"Mae hi wedi bod yn dipyn haws i mi gamu o'r neilltu gan fod cyfaill i mi a ffermwr o Sir Feirionnydd yn fy olynu," meddai Meuric.

Er ei fod wedi bod yn Gadeirydd y Cyngor ers deuddeng mlynedd mae Meuric wedi bod yn gysylltiedig â'r sioe am dipyn mwy na hyn. Bu ar y Bwrdd Llywodraethol ers y chwedegau ac mae'n cofio'r amser yn iawn pan oedd y Sioe yn symud yn flynyddol rhwng y De a'r Gogledd cyn ei sefydlu yn barhaol yn Llanelwedd. Yn wir dim ond un Sioe mae wedi ei cholli ers 1933. Ef oedd Llywydd y Sioe pan oedd Sir Feirionnydd yn ei noddi yn 1978, anrhydedd a ddaeth i'w ran eto yn 2004 pan oedd y Sioe yn gan mlwydd oed. Mae wedi beirniadu sawl tro yn y Sioe hefyd.

"Dw i'n cofio fy sioe gyntaf yn 1933," meddai, "gan mai dyma'r tro cyntaf i mi wisgo trywsus llaes!"

Dyfarnwyd Gwobr Syr Bryner Jones iddo yn 1990 am ei gyfraniad i amaethyddiaeth Cymru. Anrhydedd arall a ddaeth i'w ran oedd i Brifysgol Cymru ei anrhydeddu a gradd MSc am ei gyfraniad i amaethyddiaeth Cymru. Roedd o'n cael ei gapio yr un diwrnod a brenin pêl-droed Cymru, John Charles.

"Bu'r deuddeng mlynedd ddiwethaf yn rhai difyr dros ben," eglurodd "ac mae llawer o'r diolch am hynny i'm diweddar wraig, Margaret. Partneriaeth oedd y swydd, mewn gwirionedd, partneriaeth rhyngddi hi a minnau."

Mae Alun yntau yn gysylltiedig â'r sioe ers blynyddoedd. Mae wedi ei chefnogi drwy'r Bwrdd Marchnata Gwlân a hefyd drwy Gwmni Yswiriant Ffermwyr Prydain, cwmni y bu'n gadeirydd arno am ddeng mlynedd. Fel Meuric, mae yntau wedi ei anrhydeddu droeon megis 1994 pan enillodd Wobr Massey Fergusson am ei gyfraniad i amaethyddiaeth Prydain.

"Mae hon yn anrhydedd fawr i mi," meddai Alun, "ac mi fydd yn dasg anodd, os nad amhosib, dilyn Meuric."

Gyda llaw, ef oedd yr unig enwebiad ar gyfer y swydd sy'n dweud cyfrolau am y parch sydd gan amaethwyr Cymru tuag ato.

Dymunwn y gorau iddo yn ei swydd newydd a diolchwn i Meuric am ei gyfraniad yntau yn ystod y 12 ddiwethaf.