Шимолий Корея Ким Чен Ин ҳақида филм юзасидан таҳдид қилмоқда

Ахборот агентликларининг хабар қилишларича, Шимолий Корея ўз раҳбари Ким Чен Ин ўлдирилиши оид Ҳолливуд ишлаган филм намойиш этиладиган бўлса, "шафқатсиз" жавоб қайтаришга ваъда берган.

Шимолий Корея Ташқи ишлар вазирлиги воизи давлат матбуотига гапираркан, филмнинг чиқарилишини "уруш амали"га тенглаштирган.

У аниқ номни тилга олмаган, бироқ Ҳолливуднинг худди шу мавзудаги "Интервю" филми октябр ойи намойишга чиқарилиши кутилмоқда.

Ур-сур комедия жанрида ишланган ушбу филмда асосий ролларни Ҳолливуд юлдузлари Жеймс Франко ва Сет Рогенлар ўйнаган.

Улар ток шоу бошловчиси ва муҳаррири ролларини ижро этишади. Ток шоуга Ким Чен Ин таклиф қилинади ва АҚШ Марказий Жосуслик Хизмати унга суиқасд қилиш учун шоу ижодкорларини ёллайди.

Филм трейлери Youtube порталида эълон қилинган. Трейлерда кўринишича, Шимолий Корея раҳбари ролини Ким Чен Инга ўхшаган актёр ижро этган. Жанг саҳналарида афтидан Шимолий Корея танклари, вертолётлари ва ядровий ракета синовлари пайдо бўлади.

Давлат назоратидаги KCNA ахборот агентлиги Шимолий Корея воизидан иқтибос келтирган: "Бизнинг бош раҳбариятга зиён етказиш фитнасига оид филмни ишлаш ва намойиш этиш террорчиликнинг энг очиқча кўринишидир ва бунга мутлақо тоқат қилинмайди".

Воизнинг қўшимча қилишича, "Қўшма Штатларнинг мулоҳазасиз иғвогарона телбалик билан "безори филм ижодкорини" Шимолий Кореяга раҳбариятига қарши чиқиши халқ ва аскарлар орасида "адоват ва ғазабни кучайтирган".

"Агар Америка маъмурияти филм намойишига рухсат берса ва ҳимоя қилса, шафқатсиз чораларга қўл урилади", дея қўшимча қилади воиз.

Ўтган ҳафта афтидан Шимолий Корея ўз ракета технологиясини янада ривожлантираётгани борасидаги даъволарни дастакловчи далиллар пайдо бўлганди.

Баъзи экспертларнинг айтишларича, улар Шимолий Корея тарғибот филмида қирувчи кемаларга қарши янги ракеталарни аниқлашга муваффақ бўлишган.

Аммо, айрим кузатувчилар бунга шубҳа билан қарашади.

Шимолий Корея уч америкаликни ҳибсда ушлаб турибди. Сўнгги тутилган сайёҳнинг исми Жеффри Эдвард Фоул дейилади. У меҳмонхонада Инжилни эсидан чиқариб қолдирган.

Яқинда "Интервю" филми директорларидан бири Роген Шимолий Кореяга сафар қилган журналистларнинг ҳикояларидан илҳом олганини айтганди.

Шунингдек, у "журналистлар қандай қилиб дунёдаги энг хатарли одамлар билан учрашишлари" ва улар назаран суиқасд уюштириш учун қанчалар қулай вазиятда бўлишлари ҳақида гапирган.

Рогеннинг қўшимча қилишича, филм бошида Ким Чен Ир билан учрашув ҳақида бўлган. Аммо, у 2011 йил вафот этиши ва ўрнини ўғли Ким Чен Ин эгаллаши ортидан сценарий қайта ёзилган.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02