કૃષિકાયદા રદ : પ્રિયંકા ગાંધીનો નરેન્દ્ર મોદી પર વાર, 'પહેલાં ખેડૂતોને આંદોલનજીવી કહ્યા અને પછી માફી માગી'

વડા પ્રધાન નરેન્દ્ર મોદીએ દેશને સંબોધન કરતી વખતે ત્રણેય કૃષિકાયદા પરત લેવાની જાહેરાત કરી છે. ઉલ્લેખનીય છે વિવાદિત કૃષિકાયદાની સામે ખેડૂતો એકાદ વર્ષથી આંદોલન કરી રહ્યા હતા તો સરકાર તેને ખેડૂતોના લાભમાં ગણાવતી હતી. જોકે, આખરે સરકારે પાછી પાની કરી છે.

ખેડૂતનેતા રાકેશ ટિકૈતે આ જાહેરાત અંગે પ્રતિક્રિયા આપતાં કહ્યું કે, "આંદોલન તાત્કાલિક પરત ખેંચવામાં નહીં આવે, અમે એ દિવસની રાહ જોઈશું કે જ્યારે કૃષિકાયદાઓને સંસદમાં રદ કરવામાં આવે."

"સરકાર એમએસપીની સાથે-સાથે ખેડૂતોના અન્ય મુદ્દાઓ પર પણ વાત કરશે."

આ દરમિયાન કેન્દ્ર સરકારના ત્રણ કૃષિકાયદા પાછા ખેંચવાના નિર્ણય પર પ્રતિક્રિયા આપતાં કૉંગ્રેસ મહાસચિવ પ્રિયંકા ગાંધીએ કહ્યું કે "જ્યારે ખેડૂતોની હત્યા થઈ રહી હતી, તેમના પર લાઠીઓ વીંઝવામાં આવતી હતી અને તેમની ધરપકડ કરવામાં આવી રહી હતી, આ બધું કોણ કરી રહ્યું હતું? તમારી સરકાર."

"આજે તમે કહો છો કે કાયદા પાછા ખેંચાયા. કોઈ તમારા પર ભરોસો કેવી રીતે કરે? મને ખુશી છે કે સરકાર સમજી ગઈ કે આ દેશમાં ખેડૂતોથી મોટું કોઈ નથી."

ઉત્તર પ્રદેશની રાજધાની લખનૌમાં પ્રિયંકા ગાંધીએ કહ્યું કે, "તેઓ કેમ આવું કરી રહ્યા છે? શું દેશવાસીઓ નથી સમજતા કે ચૂંટણી આવી રહી છે અને તેમને લાગ્યું હશે કે પરિસ્થિતિ બરાબર નથી. તેઓ સરવેમાં જોઈ શકે છે કે પરિસ્થિતિ સારી નથી. એટલે ચૂંટણી પહેલાં તેમણે માફી માગી."

આગળ તેમણે કહ્યું કે "સરકારના નેતાઓએ ખેડૂતોને કયાં-કયાં નામે બોલાવ્યા? આંદોલનજીવી, ગુંડા, આતંકવાદી, દેશદ્રોહી - આ બધા શબ્દો કોણે વાપર્યા? આ બધા શબ્દો કહેવાઈ રહ્યા હતા ત્યારે મોદી કેમ ચુપ હતા? તેમણે પોતે 'આંદોલનજીવી' શબ્દ વાપર્યો."

ઉલ્લેખનીય છે કે કૉંગ્રેસ મહાસચિવ પ્રિયંકા ગાંધી અને રાહુલ ગાંધી ખેડૂતઆંદોલનને લઈને સક્રિય રહ્યાં હતાં.

યુપીના લખીમપુર ખીરીમાં ખેડૂતોના પ્રદર્શનમાં હિંસા વખતે પ્રિયંકા ગાંધી પ્રભાવિત ખેડૂતોને મળવા જવાં માગતાં હતાં ત્યાર તેમને રોકવામાં આવ્યાં હતાં.

ઑલ ઇન્ડિયા મજલિસ-એ-ઇત્તેહાદુલ મુસ્લિમીન (એઆઈએમઆઈએમ)ના વડા અને હૈદરાબાદના સાંસદ અસદુદ્દીન ઓવૈસીએ પણ ત્રણ કૃષિકાયદા પરત લેવા મામલે વડા પ્રધાન નરેન્દ્ર મોદી પર નિશાન સાધતાં કટાક્ષ કર્યો છે.

ઓવૈસીએ ટ્વિટર પર એક શેર લખ્યો છે અને સાથે જ લખ્યું છે :

''કૃષિકાયદા પ્રારંભથી જ ગેરકાયદે હતા. સરકારના અંહકારને કારણે ખેડૂતોએ રસ્તા પર ઊતરવું પડ્યું. જો સરકારે બાળહઠ ન કરી હોત તો 700થી વધુ ખેડૂતોનો જીવ ન જાત. ખેડૂત આંદોલનને અભિનંદન. પંજાબ અને ઉત્તર પ્રદેશમાં ભાજપની સ્થિતિને જોતાં મોદી પાસે અન્ય કોઈ વિકલ્પ નહોતો.''

તો વડા પ્રધાન નરેન્દ્ર મોદીએ આજે ત્રણ કૃષિકાયદા પરત ખેંચવાની જાહેરાત કરી, તેને કૉંગ્રેસે ખેડૂતોની જીત ગણાવી અને કહ્યું કે, 'તૂટ ગયા અભિમાન, જીત ગયા મેરે દેશ કા કિસાન.'

કૃષિકાયદા પર દિલ્હીના મુખ્ય મંત્રી અરવિંદ કેજરીવાલની પણ પ્રતિક્રિયા આવી છે.

તેમણે ટ્વીટ કરીને કહ્યું કે, "આજે પ્રકાશપર્વના દિવસે મોટી ખુશખબર મળી. ત્રણ કૃષિકાયદા રદ. 700 કરતાં વધારે ખેડૂતો શહીદ થઈ ગયા. તેમની શહાદત અમર રહેશે."

કૃષિકાયદા અંગે શું બોલ્યા?

વડા પ્રધાન નરેન્દ્ર મોદી શું બોલી રહ્યા છે?

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો