"Титаник" скрипкаси кимошди савдосида рекорд баҳога қўйилди
"Титаник" кемаси чўкаётган пайт йўловчиларни тинчлантириш учун ўйналган тарихий скрипка Уилтшир графлигидаги кимошди савдосида сотилиши кутилмоқда.
Скрипкага қўйилган дастлабки 300 минг доллар баҳонинг ўзи уни Титаникнинг энг қимматбаҳо бир бўлагига айлантиради.
Скрипкани созандалар гуруҳи раҳбари Волос Хартлей чалган бўлиб, у кема чўкканда ҳалок бўлган 1517 йўловчидан бири эди.
Аукционист Алан Олдрижнинг айтишича, скрипка Титаникнинг "энг ноёб ва аҳамиятли" тарихий бўлаги саналади.
Олмонияда ишлаб чиқарилган скрипка Волос Хартлей унинг қаллиғи Мария Робинсоннинг совғаси ҳисобланган.
Кимошди савдосига қўйилишдан олдин мусиқа асбобининг мутахассислар ёрдамида ҳақиқийлигини аниқлаб олиш учун Генри Олдриж ва унинг ўғлига роппа роса етти йил керак бўлди.
Ниҳоят март ойида скрипканинг ҳақиқийлиги билдирилади.
Суд-экспертиза мутахассисларга кўра, скрипкада ҳали ҳам денгиз сувининг тузи сақланиб қолган экан.
Бироқ баъзи кишилар скрипканинг ҳақиқийлигига шубҳа билан қараб, денгиз суви таъсирида скрипка ҳозиргача сақланиб қолмаслигини айтишади.
Маълум бўлишича, скрипка жаноб Хартлейнинг қутқарув кийимидаги танасига боғланган бўлиб, теридан қилинган ғилофнинг ичидалиги уни асраб қолган.
Хартлейнинг қаллиғи Мария Робинсоннинг кундалигида ёзилишича, сувдан чиқариб олингач, унга скрипка қайтарилган.
Унинг ўлимидан сўнг эса, маҳаллий ҳарбийнинг қўлига, ундан сўнг 1940 йилларда номи ошкор қилинмаётган ҳозирги эгасининг онасига ўтади.
Кимошди савдоси уйининг хўжайинларига кўра, скрипкага бутун дунёдан коллекционерлар қизиқиш билдиришмоқда.
АҚШдаги кўргазмада тарихий скрипкани уч ой ичида 315 мингдан ортиқ одам томоша қилиб улгурди.
