Atileetiin Afrikaa Kibbaa Kaaster Semeeniyaan fiigicha dhiifte garee kubbaa miilaa biyyaalessaatti dabalamte
Madda suuraa, Getty Images
Olompikiirratti fageenya meetira 800'n meedaliyaa warqee kan gonfattee Kaaster Semeeniyaan garee Kubbaa miila biyyaalessaa biyyashitti dabalamte.
Daraggeettiin ganna 28 Semeniyaan amma hoormonii teestotirojinii qorichaa fudhatte hir'istu malee dorgommiirratti akka hin hirmaanne Federeeshiniin atileetiksii idila Addunyaa IAAF'n seera haaraa baaseen daangesseera.
Kana jechuun dorgommii Shaampiyoona idila addunyaa 800m Dohaatti ji'a dhuftu dorgomamuuf jirurratti hin falmattu. Haata'u malee, seerri kun akka jijjiramuuf mana murtiitti falmiirra jirti.
Ammatti Gaawuting keessaa kan maadheffate kilabii kubbaa miilaa biyyaalessaa JVW wajjiin shaakala eegalteetti.
Si'a 3 Shaampiyoonaa ta'uu kan dandeessee Kaaster Semeeniyaan, ji'a Adoolessaatti fageenya meetira 800'n olompikiirratti akka hin dorgomne kan beeksifte.
Kaaster Semeeniyaan garee biyyaalessaa kanatti jijjirraa taphattootaan alatti garichatti dabalamtus ,amma bara 2020 tti tapharratti hin hirmaattu.
'' Imala koo haaraafin ofqopheessaa jira, garee kanatti dabalamuu koo jaaladheera, deeggarsa isaanirra dursee argadheera'' jechuun marsariitii kilabii kanatti himteetti.
Gareen kubbaa miila kun bara 2013 kan hundeeffame yoo ta'u, dursituun garichaa Janinii Vaan Wayik kaayyoon isaaniis taphattoota dubartoota filachuu ,ga'oomsuu, foyyeessuu fi gadi baasne mul'isuudha jetti.
Gareen kubbaa miila kun bulchiinsa Gaawuting keessatti dursummaan kan heeramuu fi liigiin kubbaa miila dubartoota Afriikaa Kibbaa dorgommii naannoo 9tti hirama.
Hundeessituun Kilabichaa Vaan Wayik ''Kabajaa guddaa argatte garee JVW filachuu ishiitti ,dandeetti kubbaa miila taphachuurratti qabdus arguuf jirraa'' jetti.
Vaan Wayik BBC tti akka himtetti bara 2020tti garee kana wajjiin taphachuuf wayita waqtiin jijjirraa taphattootaa cufametti dabalamtee jette.
Kaaster Semeeniyaan atileetii yeroo jalqabaatiif garee kubbatti dabalamte miti, Useen Boolt bara 2017 fiigicha dhiisuun kilabii Noorweey 'Stromsgodset' fi Awustiraaliyaa 'Central Coast Mariners 'jedhamu wajjiin eegalee kontiraata otoo hin mallatteessin hafe.
Semeniyaanis lenjistuu ishee kan turte Maariyaa Motolaa fakkenyaa godhachuun fiigicha dhiistee kubbaa taphatti deebite.
Federeeshiniin atileetiksii idila addunyaa IAAF'n seera haara baasen fiigicha tiraakii 400m amma maayilarratti dorgomuuf hoormonii teestotirojinii ishii qoricha hiri'su fudhachuu qabdi ykn fageenya dorgommii irratti himaattuu jijjiruuf dirqamti.
