ ਕੀਤੀ ਹੈ ਤਾਂ ਤੁਸੀਂ ਇੱਥੇ ਪੜ੍ਹ ਸਕਦੇ ਹੋ।
ਅਸੀਂ ਇਸ ਹਫ਼ਤੇ ਦੀਆਂ ਪੰਜ ਅਹਿਮ ਕਹਾਣੀਆਂ ਤੁਹਾਡੇ ਲਈ ਇੱਕੋ ਥਾਂ 'ਤੇ ਲੈ ਕੇ ਆਏ ਹਾਂ। ਤੁਸੀਂ ਹੇਠਾਂ ਦਿੱਤੇ ਲਿੰਕ 'ਤੇ ਕਲਿੱਕ ਕਰ ਕੇ ਇਹ ਕਹਾਣੀਆਂ ਪੜ੍ਹ ਸਕਦੇ ਹੋ।
ਤੁਹਾਨੂੰ ਪਤਾ ਹੈ ਕਿ ਬੀਬੀਸੀ ਪੰਜਾਬੀ ਤੁਹਾਡੇ ਲਈ ਹਰ ਤਰ੍ਹਾਂ ਦੀਆਂ ਖ਼ਬਰਾਂ ਇੱਕ ਵੱਖਰੇ ਅੰਦਾਜ਼ ਵਿੱਚ ਲੈ ਕੇ ਆਉਂਦਾ ਹੈ।
ਇਸ ਹਫ਼ਤੇ ਪੰਜਾਬ ਵਿੱਛ ਰਾਹੁਲ ਗਾਂਧੀ ਦੀ ਭਾਰਤ ਜੋੜੋ ਯਾਤਰਾ ਅਤੇ ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਜੈਸਿੰਡਾ ਦਾ ਅਸਤੀਫਾ ਚਰਚਾ ਵਿੱਚ ਰਿਹਾ
ਨਿਊਜ਼ੀਲੈਂਡ : 42 ਸਾਲ ਦੀ ਉਮਰ ਵਿਚ ਪ੍ਰਧਾਨ ਮੰਤਰੀ ਦਾ ਅਹੁਦਾ ਆਪੇ ਛੱਡਣ ਵਾਲੀ ਜੈਸਿੰਡਾ ਬਾਰੇ ਖ਼ਾਸ ਗੱਲਾਂ
ਤਸਵੀਰ ਸਰੋਤ, Getty Images
ਹੁਕਮਰਾਨ ਵਜੋਂ ਸਿੱਕਾ ਮਨਵਾਉਣ ਵਾਲੀ ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਰਨ ਨੇ ਇਹ ਕਹਿੰਦਿਆਂ ਕਿ ਹੁਣ ਉਨ੍ਹਾਂ ਵਿੱਚ ਦੇਸ਼ ਦੇ ਪ੍ਰਧਾਨ ਮੰਤਰੀ ਵਜੋਂ ਸੇਵਾਵਾਂ ਨਿਭਾਉਣ ਦੀ ਪ੍ਰੇਰਣਾ ਤੇ ਹਿੰਮਤ ਨਹੀਂ ਰਹੀ, ਅਗਲੇ ਹਫ਼ਤੇ ਅਸਤੀਫ਼ਾ ਦੇਣ ਦਾ ਐਲਾਣ ਕੀਤਾ ਹੈ।
ਅਕਤੂਬਰ 2017 ਵਿੱਚ ਉਨ੍ਹਾਂ ਦੁਨੀਆਂ ਦੀ ਸਭ ਤੋਂ ਛੋਟੀ ਉਮਰ ਦੀ ਔਰਤ ਪ੍ਰਧਾਨ ਮੰਤਰੀ ਵਜੋਂ ਹਲਫ਼ ਲਿਆ ਸੀ।
ਉਸ ਸਮੇਂ ਉਹ ਮਹਿਜ਼ 37 ਸਾਲਾਂ ਦੇ ਸਨ ਤੇ ਨਿਊਜ਼ੀਲੈਂਡ ਦੇ ਲੋਕਾਂ ਨੇ ਦਿਲ ਖ਼ੋਲ੍ਹ ਉਨ੍ਹਾਂ ਨੂੰ ਸਵੀਕਾਰਿਆ ਤੇ ਸਰਾਹਿਆ।
ਪਰ ਜਦ ਕੋਵਿਡ ਮਹਾਂਮਾਰੀ ਆਈ ਤਾਂ ਉਨ੍ਹਾਂ ਵਲੋਂ ਗਏ ਸਖ਼ਤ ਫ਼ੈਸਲਿਆਂ ਤੇ ਪਾਬੰਦੀਆਂ ਨੇ ਲੋਕਾਂ ਦੇ ਦਿਲਾਂ ਵਿੱਚ ਉਨ੍ਹਾਂ ਦੀ ਜਗ੍ਹਾ ਕੁਝ ਘਟਾਈ।
ਪੂਰੀ ਖ਼ਬਰ ਪੜ੍ਹਨ ਲਈ ਇੱਥੇ ਕਲਿੱਕ ਕਰੋ
ਮਿਸ ਯੂਨੀਵਰਸ : ਇੱਕ ਸਵਾਲ ਜਿਸ ਦੇ ਜਵਾਬ ਨੇ ਕੀਤਾ ਜਿੱਤ ਹਾਰ ਦਾ ਫ਼ੈਸਲਾ
ਤਸਵੀਰ ਸਰੋਤ, Getty Images
ਅਮਰੀਕਾ ਦੀ ਆਰਬੋਨੀ ਗੈਬਰੀਅਲ ਨੇ ਇਸ ਸਾਲ ਮਿਸ ਯੂਨੀਵਰਸ ਦਾ ਖਿਤਾਬ ਜਿੱਤਿਆ ਹੈ।
ਗੈਬਰੀਅਲ ਨੇ ਆਖਰੀ ਰਾਉਂਡ ਵਿੱਚ ਵੈਨੇਜ਼ੁਏਲਾ ਅਤੇ ਡੋਮਿਨਿਕਨ ਰੀਪਬਲਿਕ ਦੀਆਂ ਪ੍ਰਤੀਯੋਗੀਆਂ ਨੂੰ ਹਰਾ ਕੇ ਇਹ ਤਾਜ ਆਪਣੇ ਨਾਮ ਕੀਤਾ ਹੈ।
ਇਹ 71ਵਾਂ ਮਿਸ ਯੂਨੀਵਰਸ ਮੁਕਾਬਲਾ ਸੀ ਜੋ ਸ਼ਨੀਵਾਰ ਨੂੰ ਅਮਰੀਕਾ ਦੇ ਲੁਈਸਿਆਨਾ ਵਿੱਚ ਨਿਊ ਓਰਲੀਨਜ਼ ਸ਼ਹਿਰ ’ਚ ਰੱਖਿਆ ਗਿਆ ਸੀ।
ਇਸ ਮੁਕਾਬਲੇ ਵਿੱਚ ਲਗਭਗ 90 ਉਮੀਦਵਾਰਾਂ ਨੇ ਭਾਗ ਲਿਆ ਸੀ। ਇਹਨਾਂ ਨੂੰ ਇੰਟਰਵਿਊ ਅਤੇ ਕਈ ਹੋਰ ਸ਼੍ਰੇਣੀਆਂ ਦੀ ਪ੍ਰਕਿਰਿਆ ਤੋਂ ਬਾਅਦ ਚੁਣਿਆ ਗਿਆ ਸੀ।
ਪਰ ਇਨ੍ਹਾਂ ਵਿੱਚੋਂ ਸਿਰਫ਼ ਤਿੰਨ ਕੁੜੀਆਂ ਹੀ ਅੰਤ ਤੱਕ ਪਹੁੰਚ ਸਕੀਆਂ ਸਨ।
ਇਨ੍ਹਾਂ 'ਚ ਅਮਰੀਕਾ ਤੋਂ ਇਲਾਵਾ ਵੈਨੇਜ਼ੁਏਲਾ ਦੀ ਅਮਾਂਡਾ ਦੂਦਾਮੇਲ ਅਤੇ ਡੋਮਿਨਿਕਨ ਰੀਪਬਲਿਕ ਦੀ ਐਂਡਰੀਨਾ ਮਾਰਟੀਨੇਜ਼ ਸ਼ਾਮਲ ਹਨ।
ਪੂਰੀ ਖ਼ਬਰ ਇੱਥੇ ਪੜ੍ਹੋ
ਸ਼ੁਭਮਨ ਗਿੱਲ: ਦੋਹਰਾ ਸੈਂਕੜਾ ਜੜਨ ਵਾਲੇ ਪੰਜਾਬੀ ਮੁੰਡੇ ਨੂੰ ਮਾਹਿਰ ਕੋਹਲੀ ਤੋਂ ਬਾਅਦ ਅਗਲਾ ਵੱਡਾ ਖਿਡਾਰੀ ਕਿਉਂ ਕਹਿ ਰਹੇ
ਤਸਵੀਰ ਸਰੋਤ, Getty Images
“ਸ਼ੁੱਭਮਨ ਗਿੱਲ ਦੀ ਖ਼ਾਸ ਗੱਲ ਇਹ ਹੈ ਕਿ ਉਹ ਚੰਗੀਆਂ ਗੇਂਦਾਂ ਨੂੰ ਵੀ ਚੌਕੇ ਬਹੁਤ ਹੀ ਸਹਿਜਤਾ ਨਾਲ ਲਗਾ ਰਹੇ ਹਨ। ਜਦੋਂ ਗੇਂਦਬਾਜ਼ ਦੀਆਂ ਚੰਗੀਆਂ ਗੇਂਦਾਂ ਨੂੰ ਚੌਕੇ ਲਗਾਏ ਜਾਂਦੇ ਹਨ ਤਾਂ ਉਹ ਉਨ੍ਹਾਂ ਲਈ ਬਹੁਤ ਪ੍ਰੇਸ਼ਾਨ ਕਰਨ ਵਾਲਾ ਹੁੰਦਾ ਹੈ।”
“ਮੈਨੂੰ ਤਾਂ ਇਹ ਵੀ ਹਮੇਸ਼ਾ ਲਗਦਾ ਹੈ ਕਿ ਵਿਰਾਟ ਕੋਹਲੀ ਤੋਂ ਬਾਅਦ ਸ਼ੁੱਭਮਨ ਗਿੱਲ ਭਾਰਤ ਲਈ ਇੱਕ ਵੱਡੇ ਖਿਡਾਰੀ ਹੋਣਗੇ।”
ਸ਼ੁੱਭਮਨ ਗਿੱਲ ਬਾਰੇ ਇਹ ਵਿਚਾਰ ਭਾਰਤ ਦੇ ਸਾਬਕਾ ਸਲਾਮੀ ਬੱਲੇਬਾਜ਼ ਵਸੀਮ ਜਾਫ਼ਰ ਦੇ ਹਨ ਜੋ ਉਨ੍ਹਾਂ ਨੇ ਈਐੱਸਪੀਐੱਨ ਕ੍ਰਿਕਇਨਫੋ ਨਾਲ ਗੱਲਬਾਤ ਵਿੱਚ ਸਾਂਝੇ ਕੀਤੇ ਸਨ।
ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਕਾਰ ਖੇਡੀ ਜਾ ਰਹੀ ਵਨਡੇ ਸੀਰੀਜ਼ ਦੇ ਪਹਿਲੇ ਹੀ ਮੈਚ ਵਿੱਚ ਸ਼ੁਭਮਨ ਗਿੱਲ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਦੁਹਰਾ ਸੈਂਕੜਾ ਜੜ ਦਿੱਤਾ ਹੈ।
ਆਪਣੀ ਇਸ ਪਾਰੀ ਵਿੱਚ ਗਿੱਲ ਨੇ 149 ਗੇਂਦਾਂ ਵਿੱਚ ਕੁੱਲ 208 ਦੌੜਾਂ ਬਣਾਈਆਂ, ਜਿਨ੍ਹਾਂ ਵਿੱਚ ਉਨ੍ਹਾਂ ਨੇ 19 ਚੌਕੇ ਅਤੇ 9 ਛੱਕੇ ਜੜੇ।ਭਾਰਤੀ ਟੀਮ ਦੇ ਸੱਜੇ ਹੱਥ ਦੇ ਬੱਲੇਬਾਜ਼ ਗਿੱਲ ਦਾ ਇਹ ਪਹਿਲਾ ਦੁਹਰਾ ਸੈਂਕੜਾ ਹੈ।ਇਸ ਤੋਂ ਪਹਿਲਾਂ ਉਹ ਵਨਡੇ ਮੈਚਾਂ ਵਿੱਚ ਹੁਣ ਤੱਕ 2 ਸੈਂਕੜੇ ਬਣਾ ਚੁੱਕੇ ਹਨ ਅਤੇ ਉਨ੍ਹਾਂ ਦਾ ਤੀਜਾ ਸੈਂਕੜਾ ਨਿਊਜ਼ੀਲੈਂਡ ਦੇ ਖ਼ਿਲਾਫ਼ ਇਸ ਮੈਚ ਵਿੱਚ ਹੀ ਬਣਿਆ ਹੈ।
ਇਸ ਤੋਂ ਪਹਿਲਾਂ, ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਭਾਰਤ ਦੇ ਸਲਾਮੀ ਬੱਲੇਬਾਜ਼ ਸ਼ੁਭਮਨ ਗਿੱਲ ਨੇ 87 ਗੇਂਦਾਂ 'ਚ ਸੈਂਕੜਾ ਬਣਾਇਆ ਸੀ।
ਉਨ੍ਹਾਂ ਦੀ ਸ਼ਾਨਦਾਰ ਬੱਲੇਬਾਜ਼ੀ ਦੇ ਸਦਕਾ ਭਾਰਤੀ ਟੀਮ ਨੇ ਨਿਊਜ਼ੀਲੈਂਡ ਦੀ ਟੀਮ ਨੂੰ 8 ਵਿਕਟਾਂ ਦੇ ਨੁਕਸਾਨ 'ਤੇ 350 ਦੌੜਾਂ ਦਾ ਟੀਚਾ ਦਿੱਤਾ।ਸ਼ੁਭਮਨ ਗਿੱਲ ਨੇ ਆਪਣਾ ਪਹਿਲਾ ਵਨਡੇ ਅੰਤਰਰਾਸ਼ਟਰੀ ਮੈਚ ਵੀ ਨਿਊਜ਼ੀਲੈਂਡ ਦੇ ਖ਼ਿਲਾਫ਼ ਹੀ ਖੇਡਿਆ ਸੀ।
ਪੂਰੀ ਖ਼ਬਰ ਤਫ਼ਸੀਲ ਵਿੱਚ ਇੱਥੇ ਪੜ੍ਹੋ
ਪਾਕਿਸਤਾਨ 'ਚ ਆਟੇ ਦਾ ਸੰਕਟ: 'ਬੱਚੇ 8 ਦਿਨਾਂ ਤੋ ਭੁੱਖੇ, ਆਟੇ ਲਈ ਸੜਕਾਂ 'ਤੇ ਬੈਠੀਆਂ ਹਾਂ, ਕੋਈ ਇੱਜ਼ਤ ਵਾਲੀ ਗੱਲ ਤਾਂ ਨਹੀਂ'
ਤਸਵੀਰ ਸਰੋਤ, Getty Images
"ਔਰਤਾਂ ਲਈ ਇਹ ਚੰਗੀ ਗੱਲ ਨਹੀਂ ਹੈ ਕਿ ਉਹ 20 ਕਿੱਲੋ ਆਟੇ ਦੀ ਥੈਲੀ ਲਈ ਕਈ ਦਿਨਾਂ ਤੱਕ ਸੜਕਾਂ 'ਤੇੇ ਬੈਠ ਕੇ ਇੰਤਜ਼ਾਰ ਕਰਦੀਆਂ ਰਹਿਣ।''
''ਵੱਡੀ ਗਿਣਤੀ ਵਿੱਚ ਅਸੀਂ ਔਰਤਾਂ ਵੀ ਆਟਾ ਲੈਣ ਲਈ ਵੱਖ-ਵੱਖ ਥਾਵਾਂ 'ਤੇ ਕਈ-ਕਈ ਘੰਟੇ ਬੈਠੀਆਂ ਰਹਿੰਦੀਆਂ ਹਾਂ। ਇਸ ਦੌਰਾਨ ਜੇ ਕਿਸੇ ਨੂੰ ਪਿਸ਼ਾਬ ਆ ਜਾਵੇ ਤਾਂ ਉਹ ਕਿੱਥੇ ਜਾਣ ? ਇਹ ਕੋਈ ਇੱਜ਼ਤ ਵਾਲੀ ਗੱਲ ਤਾਂ ਨਹੀਂ ਹੈ ਨਾ?"
ਇਹ ਕਹਿਣਾ ਹੈ ਬਲੋਚਿਸਤਾਨ ਦੀ ਰਾਜਧਾਨੀ ਕਵੇਟਾ ਦੇ ਬਰੌਰੀ ਰੋਡ ਇਲਾਕੇ ਦੀ 70 ਸਾਲਾ ਇਮਾਮ ਬੀਬੀ ਦਾ, ਜਿਨ੍ਹਾਂ ਨੂੰ ਸੋਮਵਾਰ ਨੂੰ ਕਵੇਟਾ ਰੇਲਵੇ ਸਟੇਸ਼ਨ ਦੇ ਸਾਹਮਣੇ ਕਈ ਘੰਟੇ ਉਡੀਕ ਕਰਨ ਦੇ ਬਾਵਜੂਦ ਸਰਕਾਰੀ ਰੇਟ 'ਤੇ ਮਿਲਣ ਵਾਲੀ ਆਟੇ ਦੀ ਥੈਲੀ ਨਹੀਂ ਮਿਲ ਸਕੀ।
ਦਰਅਸਲ, ਪਿਛਲੇ ਕਈ ਦਿਨਾਂ ਤੋਂ ਪਾਕਿਸਤਾਨ ਦੇ ਵੱਖ-ਵੱਖ ਇਲਾਕਿਆਂ ਤੋਂ ਸਰਕਾਰੀ ਰੇਟਾਂ 'ਤੇ ਆਟਾ ਨਾ ਮਿਲਣ ਦੀਆਂ ਖ਼ਬਰਾਂ ਆ ਰਹੀਆਂ ਹਨ।
ਪੂਰੀ ਖ਼ਬਰ ਪੜ੍ਹਨ ਲਈ ਇੱਥੇ ਕਲਿੱਕ ਕਰੋ
ਜਪਾਨ ਹੈ ਦੁਨੀਆਂ ਦਾ ਸਭ ਤੋਂ ਕਰਜ਼ਾਈ ਦੇਸ਼, ਪਰ ਫਿਰ ਵੀ ਇਸ ਨੂੰ ਸੌਖੇ ਤਰੀਕੇ ਨਾਲ ਕਰਜ਼ ਕਿਵੇਂ ਮਿਲ ਰਿਹਾ
ਤਸਵੀਰ ਸਰੋਤ, Getty Images
ਜਪਾਨ ਦਾ ਜਨਤਕ ਕਰਜ਼ਾ 9.2 ਖਰਬ ਅਮਰੀਕੀ ਡਾਲਰ ਪਹੁੰਚ ਚੁੱਕਿਆ ਹੈ, ਜੋ ਕਿ ਇਸ ਦੀ ਜੀਡੀਪੀ ਦਾ 266 ਫੀਸਦੀ ਹੈ।
ਇਸ ਹਿਸਾਬ ਨਾਲ ਦੇਖੀਏ ਤਾਂ ਜਪਾਨ ਦਾ ਕਰਜ਼ਾ, ਦੁਨੀਆਂ ਦੀਆਂ ਸਭ ਤੋਂ ਪ੍ਰਮੁੱਖ ਅਰਥਵਿਵਸਥਾਵਾਂ ਦੇ ਮੁਕਾਬਲੇ ਸਭ ਤੋਂ ਜ਼ਿਆਦਾ ਹੈ।
ਇਹ ਅੰਕੜੇ ਪਿਛਲੇ ਸਾਲ ਸਤੰਬਰ ਮਹੀਨੇ ਦੇ ਅਨੁਸਾਰ ਹਨ ਤੇ ਇਸ ਸਮੇਂ ਦੌਰਾਨ ਹੀ ਜਪਾਨ ਦੇ ਮੁਕਾਬਲੇ ਅਮਰੀਕਾ 'ਤੇ 31 ਖਰਬ ਅਮਰੀਕੀ ਡਾਲਰ ਦਾ ਕਰਜ਼ਾ ਹੈ।
ਪਰ ਇੱਥੇ ਇਹ ਦੱਸਣਾ ਵੀ ਜ਼ਰੂਰੀ ਹੈ ਕਿ ਇਹ ਕਰਜ਼ਾ, ਦੁਨੀਆਂ ਦੇ ਸਭ ਤੋਂ ਸ਼ਕਤੀਸ਼ਾਲੀ ਦੇਸ਼ ਮੰਨੇ ਜਾਣ ਵਾਲੇ ਅਮਰੀਕਾ ਦੀ ਜੀਡੀਪੀ ਦਾ 98 ਫੀਸਦੀ ਹੈ।
ਜੀਡੀਪੀ (ਕੁੱਲ ਘਰੇਲੂ ਉਤਪਾਦ) ਇੱਕ ਵਿਸ਼ੇਸ਼ ਸਾਲ ਵਿੱਚ ਦੇਸ਼ ਵਿੱਚ ਪੈਦਾ/ਤਿਆਰ ਵਸਤੂਆਂ ਅਤੇ ਸੇਵਾਵਾਂ ਦਾ ਕੁੱਲ ਮੁੱਲ ਹੁੰਦਾ ਹੈ।
ਇਹ ਦਰਸਾਉਂਦੀ ਹੈ ਕਿ ਇੱਕ ਸਾਲ ਵਿੱਚ ਅਰਥਵਿਵਸਥਾ ਨੇ ਕਿੰਨਾ ਵਧੀਆ ਜਾਂ ਬੁਰਾ ਪ੍ਰਦਰਸ਼ਨ ਕੀਤਾ ਹੈ। ਜਪਾਨ ਦੀਆਂ ਵੱਖਰੀਆਂ ਆਰਥਿਕ ਨੀਤੀਆਂ ਬਾਰੇ ਪੂਰੀ ਖ਼ਬਰ ਇੱਥੇ ਪੜ੍ਹੋ
