વૉલમાર્ટને તરબૂચ ખરીદવા આવેલા ગ્રાહકને 50 કરોડ ચૂકવવાનો આદેશ

પોતાના સ્ટોરમાંથી તરબૂચ ખરીદતી વખતે ઇજાગ્રસ્ત થઈ જવાને કારણે વૉલમાર્ટે એક વ્યક્તિને 50 કરોડ રૂપિયાનું નુકસાની વળતર ચૂકવવાની ફરજ પડશે.

ખરીદી કરતી વખતે ઇજા પામેલા વ્યક્તિને આ રૂપિયા ચૂકવવાનો જ્યૂરીએ આદેશ કર્યો છે.

ઉપરોક્ત ઘટના અમેરિકાના અલબામા રાજ્યનો છે. જુલાઈ 2015માં હેનરી વૉલ્કરનો પગ લાકડાની પટ્ટીઓ વચ્ચે ફસાઈ ગયો હતો.

તમને આ પણ વાંચવું ગમશે

આ ઘટના વૉલમાર્ટમાંથી ફ્રૂટ ખરીદતી વખતે બની હતી. આ સમયે વૉલ્કરની ઉંમર 59 વર્ષની હતી. તેમણે આ મામલે ફેનિક્સ સિટી કોર્ટમાં કહ્યું હતું કે તેઓ પડી ગયા હતા.

વૉલ્કરે કહ્યું કે આ દુર્ધટનામાં તેમની કમર અને પગમાં ગંભીર ઇજાઓ થઈ હતી.

બીજી તરફ વૉલમાર્ટનું કહેવું છે કે તેમના સ્ટોરમાં ડિસપ્લે સુરક્ષિત રીતે જ રાખવામાં આવ્યા હતા અને આ ઘટના પછી પણ સંચાલકો તરીકે તઓ તેમાં કોઈ ફેરફાર કરવાના નથી.

વૉલમાર્ટનું કહેવું છે કે કંપની આ ચૂકાદાની સામે અપીલ કરશે. વૉલ્કર એક નિવૃત્ત આર્મીમેન છે. જ્યૂરીએ 25 લાખ ડૉલર વળતર રૂપે અને 50 લાખ ડૉલર સજાના ભાગરૂપે ચૂકવવાનો આદેશ કર્યો છે.

વૉલ્કરના વકીલે કહ્યું કે આ એકદમ સાચો-સમયસરનો ચૂકાદો છે કારણ કે વૉલમાર્ટે શરૂઆતથી જ આ ઘટનાની અવગણના કરી હતી.

વૉલ્કરના વકીલે કહ્યું, 'વૉલમાર્ટે લાકડાની પટ્ટીઓ અસુરક્ષિત રીતે રાખી હતી.

તેમાં કોઈપણ વ્યક્તિનો પગ ફસાઈ શકતો હતો. જ્યૂરીએ એ વાતની નોંધ લીધી કે વૉલ્કર અગાઉ અઠવાડિયામાં ત્રણ વખત બાસ્કેટબૉલ રમતા હતા પરંતુ હવે તેઓ એ માટે અશક્તિમાન છે.'

વૉલમાર્ટનું કહેવું છે કે તેના ડિસપ્લેમાં કોઈ ખામી ન હતી. સમગ્ર અમેરિકાના સ્ટોરમાં તે આ રીતે ડિસપ્લેનો ઉપયોગ કરે છે. વૉલમાર્ટના કહેવા પ્રમાણે વૉલ્કરનું ઈજાગ્રસ્ત થવું એ તેમની પોતાની જ બેદરકારી હતી.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો