ਹਾਕੀ ਵਿਸ਼ਵ ਕੱਪ: ਹਰਮਨ, ਮਨਪ੍ਰੀਤ ਤੇ ਅਕਾਸ਼ਦੀਪ ਸਣੇ 7 ਭਾਰਤੀ ਖਿਡਾਰੀ ਜੋ ਖੇਡ ਬਦਲ ਸਕਦੇ ਹਨ

    • ਲੇਖਕ, ਸੌਰਭ ਦੁੱਗਲ
    • ਰੋਲ, ਬੀਬੀਸੀ ਲਈ

ਹਾਕੀ ਦੇ ਪਹਿਲੇ ਵਿਸ਼ਵ ਕੱਪ ਮੁਕਾਬਲੇ 1971 ਵਿੱਚ, ਭਾਰਤ ਨੇ ਕਾਂਸੀ ਦਾ ਤਗਮਾ ਜਿੱਤਿਆ, ਜਦਕਿ ਦੂਜੇ ਵਿਸ਼ਵ ਕੱਪ, 1973 ਵਿੱਚ, ਭਾਰਤ ਦੂਜੇ ਸਥਾਨ 'ਤੇ ਰਿਹਾ ਸੀ।

ਫਿਰ ਇਤਿਹਾਸਕ ਪਲ ਆਉਂਦਾ ਹੈ, ਜਦੋਂ ਅਜੀਤਪਾਲ ਸਿੰਘ ਨੇ 1975 ਵਿੱਚ ਵਿਸ਼ਵ ਕੱਪ ਜਿੱਤਣ ਲਈ ਭਾਰਤੀ ਟੀਮ ਦੀ ਅਗਵਾਈ ਕੀਤੀ ਸੀ।

ਉਦੋਂ ਤੋਂ ਹੀ ਭਾਰਤੀ ਟੀਮ ਗਲੋਬਲ ਈਵੈਂਟ 'ਚ ਪੋਡੀਅਮ ਬਣਾਉਣ ਲਈ ਸੰਘਰਸ਼ ਕਰ ਰਹੀ ਹੈ।

2023 ਵਿਸ਼ਵ ਕੱਪ ਤੋਂ ਪਹਿਲਾਂ, ਭਾਰਤ ਨੇ ਤਿੰਨ ਵਾਰ ਵਿਸ਼ਵ ਕੱਪ ਮੁਕਾਬਲਿਆਂ ਦੀ ਮੇਜ਼ਬਾਨੀ ਕੀਤੀ ਸੀ ਅਤੇ ਮੇਜ਼ਬਾਨ ਹੋਣ ਦੇ ਬਾਵਜੂਦ, ਟੀਮ ਕੁਆਰਟਰ ਫਾਈਨਲ ਦੀ ਰੁਕਾਵਟ ਨੂੰ ਪਾਰ ਕਰਨ ਵਿੱਚ ਅਸਫ਼ਲ ਰਹੀ ਸੀ।

1982 ਵਿੱਚ ਮੁੰਬਈ ਵਿੱਚ ਹੋਏ ਵਿਸ਼ਵ ਕੱਪ ਮੁਕਾਬਲੇ 'ਚ ਭਾਰਤ ਪੰਜਵੇਂ ਸਥਾਨ 'ਤੇ ਰਿਹਾ, 2010 ਵਿੱਚ ਨਵੀਂ ਦਿੱਲੀ ਵਿੱਚ ਭਾਰਤ ਅੱਠਵੇਂ ਸਥਾਨ 'ਤੇ ਰਿਹਾ ਅਤੇ 2018 ਦੇ ਭੁਵਨੇਸ਼ਵਰ ਵਿੱਚ ਹੋਏ ਪਿਛਲੇ ਵਿਸ਼ਵ ਕੱਪ ਵਿੱਚ ਭਾਰਤ ਛੇਵੇਂ ਸਥਾਨ 'ਤੇ ਰਿਹਾ ਸੀ।

ਪਰ ਇਸ ਵਾਰ ਭਾਰਤੀ ਟੀਮ ਬਿਹਤਰ ਅਤੇ ਮਜ਼ਬੂਤ ਹਾਲਤ ਵਿੱਚ ਦਿਖ ਰਹੀ ਹੈ। ਮੇਜ਼ਬਾਨੀ ਦੇ ਨਾਲ-ਨਾਲ ਟੀਮ ਨੂੰ ਟੋਕੀਓ ਓਲੰਪਿਕ (2021) ਵਿੱਚ ਕਾਂਸੀ ਤਮਗਾ ਜਿੱਤਣ ਦਾ ਫਾਇਦਾ ਵੀ ਹੈ।

ਟੀਮ ਦੀ ਨਜ਼ਰ 13 ਜਨਵਰੀ ਤੋਂ ਰਾਊੜਕਿਲਾ ਅਤੇ ਭੁਵਨੇਸ਼ਵਰ 'ਚ ਹੋਣ ਵਾਲੇ 15ਵੇਂ ਵਿਸ਼ਵ ਕੱਪ ਦੌਰਾਨ 48 ਸਾਲ ਪੁਰਾਣੇ ਵਿਸ਼ਵ ਕੱਪ ਦੇ ਤਮਗੇ ਦੇ ਸੋਕੇ ਨੂੰ ਖ਼ਤਮ ਕਰਨ 'ਤੇ ਹੋਵੇਗੀ।

ਭਾਰਤੀ ਪੁਰਸ਼ ਹਾਕੀ ਟੀਮ ਨੇ ਸਾਲ 2021 ਵਿੱਚ ਟੋਕੀਓ ਵਿੱਚ 41 ਸਾਲਾਂ ਦੇ ਵਕਫੇ ਬਾਅਦ ਓਲੰਪਿਕ ਤਮਗਾ ਜਿੱਤਿਆ ਸੀ।

Skip ਸਭ ਤੋਂ ਵੱਧ ਪੜ੍ਹਿਆ ਗਿਆ and continue reading
ਸਭ ਤੋਂ ਵੱਧ ਪੜ੍ਹਿਆ ਗਿਆ

End of ਸਭ ਤੋਂ ਵੱਧ ਪੜ੍ਹਿਆ ਗਿਆ

ਟੋਕੀਓ ਓਲੰਪਿਕ ਦੀ ਤਮਗਾ ਜੇਤੂ ਟੀਮ ਦੇ 12 ਮੈਂਬਰ ਵਿਸ਼ਵ ਕੱਪ ਦੀ 18 ਮੈਂਬਰੀ ਟੀਮ ਦਾ ਹਿੱਸਾ ਹਨ।

ਅਸੀਂ ਉਨ੍ਹਾਂ ਸਾਰੇ ਮੁੱਖ ਖਿਡਾਰੀਆਂ ਦੀ ਗੱਲ ਕਰਦੇ ਹਾਂ, ਜੋ ਖੇਡ ਦੇ ਕੋਰਸ ਨੂੰ ਬਦਲ ਸਕਦੇ ਹਨ।

ਕਦੋਂ-ਕਦੋਂ ਹੋਣਗੇ ਭਾਰਤ ਦੇ ਮੈਚ

  • 13/01/2023 - ਭਾਰਤ ਬਨਾਮ ਸਪੇਨ - ਗਰੁੱਪ ਡੀ - ਰਾਉੜਕਿਲਾ - ਸ਼ਾਮ 7 ਵਜੇ
  • 15/01/2023 - ਇੰਗਲੈਂਡ ਬਨਾਮ ਭਾਰਤ - ਗਰੁੱਪ ਡੀ - ਰਾਊੜਕਿਲਾ - ਸ਼ਾਮ 7 ਵਜੇ
  • 19/01/2023 - ਭਾਰਤ ਬਨਾਮ ਵੇਲਜ਼ - ਗਰੁੱਪ ਡੀ - ਭੁਵਨੇਸ਼ਵਰ - ਸ਼ਾਮ 7 ਵਜੇ

ਸੈਮੀਫਾਈਨਲ:

  • 27/01/2023 - ਪਹਿਲਾ ਸੈਮੀਫਾਈਨਲ - ਭੁਵਨੇਸ਼ਵਰ - ਸ਼ਾਮ 4:30 ਵਜੇ
  • 27/01/2023 - ਦੂਜਾ ਸੈਮੀਫਾਈਨਲ - ਭੁਵਨੇਸ਼ਵਰ - ਸ਼ਾਮ 7 ਵਜੇ
  • 28/01/2023 - ਪਲੇਸਮੈਂਟ ਮੈਚ (13ਵੇਂ-16ਵੇਂ ਅਤੇ 9ਵੇਂ-12ਵੇਂ)

ਫਾਈਨਲ:

  • 29/01/2023 - ਕਾਂਸੀ ਦਾ ਤਗਮਾ ਮੈਚ - ਸ਼ਾਮ 4:30 ਵਜੇ
  • 29/01/2023 - ਗੋਲਡ-ਮੈਡਲ ਮੈਚ - ਸ਼ਾਮ 7 ਵਜੇ

ਡਿਫੈਂਡਰ - ਹਰਮਨਪ੍ਰੀਤ ਸਿੰਘ

 ਪੰਜਾਬ ਦੇ ਅੰਮ੍ਰਿਤਸਰ ਦਾ ਰਹਿਣ ਵਾਲੇ, 27 ਸਾਲਾ ਹਰਮਨਪ੍ਰੀਤ ਸਿੰਘ ਡਰੈਗ ਫਲਿੱਕਰ ਟੋਕੀਓ ਓਲੰਪਿਕ ਵਿੱਚ ਕਾਂਸੀ ਦਾ ਤਮਗਾ ਜਿੱਤਣ ਵਾਲੀ ਟੀਮ ਦਾ ਹਿੱਸਾ ਸਨ ਅਤੇ ਵਿਸ਼ਵ ਕੱਪ 2018 ਦੇ ਵਿੱਚ ਵੀ ਮੁੱਖ ਮੈਂਬਰ ਸੀ।

ਭਰੋਸੇਮੰਦ ਪੈਨਲਟੀ ਕਾਰਨਰ ਮਾਹਰ ਪਿਛਲੇ ਸਾਲ ਕਪਤਾਨ ਚੁਣੇ ਜਾਣ ਤੋਂ ਬਾਅਦ ਆਪਣੇ ਪਹਿਲੇ ਵੱਡੇ ਮੈਚਾਂ ਵਿੱਚ ਟੀਮ ਦੀ ਅਗਵਾਈ ਕਰ ਰਹੇ ਹਨ।

ਉਨ੍ਹਾਂ ਦੀ ਮਾਨਸਿਕ ਤਾਕਤ ਕਪਤਾਨ ਦੇ ਰੂਪ ਵਿੱਚ ਉਨ੍ਹਾਂ ਦੀ ਨਵੀਂ ਭੂਮਿਕਾ ਵਿੱਚ ਪਰਿਪੱਕਤਾ ਜੋੜਦੀ ਹੈ।

150 ਤੋਂ ਵੱਧ ਕੌਮਾਂਤਰੀ ਮੈਚਾਂ ਵਿੱਚ ਖੇਡ ਚੁੱਕੇ ਹਰਮਨਪ੍ਰੀਤ ਦੇ ਨਾਮ 125 ਤੋਂ ਵੱਧ ਗੋਲ ਕਰਨ ਦਾ ਸਿਹਰਾ ਹੈ।

ਸਾਬਕਾ ਭਾਰਤੀ ਕਪਤਾਨ ਸਰਦਾਰ ਸਿੰਘ ਕਹਿੰਦੇ ਹਨ, “ਸ਼ਾਰਟ ਕਾਰਨਰ ਦੀ ਆਪਣੀ ਚੰਗੀ ਪਰਿਵਰਤਨ ਦਰ ਤੋਂ ਇਲਾਵਾ, ਹਰਮਨਪ੍ਰੀਤ ਬਚਾਅ ਪੱਖ ਵਿੱਚ ਬਹੁਤ ਪ੍ਰਭਾਵਸ਼ਾਲੀ ਹੈ"

"ਇੱਕ ਡਿਫੈਂਡਰ ਵਜੋਂ ਉਸ ਦਾ ਹੁਨਰ ਵਿਸ਼ਵ ਪੱਧਰੀ ਹੈ ਅਤੇ ਉਸ ਕੋਲ ਮੈਚ ਦੇ ਪੂਰੇ ਕੋਰਸ ਦੌਰਾਨ, ਡਿਫੈਂਸ ਤੋਂ ਫਾਰਵਰਡ ਲਾਈਨ ਤੱਕ, ਦੂਜੇ ਖਿਡਾਰੀਆਂ ਨਾਲ ਸੰਚਾਰ ਕਰਨ ਦੀ ਗੁਣਵੱਤਾ ਹੈ।"

"ਲੰਬੇ ਪਾਸਿਆਂ ਨਾਲ ਜੁੜੀਆਂ ਖੁੱਲ੍ਹੀਆਂ ਥਾਵਾਂ 'ਤੇ ਉਸ ਦੀ ਨਜ਼ਰ ਅਸਾਧਾਰਣ ਹੈ ਅਤੇ ਕਈ ਵਾਰ, ਉਸ ਦੇ ਲੰਬੇ ਪਾਸਿਆਂ ਦੀ ਸਥਿਤੀ ਖੇਡ ਦੇ ਕੋਰਸ ਨੂੰ ਬਦਲ ਦਿੰਦੀ ਹੈ।”

“ਹਰਮਨਪ੍ਰੀਤ ਇੱਕ ‘ਫ੍ਰੀ-ਮੈਨ’ ਵਜੋਂ ਖੇਡਦੇ ਹਨ ਅਤੇ ਇਸ ਭੂਮਿਕਾ ਨੂੰ ਸੰਭਾਲਣਾ ਆਸਾਨ ਨਹੀਂ ਹੈ। (ਫ੍ਰੀ-ਮੈਨ ਨੂੰ ਆਪਣੇ ਆਪ ਨੂੰ ਗੇਂਦ ਅਤੇ ਗੋਲ ਦੇ ਅਨੁਸਾਰ ਸਥਿਤੀ ਵਿੱਚ ਰੱਖਣਾ ਪੈਂਦਾ ਹੈ। ਮਿਡਫੀਲਡ ਵਿੱਚ ਹੋਣ ਵਾਲੇ ਕਿਸੇ ਵੀ ਹਮਲੇ ਦਾ ਸਾਹਮਣਾ ਕਰਨ ਦੇ ਯੋਗ ਹੋਣ ਲਈ, ਅਤੇ ਬਚਾਅ ਲਈ ਕਵਰ ਵੀ ਪ੍ਰਦਾਨ ਕਰਨਾ ਹੁੰਦਾ ਹੈ।)"

"ਮੈਂ ਇਸ ਸਥਿਤੀ 'ਤੇ ਖੇਡਿਆ ਹਾਂ, ਇਸ ਲਈ ਮੈਂ ਉਸ ਦਬਾਅ ਦੀ ਕਲਪਨਾ ਕਰ ਸਕਦਾ ਹਾਂ, ਜਿਸ ਨੂੰ ਸੰਭਾਲਣਾ ਪੈਂਦਾ ਹੈ। ਪਰ ਹਾਲ ਹੀ ਦੇ ਸਮੇਂ ਵਿੱਚ, ਹਰਮਨਪ੍ਰੀਤ ਸੱਚਮੁੱਚ ਪਰਿਪੱਕ ਹੋ ਗਿਆ ਹੈ ਅਤੇ ਚੰਗਾ ਕੰਮ ਕਰ ਰਿਹਾ ਹੈ।”

ਇਹ ਵੀ ਪੜ੍ਹੋ-

ਸੁਰਿੰਦਰ ਕੁਮਾਰ

ਕਰਨਾਲ, ਹਰਿਆਣਾ ਦਾ ਇੱਕ ਤਜਰਬੇਕਾਰ ਖਿਡਾਰੀ, ਸੁਰਿੰਦਰ ਭਾਰਤ ਦੇ ਭਰੋਸੇਮੰਦ ਡਿਫੈਂਡਰਾਂ ਵਿੱਚੋਂ ਇੱਕ ਹੈ। 29 ਸਾਲਾ ਖਿਡਾਰੀ ਨੇ 174 ਕੌਮਾਂਤਰੀ ਮੈਚ ਖੇਡੇ ਹਨ ਅਤੇ ਉਹ ਟੋਕੀਓ ਜਾਣ ਵਾਲੀ ਟੀਮ ਦਾ ਵੀ ਹਿੱਸਾ ਸੀ।

ਭੁਵਨੇਸ਼ਵਰ ਵਿੱਚ 2018 ਵਿੱਚ ਹੋਏ ਵਿਸ਼ਵ ਕੱਪ ਦੇ ਪਿਛਲੇ ਐਡੀਸ਼ਨ ਵਿੱਚ, ਭਾਰਤ ਕੁਆਰਟਰ ਫਾਈਨਲ ਵਿੱਚ ਹਾਰ ਗਿਆ ਸੀ, ਪਰ ਸੁਰਿੰਦਰ ਭਾਰਤ ਦੀ ਮੁਹਿੰਮ ਲ਼ਈ ਖੇਡ ਸ਼ਾਨਦਾਰ ਰਹੀ।

ਨੀਦਰਲੈਂਡਜ਼ (1-2) ਤੋਂ ਹਾਰਨ ਦੇ ਬਾਵਜੂਦ, ਉਨ੍ਹਾਂ ਦੇ ਪ੍ਰਦਰਸ਼ਨ ਨੇ ਉਨ੍ਹਾਂ ਨੂੰ 'ਮੈਨ ਆਫ ਦਿ ਮੈਚ' ਦਾ ਪੁਰਸਕਾਰ ਦਿੱਤਾ।

300 ਤੋਂ ਵੱਧ ਕੌਮਾਂਤਰੀ ਮੈਚਾਂ ਦੇ ਅਨੁਭਵੀ ਨੇ ਕਿਹਾ, “ਉਨ੍ਹਾਂ ਦੀ ਨਜਿੱਠਣ ਸ਼ਕਤੀ ਅਤੇ ਮੈਨ ਟੂ ਮੈਨ ਮਾਰਕਿੰਗ ਮੁੱਖ ਤਾਕਤ ਹੈ।"

ਕੇਂਦਰ- ਹਾਰਦਿਕ ਸਿੰਘ

ਪੰਜਾਬ ਦੀ ਹਾਕੀ ਪੱਟੀ ਜਲੰਧਰ ਤੋਂ ਆਉਣ ਵਾਲੇ ਹਾਰਦਿਕ, ਜੋ ਕਿ ਇੱਕ ਹਾਕੀ ਪਰਿਵਾਰ ਨਾਲ ਸਬੰਧ ਰੱਖਦੇ ਹਨ, ਮਿਡਫੀਲਡ ਵਿੱਚ ਇੱਕ ਮੁੱਖ ਹਨ।

24 ਸਾਲਾ ਹਾਰਦਿਕ ਟੋਕੀਓ ਓਲੰਪਿਕ (2021) ਵਿੱਚ ਭਾਰਤੀ ਕਾਂਸੀ ਤਮਗਾ ਜਿੱਤਣ ਵਾਲੀ ਟੀਮ ਅਤੇ ਪਿਛਲੇ ਸਾਲ ਰਾਸ਼ਟਰਮੰਡਲ ਖੇਡਾਂ ਵਿੱਚ ਵੀ ਚਾਂਦੀ ਦਾ ਤਗਮਾ ਜਿੱਤਿਆ ਦਾ ਹਿੱਸਾ ਸੀ।

ਔਖੇ ਹਾਲਾਤ ਵਿੱਚ ਵੀ ਉਨ੍ਹਾਂ ਦਾ ਜਲਦੀ ਫ਼ੈਸਲਾ ਲੈਣਾ ਉਨ੍ਹਾਂ ਦੀ ਤਾਕਤ ਹੈ।

ਸਰਦਾਰ ਸਿੰਘ ਕਹਿੰਦੇ ਹਨ, "ਉਹ ਇੱਕ ਨੌਜਵਾਨ ਪ੍ਰਤਿਭਾ ਹੈ ਅਤੇ ਗੇਂਦ 'ਤੇ ਉਸ ਦੀ ਚੰਗੀ ਨਜ਼ਰ ਹੈ। ਉਹ ਵਿਰੋਧੀ ਦੀ ਖੇਡ ਨੂੰ ਇੰਨੀ ਚੰਗੀ ਤਰ੍ਹਾਂ ਪੜ੍ਹਦਾ ਹੈ ਕਿ ਇਹ ਉਨ੍ਹਾਂ ਦੀਆਂ ਚਾਲਾਂ ਦਾ ਅੰਦਾਜ਼ਾ ਲਗਾਉਣ ਵਿੱਚ ਉਸ ਦੀ ਮਦਦ ਕਰਦਾ ਹੈ।"

"ਤੁਸੀਂ ਉਸ ਨੂੰ ਕਈ ਮੌਕਿਆਂ 'ਤੇ ਵਿਰੋਧੀ ਦੇ ਪਾਸਿਆਂ ਨੂੰ ਰੋਕਦੇ ਹੋਏ ਦੇਖੋਗੇ। ਉਸ ਦਾ ਵਿਰੋਧੀ ਦੇ ਸਟਰਾਈਕਿੰਗ ਖੇਤਰ 'ਤੇ ਤੇਜ਼ੀ ਨਾਲ ਲੰਘਣਾ ਇੱਕ ਫਾਰਵਰਡ ਲਾਈਨ ਲਈ ਇੱਕ ਵੱਡਾ ਫਾਇਦਾ ਹੈ।”

ਮਨਪ੍ਰੀਤ ਸਿੰਘ

ਮਨਪ੍ਰੀਤ ਸਿੰਘ ਮੌਜੂਦਾ ਭਾਰਤੀ ਟੀਮ ਦੇ ਸਭ ਤੋਂ ਤਜਰਬੇਕਾਰ ਹੱਥਾਂ ਵਿੱਚੋਂ ਇੱਕ ਹੈ। ਪੰਜਾਬ ਦੇ 30 ਸਾਲਾ ਮਨਪ੍ਰੀਤ ਨੇ ਟੋਕੀਓ ਓਲੰਪਿਕ ਵਿੱਚ ਭਾਰਤੀ ਟੀਮ ਦੀ ਅਗਵਾਈ ਕਰਦਿਆਂ ਇਤਿਹਾਸਕ ਪੋਡੀਅਮ ਫਾਈਨਲ ਕੀਤਾ।

300 ਤੋਂ ਵੱਧ ਅੰਤਰਰਾਸ਼ਟਰੀ ਮੈਚਾਂ ਦੇ ਤਜ਼ਰਬੇ ਦੇ ਨਾਲ, ਮਨਪ੍ਰੀਤ ਦੀ ਭੂਮਿਕਾ ਮਿਡਫੀਲਡ ਵਿੱਚ ਬਹੁਤ ਮਹੱਤਵਪੂਰਨ ਹੋਵੇਗੀ ਅਤੇ ਉਹ ਖੇਡ ਬਣਾਉਣ ਵਿੱਚ ਵੱਡੇ ਪੱਧਰ 'ਤੇ ਯੋਗਦਾਨ ਪਾ ਸਕਦੇ ਹਨ।

ਸਰਦਾਰਾ ਸਿੰਘ ਕਹਿੰਦੇ ਹਨ, “ਇੱਕ ਓਲੰਪਿਕ ਤਮਗੇ ਲਈ ਟੀਮ ਦੀ ਅਗਵਾਈ ਕਰਨਾ ਇੱਕ ਵੱਡੀ ਪ੍ਰਾਪਤੀ ਹੈ। ਉਸ ਦਾ ਤਜਰਬਾ ਟੀਮ ਲਈ ਇੱਕ ਬਹਿਤਰੀਨ ਸਾਬਿਤ ਹੋਵੇਗਾ।"

ਫਾਰਵਰਡ- ਆਕਾਸ਼ਦੀਪ ਸਿੰਘ

29 ਸਾਲਾ ਆਕਾਸ਼ਦੀਪ, ਮੌਜੂਦਾ ਭਾਰਤੀ ਟੀਮ ਦੇ ਸਭ ਤੋਂ ਸੀਨੀਅਰ ਖਿਡਾਰੀਆਂ ਵਿੱਚੋਂ ਇੱਕ ਹੈ। ਉਹ ਆਪਣੇ ਤੀਜੇ ਵਿਸ਼ਵ ਕੱਪ (2014, 2018 ਅਤੇ 2023) ਵਿੱਚ ਖੇਡ ਰਹੇ ਹਨ।

ਔਖੇ ਵੇਲਿਆਂ ਤੇ ਪਲਾਂ 'ਤੇ ਗੋਲ ਕਰਨ ਦੀ ਆਪਣੀ ਕਾਬਲੀਅਤ ਨਾਲ ਅਕਾਸ਼ਦੀਪ ਨੇ ਦੇਸ਼ ਨੂੰ ਕਈ ਅਹਿਮ ਜਿੱਤਾਂ ਦਿਵਾਈਆਂ ਹਨ।

ਜਦੋਂ ਤੋਂ ਹਾਕੀ ਵਿਸ਼ਵ ਕੱਪ ਵਿੱਚ ਐਸਟ੍ਰੋ-ਟਰਫ ਦੀ ਸ਼ੁਰੂਆਤ ਕੀਤੀ ਗਈ ਸੀ, ਹੁਣ ਤੱਕ ਆਕਾਸ਼ਦੀਪ ਸੱਤ ਗੋਲਾਂ ਦੇ ਨਾਲ ਮੈਗਾ ਈਵੈਂਟ ਵਿੱਚ ਭਾਰਤ ਵੱਲੋਂ ਸਭ ਤੋਂ ਵੱਧ ਸਕੋਰ ਕਰਨ ਵਾਲੇ ਖਿਡਾਰੀ ਹੈ।

ਉਨ੍ਹਾਂ ਨੂੰ ਟੋਕੀਓ ਓਲੰਪਿਕ ਟੀਮ ਤੋਂ ਬਾਹਰ ਕਰ ਦਿੱਤਾ ਗਿਆ ਸੀ, ਪਰ ਇਸ ਤੋਂ ਬਾਅਦ ਉਨ੍ਹਾਂ ਨੇ ਆਪਣੇ ਹੁਨਰ ਵਿੱਚ ਹੋਰ ਸੁਧਾਰ ਕੀਤਾ ਅਤੇ ਖੇਡ ਦੀ ਮੰਗ ਮੁਤਾਬਕ, ਮੱਧ-ਫੀਲਡ ਵਿੱਚ ਸਥਿਤੀ ਬਦਲਣ 'ਤੇ ਕੰਮ ਕੀਤਾ।

ਸਰਦਾਰਾ ਸਿੰਘ ਮੁਤਾਬਕ, “ਆਕਾਸ਼ਦੀਪ ਭਾਰਤ ਦੀ ਵਿਸ਼ਵ ਕੱਪ ਮੁਹਿੰਮ ਵਿੱਚ ਇੱਕ ਮਹੱਤਵਪੂਰਨ ਖਿਡਾਰੀ ਹੋਣਗੇ।"

"ਆਖਰੀ ਪਲਾਂ 'ਤੇ ਗੋਲ ਕਰਨ ਦੀ ਉਸ ਦੀ ਯੋਗਤਾ ਨੇ ਭਾਰਤ ਨੂੰ ਕਈ ਮਹੱਤਵਪੂਰਨ ਟੂਰਨਾਮੈਂਟਾਂ ਦੌਰਾਨ ਜਿੱਤ ਦਰਜ ਕਰਨ 'ਚ ਮਦਦ ਕੀਤੀ ਹੈ। 2014 ਏਸ਼ੀਆਈ ਖੇਡਾਂ ਦੇ ਸੈਮੀਫਾਈਨਲ ਵਿੱਚ ਦੱਖਣੀ ਕੋਰੀਆ ਦੇ ਖ਼ਿਲਾਫ਼, ਅਸੀਂ ਦੋ-ਦੋ ਨਾਲ ਬਰਾਬਰੀ 'ਤੇ ਸੀ ਅਤੇ ਇਹ ਆਕਾਸ਼ਦੀਪ ਸੀ, ਜਿਸ ਨੇ ਆਖ਼ਰੀ ਮਿੰਟ ਵਿੱਚ ਇੱਕ ਗੋਲ ਕੀਤਾ।"

"ਆਖ਼ਰਕਾਰ, ਅਸੀਂ ਸੋਨ ਤਮਗਾ ਜਿੱਤਿਆ। 2018 ਏਸ਼ੀਅਨ ਖੇਡਾਂ ਦੇ ਕਾਂਸੀ ਤਮਗਾ ਮੈਚ ਵਿੱਚ, ਉਨ੍ਹਾਂ ਨੇ ਜੇਤੂ ਗੋਲ ਕੀਤਾ। ਮੈਨੂੰ ਭਰੋਸਾ ਹੈ ਕਿ ਉਨ੍ਹਾਂ ਦੀ ਗੋਲ ਕਰਨ ਦੀ ਸਮਰੱਥਾ ਭਾਰਤ ਨੂੰ ਵਿਸ਼ਵ ਕੱਪ ਵਿੱਚ ਤਮਗਾ ਜਿੱਤਣ ਵਿੱਚ ਮਦਦ ਕਰੇਗੀ।"

ਮਨਦੀਪ ਸਿੰਘ

ਆਕਾਸ਼ਦੀਪ ਦੇ ਨਾਲ, ਮਨਦੀਪ ਫਾਰਵਰਡ ਲਾਈਨ ਵਿੱਚ ਇੱਕ ਮਹੱਤਵਪੂਰਨ ਥੰਮ੍ਹ ਹੋਣਗੇ।

ਪੰਜਾਬ ਦੇ ਇਸ ਖਿਡਾਰੀ ਨੇ 194 ਕੌਮਾਂਤਰੀ ਮੈਚ ਖੇਡੇ ਹਨ ਅਤੇ 96 ਗੋਲ ਕੀਤੇ ਹਨ। 27 ਸਾਲਾ ਟੋਕੀਓ ਜਾਣ ਵਾਲੀ ਟੀਮ ਦਾ ਹਿੱਸਾ ਵੀ ਰਹੇ ਹਨ।

ਸਰਦਾਰਾ ਸਿੰਘ ਮੁਤਾਬਕ, “ਉਹ ਵਿਰੋਧੀ ਦੇ ਸਰਕਲ ਵਿਚ ਬਹੁਤ ਖ਼ਤਰਨਾਕ ਹੋ ਸਕਦਾ ਹੈ। ਜੇਕਰ ਉਹ ਗੋਲ ਕਰਨ ਵਿੱਚ ਅਸਮਰੱਥ ਹੁੰਦਾ ਹੈ ਜਾਂ ਗੋਲਪੋਸਟ 'ਤੇ ਹਿੱਟ ਕਰਨ ਦਾ ਸਪੱਸ਼ਟ ਮੌਕਾ ਨਹੀਂ ਮਿਲਦਾ, ਤਾਂ ਉਹ ਗੇਂਦ ਨੂੰ ਵਿਰੋਧੀ ਦੇ ਪੈਰਾਂ ਨੂੰ ਛੂਹ ਕੇ ਪੈਨਲਟੀ ਕਾਰਨਰ ਹਾਸਲ ਕਰਨ ਦੀ ਸਮਰੱਥਾ ਰੱਖਦਾ ਹੈ।"

"ਆਕਾਸ਼ਦੀਪ ਅਤੇ ਹਰਮਨਪ੍ਰੀਤ ਦੇ ਨਾਲ ਮਨਦੀਪ ਗੋਲ ਕਰਨ ਲਈ ਇੱਕ ਘਾਤਕ ਸੁਮੇਲ ਹੈ।"

ਗੋਲਕੀਪਰ - ਪੀਆਰ ਸ਼੍ਰੀਜੇਸ਼

ਸ਼੍ਰੀਜੇਸ਼ ਮੌਜੂਦਾ ਭਾਰਤੀ ਟੀਮ ਵਿੱਚ ਉਸ ਦਾ ਸਭ ਤੋਂ ਲੰਬਾ ਕੌਮਾਂਤਰੀ ਕਰੀਅਰ ਹੈ। ਕੇਰਲਾ ਦੇ 34 ਸਾਲਾ ਖਿਡਾਰੀ ਨੇ 2006 ਵਿੱਚ ਆਪਣੀ ਅੰਤਰਰਾਸ਼ਟਰੀ ਸ਼ੁਰੂਆਤ ਕੀਤੀ।

ਉਨ੍ਹਾਂ ਨੇ ਟੋਕੀਓ ਓਲੰਪਿਕ ਵਿੱਚ ਭਾਰਤ ਦੇ ਪੋਡੀਅਮ ਫਿਨਿਸ਼ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਅਤੇ ਸਾਲ 2020-21 ਲਈ, ਉਨ੍ਹਾਂ ਨੂੰ ਸਰਵੋਤਮ ਪੁਰਸ਼ ਗੋਲਕੀਪਰ ਲਈ ਐੱਫਆਈਐੱਚ ਪਲੇਅਰ ਆਫ ਦਿ ਈਅਰ ਐਵਾਰਡ ਚੁਣਿਆ ਗਿਆ।

”ਸਰਦਾਰ ਸਿੰਘ ਕਹਿੰਦੇ ਹਨ, "ਸ਼੍ਰੀਜੇਸ਼ ਦੁਨੀਆ ਦਾ ਸਭ ਤੋਂ ਵਧੀਆ ਖਿਡਾਰੀ ਹੈ। ਉਹ ਇਕੱਲੇ ਹੀ ਖੇਡ ਦਾ ਰੁਖ਼ ਬਦਲਣ ਦੀ ਸਮਰੱਥਾ ਰੱਖਦਾ ਹੈ।"

Skip content and continue reading

End of content

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)