طالبانو د نجونو زدکړو ملاتړی او د پوهنتون استاد اسماعیل مشعل نیولی
د عکس سرچینه، Ismail Mashal
اسماعیل مشعل روانه اونۍ له زدکړو د ملاتړ لپاره خپله لاسي ګاډۍ لارو کوڅو ته رایستلې او پر خلکو په ځانګړي ډول نجونو او مېرمنو یې وړیا کتابونه وېشل.
خو د زدکړو دغه ملاتړی کمپان کوونکی د خپل کمپاین په دویمه ورځ په کابل کې طالب سرتېرو " له وهلو ډبلو" وروسته له ځان سره بېولی دی.
د طالبانو حکومت اطلاعاتو او کلتور وزارت یو چارواکی عبدالحق حماد د نوموړي نیول کېدل تاییدوي او وایي" استاد مشعل چې له څه وخت راهيسې يې په ډېر مهارت د نظام پر ضد پاروونکي کړنې ترسره کولې، مازديګر يې ګڼ شمېر خبريالان پر ځان راټول کړي وو او پر عمومي سړک يې ګڼه ګوڼه جوړه کړې وه، امنيتي ادارو د تحقيقاتو لپاره بېولی."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
ښاغلی حماد په دې اړه دا هم لیکلي چې نیول شوی استاد" ښه او تود" ساتل کیږي او دده په ټکو توصیه یې ورته کړې چې " کړنې چې خلک د نظام پر ضد را پاروي هيڅ د هېواد په خير نه دي، ويې منله، ويل ما چې څه کول يو اړخ مې سنجولی وو، اوس متوجه شوم"
خو د ښاغلي مشعل ملګري فرید احمد فضلي فرانسې خبري اژانس ته ویلي چې نوموړی " په بې رحمۍ د طالب سرتېرو لخوا وهل ډبول شوی او په بې عزتۍ" یې له ځان سره بېولی.
اسماعیل مشعل له دې وړاندې په یوه ټلویزیوني خپرونه کې خپل تحصیلي اسناد پر نجونو د زده کړو بندیز په غبرګون کې شکولي وو.
د عکس سرچینه، Social media
د نوموړي د دغه اعتراضي خوځښت ویډیو په نړیوالو رسنیو او خواله رسنیو کاروونکو ترمنځ ډېر غبرګونونه وپارول.
ښاغلي مشعل په کابل کې یوه شخصي پوهنتون مشري کوله چې د رپوټونو له مخې په هغې ۴۵۰ نجونو زده کوونکو د خبریالۍ، انجینرۍ او اقتصاد په برخه کې زده کړې کولې.
د اسماعیل مشعل مرستیال بیا وایي، نوموړی په تېره یوه لسیزه کې د کابل په دریو پوهنتونو کې تدریس کاوه او د پنجشنبه په ورځ پرته له" کوم جرمه " ونیول شو چې دوی یې د ځای ځایګي په اړه مالومات نه لري.
د عکس سرچینه، Social media
د طالبانو لخوا تر بل امره د نجونو پر زدکړو له بندیز وروسته د افغانستان دولتي پوهنتونونو ګڼ شمېر استادانو له خپلو دندو استعفا ورکړه.
د هغوی له ډلې یو هم د کابل پوهنتون استاد عبیدالله وردګ وو.
ښاغلی وردګ د اسماعیل مشعل د نیول کېدو په اړه لیکي" د استاد مشعل نیول کېدل، له پوهې او منطق سره ښکاره دښمني ده، هغه یوازې په خلکو کتابونه وېشل او له عامو خلکو سره د علم او پوهې په اړه خبرې کولې."
