Бағдодий мурожаати ва Британия тақиқи
Сурат манбаси, AP
Интернет ижтимоий тармоқларидан бирида “Исломий Давлат” гуруҳи раҳбари Абу Бакр ал-Бағдодийники деб ишонилаётган аудио ёзув эълон қилинган, Британия бош вазири “ИД” сафида жанг қилган Британ жангариларининг ватанига киритилмаслиги қонуни тайёрланаётганини айтган.
7 ноябр куни АҚШ ҳаво ҳужуми оқибатида ал-Бағдодий ўлдирилган ёки жароҳатланган бўлиши мумкин деган хабарлар тарқалган, мухбирларга кўра, ушбу аудио ёзув билан “Исломий Давлат” ўз раҳбарининг тирик эканлигини исботламоқчи бўлган.
Аудио мурожаатида Абу Бакр ал-Бағдодий Президент Обаманинг Ироққа қўшимча ҳарбий куч юборишга қарор қилгани, Ливия, Миср ва Ямандаги исломий жангарилар “Исломий Давлат”га содиқликка қасамёд қилганларини тилга олган.
Аудио мурожаатнинг мана шу жиҳатларини эътиборга олиб, бу ёзув яқинда ёзиб олинган ва ҳақиқий деб ҳисоблаш мумкин, дейишади экспертлар.
Айни пайтда Британия Бош вазири Дэвид Кэмерон “Исломий Давлат” сафларида Ироқ ва Сурияда жанг қилган Британия фуқароларини ватанига киритмаслик мақсадини кўзлаган янги қонун тафсилотини эълон қилган.
Сурат манбаси, AP
Бу ҳақда “Йирик йигирмалик” саммитида иштирок этиш учун Австралияга борган Британия бош вазири Австралия парламенти аъзолари қаршисида гапирган.
Бош вазир Дэвид Кэмерон айтишича, шу йил сентябрида ўзининг ташаббуси билан ишлаб чиқиш бошланган Аксилтеррор қонуни ноябр ойи охирларида тайёр бўлади ва ҳукумат бу қонуннинг Британия парламенти томонидан 2015 йил январ ойи охиригача қабул қилинишига умид қилмоқда.
Янги қонунга кўра, “Исломий Давлат” сафларида жанг қилганликда гумон қилинган Британия фуқароларининг, агар ўзларини чегарада ҳуқуқ-тартибот идоралари ихтиёрига топширмасалар, мамлакатга киришларига изн берилмайди.
Гумон қилинган шахсларнинг Британия паспортлари бекор қилинади ва уларнинг исм-шарифлари Британияга парвоз қилиши тақиқланганлар рўйхатига киритилади.
