اسرائیلي پوځ؛ قوي احتمال شته چې شیرین ابو عاقله زموږ سرتېري وژلې وي
د عکس سرچینه، Reuters
د اسرائیلو پوځ وايي، د دې قوي احتمال شته چې فلسطین الاصله امریکايي خبریاله شیرین ابوعاقله د دوی کوم یوه سرتیري وژلې وي.
د الجزیرې تجربه لرونکې خبریاله سږ کال د مې په میاشت کې هغه مهال په سر وېشتل شوې وه، چې د اردن لویدیځ کې د جګړې له ډګره یې رپوټ ورکاوه.
د اسراييلي پوځ دا څرګندونې د شيرين ابو عاقله د وژنې مسووليت منلو ته یو نږدې اقرار ښکاري.
د پوځ لوړپوړو چارواکو د شیرین په وژنه کې د ښکېلو سرتېرو په وړاندې د قانوني پلټنو امر کړی.
د ابو عاقلې کورنۍ په یوه خپره شوې خبر پاڼه کې ویلي، دا دوی ته حیرانوونکې نه ده، چې د اسرائیلو دفاعي ځواکونه د حقیقت پټولو او د هغې د وژنو مسولیت منلو کې زړه نا زړه وو.
د عکس سرچینه، EPA
عیني شاهدانو او فلسطیني چارواکو هغه مهال لا ادعا کړې وه، چې شیرین د اسرائیلي پوځیانو له خوا وژل شوې او دا ادعا د ملګرو ملتونو او یو شمېر رسنیو په څېړنیزو راپورونو کې تایید شوې ده.
د اسرائیلو دفاعي ځواکونه وايي، چې په دې اړه یې په کور دننه ګڼې پلټنې کړې دي.
د دوی یوه جګپوړي چارواکي د دوشنبې په ورځ وویل، د دې قوي احتمال شتون لري چې شیرین ابو عاقله "د یوه اسرائیلي سرتېري لخوا په غلطۍ سره وژل شوې وي او کیدای شي د یوې خبریالې په توګه هغه یې نه وي پېژندلې. "
یاد چارواکي زیاته کړې، چې پلټونکو په پېښه کې له ښکېل سرتېري سره خبرې کړې دي.
د عکس سرچینه، Reuters
د امريکا ولسمشر جوبايډن منځني ختیځ ته د خپل وروستي سفر په لړ کې د اسرائیلي سرتېرو لخوا د فسطینۍ توکمه امریکایۍ خبریالې شیرین ابو عاقله وژنه خواشینونکې پېښه بللې وه او ویلي و چې عاملان یې باید ځواب ووایي.
د ملګرو ملتونو سرمنشي انتونیو ګوتېرش هم ویلي و، چې لوېديځه غاړه کې د الجزیزې تلویزیون د باتجربه خبریالې 'شېرین ابو عاقله' وژل کېدو حیران کړی دی.
د ښاغلي ګوتېرش له ادرسه په یوه خپره شوې اعلامیه کې راغلي و چې "اړوند چارواکي دې د دې پېښې په تړاو خپلواکې او رڼې څېړنې وکړي او دا دې ډاډمنه کړي چې له عاملانو سره یې حساب کېږي."
د عکس سرچینه، EPA
هغه مهال الجزیرې ویلي و، ۵۱ کلنه خبریاله شیرین ابو عاقله اسرائیلي پوځیانو په "رڼا ورځ" او "قصدآ" وژلې ده.
۵۱ کلنه فلسطین الاصله امریکایۍ خبریاله شیرین ابو عاقله یوه پېژندل شوې څېره وه او له دغې سیمې د خپلو رپوټونو او خبري پوښښ له کبله ستایل کېده.
ابو عاقله چې خبریالانو ته ځانګړی زغروال واسکټ یې په تن و او اوسپنیزه خولۍ یې هم په سر کړې وه هغه سړک ته نژدې په ډزو ویشتل شوې وه چې د اسرائیلي ځواکونو او فلسطیني وسلوالو تر منځ نښته روانه وه.
