Donald Trump yareze umushinjacyaha wa New York ngo amubuze gukora iperereza kuri kompanyi ye

Donald Trump yareze mu rukiko umushinjacyaha wa leta ya New York Letitia James, ashaka kumubuza gukomeza iperereza kuri kompanyi ye.

Uyu wahoze ari Perezida w'Amerika avuga ko uwo mushinjacyaha yahonyoye uburenganzira bwe ahabwa n'itegekonshinga, agakomeza iperereza rishingiye ku mpamvu za politiki.

Madamu Letitia avuga ko iryo perereza "rizakomeza uko byagenda kose".

Mu 2019 ni bwo yatangije iperereza ryo mu rwego mbonezamubano ku bivugwa ko - mbere yuko agera ku butegetsi - Bwana Trump yari yarakabirije agaciro k'umutungo we ubwo yabaga ashaka gusaba inguzanyo muri za banki.

Icyo kirego mu rukiko kibaye nta byumweru bibiri bishize Madamu Letitia agaragaje ko mu kwezi gutaha Bwana Trump ashobora guhatwa ibibazo, anakora indahiro (ko ibyo avuga ari ukuri), bijyanye n'iryo perereza.

Bwana Trump anacyekwaho kugaragaza agaciro kari hasi (agaciro gato) k'umutungo we kugira ngo bimugabanyirize imisoro.

Ibiro by'umushinjacyaha mukuru Letitia bimaze igihe bishaka inyandiko ku mitungo ine ya kompanyi Trump Organization mu karere ka Manhattan, muri New York y'amajyaruguru, muri Chicago no muri Los Angeles.

Mu kwezi kwa gatanu uyu mwaka, Madamu Letitia, wo mu ishyaka ry'abademokarate, yabwiye BBC ko itsinda rye "ryamenyesheje Trump Organization ko iperereza ryacu kuri Organization ritakiri gusa iryo mu rwego mbonezamubano".

Uwo wahoze ari Perezida, wo mu ishyaka ry'abarepubulikani, yavuze ko iryo perereza rigamije kumwibasira.

Mu gihe cy'ubutegetsi bwe kuva mu mwaka wa 2017 kugeza mu 2021, Bwana Trump yakomeje kwanga gutangaza imisoro yarishye, nubwo yokejwe igitutu cyinshi ngo abikore.

Imanza mbonezamubano akenshi zijyana n'ingaruka zatejwe ku bantu cyangwa abikorera, harimo n'ubucuruzi. Amategeko mpanabyaha yo akoreshwa mu manza aho ingaruka byibazwa ko zageze ku muryango mugari (sosiyete) muri rusange, harimo na leta.