Yn bersonol, 'doeddwn i heb wneud unrhyw fath o redeg traws gwlad ers blynyddoedd felly mater o raid oedd ymarfer, neu fyddwn i ddim yn cyrraedd pen y daith!

Fe ddaeth y criw o bump merch at ei gilydd o dipyn i beth, ac ar ôl i bawb fod yn ymarfer yn ei gornel fach ei hun ers tua mis Ebrill, daethom yn ddigon dewr i gyfarfod yn Sandilands a rhedeg i lawr efo'r afon ac yn ôl ac roedd honno'n ddigon o brawf ar ffitrwydd yn ei hun! Erbyn hyn 'roedd rhai o'r dynion wedi penderfynu rhedeg y 10k (7 milltir) eto eleni i weld os fedren nhw wella ar amser y llynedd, 'roeddem ni wedi penderfynu eisoes mai'r ras hwyl oeddem ni am ei rhedeg - hwyl? A hithau'n 5½ milltir?

Yr achosion da oeddem am eu cefnogi eleni oedd yr Ambiwlans Awyr - gwasanaeth hanfodol mewn ardal wledig fel hon, a Chylch Meithrin Tywyn - sydd bob amser yn chwilio am arian i gadw'r Cylch i fynd.

Wrth i'r ymarfer fwrw yn ei flaen a'r cyfarfodydd wythnosol yn Sandilands barhau, dyma fwrw ati i hel noddwyr - a chael ymateb gwych. Cyn pen dim daeth bore'r ras a phawb yn cyfarfod ym Mhenllyn i wisgo'i grys smart - a diolch unwaith eto i Genesis am argraffu a noddi'r crysau.

Cafwyd sesiwn dynnu lluniau ac yna 'roedd pawb ar ei ffordd i ddechrau'r ras - diolch i'r "chauffeurs" am ein cludo yno'n ddiogel!

'Roedd y ras 10k yn dechrau ychydig ynghynt na'r ras hwyl, ond buan iawn y cyfarfu'r ddwy giang ar ôl Brynglas (rhai ynghynt na'i gilydd!). Roedd llawer iawn o bobl yn rhoi o'i hamser i stiwardio'r ras ar ei hyd - ac roedd y diodydd oer, y spwng llawn dŵr oer a'r anogaeth yn dderbyniol iawn. Bu'n rhaid gwneud ymdrech arbennig i basio Cynfal oherwydd bod ein cefnogwyr ni yno'n gweiddi "c'mon mam - rheda!"

Mrs Mai Lewis