‘Mossack Fonseca’да тинтув

Ширкатнинг бош қароргоҳидаги тинтув Панама полицияси ва уюшган жиноятчиликка қарши курашувчи бўлим ходимлари томонидан ўтказилган.

Панамадаги ‘Mossack Fonseca’ юридик ширкати яқинда “оффшор можароси” боис бутун дунё бўйлаб катта шов-шувларга сабаб бўлганди.

“Ассошиэйтед пресс” ахборот агентлигининг хабар беришича, ҳуқуқ-тартибот идоралари тинтув чоғида пул ювиш ва террорчиликни молиялаш ҳолларига оид исбот-далилларни қидиришган.

Панама Бош прокуратурасидан расман билдиришларича ҳам сўнгги амалиётларидан мақсад – ширкатнинг ноқонуний фаолиятларга алоқадор эканига оид яқинда чоп этилган махфий ҳужжатлар бўлган.

Панаманинг ‘Mossack Fonseca’ юридик ширкати кўплаб ҳолларда ўз мижозларига пулларини ювиш, санкциялар ва солиқларни четлаб ўтишда кўмак бергани хусусида сўз борган миллионлаб ҳужжатлар эса, куни-кеча матбуотга сизган, жаҳоннинг энг йирик оммавий-ахборот воситаларига имконли бўлганди.

Бу ҳужжатларда 72 давлатнинг собиқ ёки амалдаги раҳбарлари, юқори мартабали амалдорлар, бизнесменлар, таниқли спортчилар ва маданият арбобларининг номлари тилга олинади.

Ҳужжатлар уларнинг орасида Россия, Қозоғистон ва Озарбайжон президентларига яқин шахсларнинг ҳам борлигига далолат қилганди.

Президент Путин эса, бунинг ортидан Панама ҳужжатлари сиздирмаларида “коррупциянинг ҳеч қандай унсури” йўқлини айтган.

У коррупция айбловларини рад этар экан, ўз мухолифлари Россияни беқарорлаштиришга уринишаётганини урғулаганди.

Шу йилнинг 5 апрел куни мамлакат Бош прокуратураси “Панама ҳужжатлари”да тилга олинган ноқонуний офшор ширкатларини тузиш ҳоллари юзасидан тергов ишларини бошлашга ҳозир эканини ҳам баён қилганди.

‘Mossack Fonseca’ асосчисининг даъво қилишича эса, ширкатининг ноқонуний фаолиятларга алоқаси йўқ.

Унга кўра, бу ҳужжатларнинг чоп этилиши – жиноятга тенг бир амалдир.