Bu'r pentref heb dîm am flynyddoedd wedyn nes ail-ffurfio'r Clwb Pêl-droed yn 1996 ac mae'r Clwb wedi cael peth llwyddiant ers ei ail-ffurfio. Hogia Aberdyfi oedd pencampwyr Cynghrair Ffigar (Adran 2) yn 1997 ac fe enillon nhw Gwpan Ffigar yn yr un flwyddyn. Fe enillon nhw yr un gwpan ddau dymor yn ddiweddarach a hwythau yn yr Adran Gyntaf.

Llwyddiannau prin oedd y rhain fodd bynnag ac efallai mai un rheswm am hyn oedd ansawdd y cae chwarae ym Mharc Penrhos. Mae'r cae wedi ei adeiladu ar hen domen sbwriel ac fel canlyniad anwastad iawn oedd ei wyneb roedd yn llawn o wrymiau a phantiau gan ei gwneud hi'n amhosib bron i'r chwaraewyr reoli'r bêl o gwbl. Yn ffodus, roedd Cyngor Gwynedd wedi trosglwyddo lês y cae i Gyngor Cymuned Aberdyfi yn 1992 ac, felly, pan benderfynodd y Clwb Pêl-droed ei bod yn hen bryd gwneud rhywbeth ynglyn â'r cae dyna un rhwystr o'r ffordd.

Yn anffodus, roedd digon o rwystrau eraill yn wynebu'r Clwb a'r rhwystr mwyaf oedd y gost ariannol. Deallwyd yn fuan iawn y byddai angen o leiaf £34,000 i wneud y gwaith o lefelu'r cae cost a gynyddodd i £39,000 cyn cwblhau'r gamp. Fe aed ati i wneud cais i Sportlot am gymorthdal ac ar ôl tair blynedd o fargeinio caled fe gaed grant o 50%.Cafwyd grant o £4000 hefyd gan Bwyllgor Gwelliannau Aberdyfi ond, serch hynny, bu'n rhaid i'r Clwb Pêl-droed ddod o hyd i £18,000.

Câi pobol Aberdyfi wybod am bob datblygiad drwy gyfrwng taflen wybodaeth fisol ac o'r herwydd teimlai pawb eu bod yn rhan o'r ymgyrch. Bu'r ymwelwyr a phobl efo tai haf yn y pentref yn gefnogol iawn hefyd. Doedd ryfedd, felly, i'r Clwb lwyddo yn ei ymgyrch i godi'r arian ac erbyn Hydref 2002 roedd y gwaith wedi ei orffen. Coeliwch neu beidio, ond fe gariwyd dros ddwy fil o dunelli o bridd i'r cae. Problem arall efo'r hen gae, wrth gwrs, oedd y byddai dan ddwr yn aml ar ôl glaw trwm. Bellach, mae'r broblem honno wedi ei setlo gyda pheipen newydd wedi ei gosod i gario'r dwr ymaith.

Mae ein dyled yn fawr i bobl y pentref ac ymwelwyr fel ei gilydd am eu cefnogaeth, meddai Bill. Er enghraifft, bu'r Clwb Golff yn help mawr i ni. Mi wn mai peth perig ydy enwi un person mewn ymgyrch o'r fath ond fe hoffwn ddiolch yn arbennig i un dyn sef Bryn Lloyd, ein Trysorydd gweithgar. Fe weithiodd Bryn yn ddiwyd iawn i'n helpu ni i godi'r arian angenrheidiol ac i sicrhau y grant.

Dydy'r cae ddim wedi ei ddefnyddio eto achos, yn naturiol, roedd angen amser i setlo arno. Mae'r disgwyl bron ar ben, fodd bynnag, gan fod diwrnod o ddathlu wedi ei drefnu ar ddydd Sadwrn, 5 Gorffennaf. Fe agorir y cae newydd yn swyddogol gan Jack Dai Davies (capten tîm Aberdyfi pan enillodd Gwpan Amatur Cymru nôl yn 1937) a Paul Bracewell sy'n hyfforddwr gyda thîm cenedlaethol Lloegr.

Yn dilyn, ceir cystadleuaeth rhwng pedwar tîm ynghyd â chystadleuaeth arbennig i dimau Cynghrair y Maboed Mân yn y cylch. Bydd yna sawl gweithgaredd arall hefyd gan gynnwys castell sboncio i'r plant ac ymweliad gan yr arth o gwmni Halo. Yn wir, mae Cwmni Halo, ynghyd ag A.F. Blakemore (Spar) a Banks Brewery yn noddi'r holl weithgareddau.

Pwysleisiodd Bill Bracewell hefyd y bydd y cae ar gael i fudiadau eraill yn y pentref i gynnal gweithgareddau yn ogystal ag i'r Clwb Pêl-droed.

Felly, bobol, dewch yn llu ar y pumed i fwynhau'r hwyl a'r sbri. A phwy wyr efallai y byddwn yn dathlu ennill cwpan cenedlaethol arall gan dîm o'r cylch cyn hir.