Коронавирус - Хитой карантинни кучайтирди, пуллар дезинфекция қилинмоқда - Xitoy, O'zbekiston
Сурат манбаси, Getty Images
Хитой ҳукумати коронавирус (Covid-19) тарқаган Хубэй вилояти аҳолиси учун карантин шартларини кучайтирган.
60 миллион одамга, фавқулодда зарурат бўлмагани тақдирда, уйдан ташқарига чиқиш тақиқланган.
16 феврал куни Хитойда коронавирусдан 107 киши вафот этган, шанба куни эса 139 ўлим ҳолати қайд этилган.
Эпидемия бошидан буён ўлган хитойликлар сони 1771 кишига етган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Хитой ҳукумати вирусни юқтириш ва ўлим ҳолатлари пасаяётганини айтиб, вазият назорат остида эканини таъкидлашмоқда.
Хубэйда оиланинг фақат бир аъзосига уч кунда бир марта озиқ-овқат ва дори-дармон харид қилиш учун уйдан чиқишга рухсат этилган.
Дорихона, меҳмонхона ва поликлиникалардан ташқари барча ташкилот, корхона ва муассасалар ёпилади.
Барча харидор ва мижозларнинг тана ҳароратлари мажбурий тарзда ўлчанади.
Хусусий автомобил, мотоцикл ва велосипед эгаларига номаълум муддатга улардан фойдаланиш тақиқланади.
Фақат хизмат ва фавқулодда хизматлар - тез тиббий ёрдам, ўт ўчириш ҳамда зарур воситалар етказаётган юк машиналарининг юришига рухсат этилган.
Расмийларга кўра, тартибни бузганлар 10 кунга қамалади.
Пекинда ҳокимият шаҳарга қайтаётганларни икки кунлик мажбурий карантинга юбормоқда.
Карантиндан ўтмаганларни жазо кутади.
Сурат манбаси, Reuters
Уханга қўшни 5 миллион аҳолиси бўлган Сяоган шаҳрида эса ҳокимият аҳолининг уйдан чиқишини бутунлай тақиқлаган. Хабар қилинишича, озиқ-овқат ва дори-дармон уйларга етказиб берилади.
Айни пайтда Япониянинг Йокогама бандаргоҳи яқинида карантин қилинган "Олмос малика" круиз кемасида коранавирусни юқтирган йўловчилар сони 355 кишига етган.
Бу Хитой чегараларидан ташқаридаги энг катта вирус тарқалиш ҳолатидир.
300 дан ортиқ АҚШ фуқароларининг кемани тарк этишига рухсат берилган. Улар орасидан коронавирусни юқтирган 40 нафари Япония шифохоналарига юборилган.
АҚШ Давлат департаментининг хабарида айтилишича, қолган йўловчилар иккита учоқда Токиодан Америкага учган.
Парвоз вақтида яна 14 кишида коронавирус аниқланган ва улар бошқа йўловчилардан ажратилган.
Йўловчилар АҚШга етиб боргач, икки ҳафта карантин қилинади, кемадаги карантин вақти ҳисобланмайди.
Айрим америкаликлар икки ҳафталик карантин вақти тугагунича, 19 февралга қадар кемада қолишга қарор қилганлар.
Исроил, Канада ва Австралия ҳам кемадаги фуқароларини эвакуация қилиш режасини эълон қилган.
Коронавирус ҳозирнинг ўзида Япония ва Сингапур каби давлатларнинг иқтисодига тасир ўтказган.
Сабаби эпидемия сайёҳлар оқими ҳамда таъминот йўлларига таъсир қилган.
Хитой марказий банки эса коронавирусга қарши кураш мақсадида банкнотларни қайта муомалага чиқаришдан аввал дезинфекция қилаётганини билдирган.
Ўзбекистон расмийлари ҳозирга қадар мамлакатда коронавирус тарқалиши ҳолати аниқланмагани ва барча профилактика чоралари кўрилаётганини таъкидлашган.
Маҳаллий дорихоналарда тиббий ниқоблар бир неча баробар қиммат сотилаётгани ва тугаб қолгани сингари ҳолатлар ҳақида хабар қилинган.
Ўзбекистон ҳукумати ўтган ҳафта ҳарбий транспрорт самолётида Хитойга тиббий ёрдам жўнатган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: @bbcuzbek
