New York: Umushinjacyaha avuga ko iperereza kuri Trump ubu noneho ari 'ngenzacyaha'

Ibiro by'umushinjacyaha mukuru wa leta ya New York bivuga ko birimo gukora iperereza ku kigo cy'ubucuruzi Trump Organization ryo "mu rwego ngenzacyaha".

Umuvugizi w'umushinjacyaha mukuru w'iyo leta Letitia James, yavuze ko iryo perereza kuri kompanyi y'inyubako ya Bwana Trump "ritakiri gusa mu rwego mbonezamubano".

Madamu Letitia amaze igihe agenzura ibikorwa by'imari ya Donald Trump wahoze ari Perezida w'Amerika wo mu ishyaka ry'abarepubulikani, byo mu gihe cya mbere yuko aba Perezida.

Umuryango wa Trump uhakana uvuga ko nta kibi wakoze, ukanavuga ko iperereza ry'uwo mushinjacyaha w'umudemokarate ari ukumwibasira muri politiki.

Fabien Levy, umuvugizi wa Madamu Letitia, ku wa kabiri yabwiye BBC ati: "Twamenyesheje ikigo Trump Organization ko iperereza ryacu kuri iki kigo ritakiri gusa mu rwego mbonezamubano.

"Ubu turashishikaye mu iperereza kuri Trump Organization mu rwego ngenzacyaha, dufatanyije n'ibiro by'umushinjacyaha w'akarere ka Manhattan. Nta kindi dufite cyo kurenzaho".

Iryo tangazo ntiryavuze icyatumye iryo perereza riva mu rwego mbonezamubano (civil) rikajya mu rwego ngenzacyaha (criminal), cyangwa niba uyu wahoze ari Perezida ubwe ashobora kuba arebwa n'ibirego.

Imanza mbonezamubano akenshi zijyana n'ingaruka zatejwe ku bantu cyangwa abikorera, harimo n'ubucuruzi. Amategeko mpanabyaha yo akoreshwa mu manza aho ingaruka byibazwa ko zageze ku muryango mugari (sosiyete) muri rusange, harimo na leta.

Iperereza ryatangiye ryari?

Mu kwezi kwa gatatu mu 2019, Madamu Letitia yatangije iperereza ryo mu rwego mbonezamubano ku birego byuko Bwana Trump yakabirije agaciro k'umutungo we ubwo yabaga ashaka inguzanyo mu mabanki, akanakagabanya ubwo igihe cyo gutanga imisoro cyabaga kigeze kugira ngo asore amafaranga macyeya.

Ibiro by'umushinjacyaha Letitia birimo kandi gushaka inyandiko ku bigo bine bishamikiye kuri Trump Organization biri mu karere ka Manhattan, mu majyaruguru ya New York, i Chicago n'i Los Angeles.

Mu nyandiko z'urukiko zo mu kwezi kwa munani mu 2020, umushinjacyaha mukuru w'akarere ka Manhattan, Cyrus Vance Jr, yavuze ko ibiro bye birimo gukora iperereza ku bivugwa ko ari "imikorere igize icyaha imaze igihe kirekire" muri Trump Organization.

Inyandiko Bwana Vance yagejeje ku rukiko zisubiramo amagambo yo mu nkuru zasohotse mu binyamakuru ku bisa nkaho ari uburiganya muri banki no mu bwishingizi bivugwa ko byakorewe muri icyo kigo.

Uyu mushinjacyaha mukuru w'akarere ka Manhattan amaze igihe kandi akora iperereza agamije kumenya niba haba hari amakuru ajyanye n'imari ya Trump yaba yaratanzwe mu buryo bw'uburiganya ngo azimanganye (ahishire) amafaranga yarishye abagore babiri mu 2016 ngo baceceke, aba bavuga ko baryamanye na we.

Mu kwezi kwa kabiri uyu mwaka, ibiro bya Bwana Vance byavuze ko byabonye amakuru ajyanye n'imisoro ya Bwana Trump bijyanye n'iryo perereza, nyuma y'urugamba rurerure imbere y'amategeko kugira ngo bigere kuri ayo makuru.

Mu gihe cyose cy'ubutegetsi bwe, Bwana Trump yakomeje kwanga guhishura amakuru ajyanye n'imisoro yishyuye, nubwo yagiye yotswa igitutu ngo abikore.