Сочидаги "қўшалоқ ҳожатхона" ҳақида билдирилаётган фикрлар
Би-би-си мухбири томонидан Сочидаги Қишки Олимпия Ўйинлари стадионларидан бирининг ҳожатхонасида олинган суратнинг Twitter да чоп этилиши қизғин баҳсларни келтириб чиқарган.
Стив Розенберг томонидан Сочидаги биатлон марказида олинган суратни Россия мухолифати вакили Алексей Навалний кўриб қолган.
Қўшалоқ ҳожатхона бўлими тасвирланган суратга муносабат билдирар экан, жаноб Навалний Олимпиада ўйингоҳларини қуриш учун ажратилган 59 миллиард доллар не қадар рисоладагидек сарфланганлигини савол остига олган.
"Бу 1.5 миллиард рубл сарфланган Сочидаги Олимпиада Ўйинлари матбуот марказидаги ҳожатхона", дея жаноб Навалний суратни ре-твит қилган.
"Икки ҳожатхонани қуриш - 28 минг рубл. Олимпия Матбуот маркази - 1.5 миллиард рубл. Жаҳон ўнгида шармандалик - бебаҳо", дея шарх қолдирган яна бир фойдаланувчи.
Бошқалар эса бу суратни яқинда Россияда бошланиб кетган бесоқолбозлик ҳақидаги баҳсларга боғлаганлар.
"Бу жинсий озчиликлар ҳуқуқларини қандай тушунишларининг рамзи", дея фикр билдирганлар бор.
Икки унитаз ўртасида фақатгина битта ҳожатхона қоғози ажратилганлигига эътибор берган яна бир киши "Ўтиришдан аввал қоғоз йиртиб олишни унутманг", дея киноя билан маслаҳат берган.
Биатлон марказини қурган ширкат вакили ўз вақтида Интерфакс агентлигига, бу каби иншоот "жаҳондаги энг йириги ва энг қулайи" эканлигини айтганди.
Россиянинг Оврўпо қисмида "умумий" ҳожатхоналар кенг тарқалмаган, лекин бошқа ерларда учратиш мумкин", деб ёзган россиялик журналист Никита Лахачев.
У Россиядаги емакхона ва спорт марказларидаги умумий ҳожатхоналар суратларини tjournal.ru вебсаҳифасида чоп этган.
Би-би-си оператори Макс Ломакин алоҳида бўлмаган ҳожатхона хоналарини Қозон Университетида ҳам суратга олганди.
