Cурия инқирози: АҚШ Сенати қўмитаси ҳарбий аралашувни дастаклади

Қўшма Штатлар Сенатининг Ташқи алоқалар қўмитаси Суриядаги кимёвий қурол қўллангани даъво қилинган ҳужумга жавоб сифатида ҳарбий куч ишлатилишини маъқуллади.

Чоршанба куни қўмитанинг 10 аъзоси Президент Обаманинг режасини қўллаб овоз берган, етти сенатор қарши ва бир киши овоз беришдан тийилган.

Эндиликда резолюция лойиҳаси бутун Сенатга тақдим этилади.

Овоз беришнинг келаси ҳафта бўлиб ўтиши кутилмоқда.

Президент Обама Америка ва дунёда Сурияга қарши зарбалар учун имкон қадар кўпроқ дастак олишга ҳаракат қилмоқда.

АҚШ Конгрессида муҳокама қилинаётган резолюция матнида ҳарбий амалиётни 60 кун билан чеклаш ҳақида сўз боради.

Путиннинг мавқеъи ўзгармоқдами?

Сурия инқирози пайшанба куни Санкт Петербург шаҳрида бошланаётган G20- йирик йигирмалик саммити кун тартибига соя солган.

Саноати ривожланган йигрима давлат раҳбарлари расман глобал иқтисодий муаммоларни муҳокама этишлари кутилганди.

Музокаралардан олдин Президент Путин БМТнинг маъқуллашисиз ҳар қандай амалиёт "тажовуз" деб кўрилиши ҳақида огоҳлантирган.

Айни пайтда жаноб Путин БМТ Хавфсизлик Кенгаши ҳарбий аралашувни маъқуллагани тақдирда, Россия Сурияга қарши амалиётни дастаклаши мумкинлигини айтган.

Саммит арафасида Президент Обама гарчи унинг Россия Президенти Владимир Путин билан муносабатлари "боши берк кўчага кириб қолган" бўлса-да, ҳануз Москва Сурия борасидаги мавқеъини ўзгартиришига умид қилаётганини айтган.

АҚШ Президенти Сурия борасида ўзининг эмас, балки жаҳон ҳамжамиятининг обрўйи гаровга қўйилганини таъкидлаган.

Президент Путин Сурия раҳбари Ассаднинг айби БМТ Хавфсизлик Кенгашида исботланиши керак, деб айтган.

Унга кўра, Сурияга ҳарбий аралашув борасидаги қарорни ҳам Хавфсизлик Кенгаши бериши керак.

Президент Обама 21 август куни Дамашқ четида юз берган кимёвий ҳужум учун Президент Ассад масуъл эканини айтган.

Қўшма Штатларга кўра, ҳужумда 1400га яқин инсон ҳалок бўлган.

Ҳодисани текширган БМТнинг қурол-яроғ назоратчилари 15 сентябр куни ўз хулосаларини тақдим этишлари кутилмоқда.

БМТга кўра, Суриядаги инқироз бошидан буён 100 мингдан ортиқ инсон ҳалок бўлган, 2 миллион одам уйларини ташлаб чиққан.