Дунё, янгиликлар: Назарбоев кимни тишлади ва Хо Ши Мин нимани васият қилган эди?

Назарбоев набираси полицияга ҳужум қилишда айбланмоқда

Қозоғистон собиқ президенти Нурсултон Назарбоевнинг 28 ёшли набираси Айсултон Назарбоев наркотик модда таъсири остида Лондон полициясига ҳужум қилиб, ходимлардан бирини тишлаб олишда айбланмоқда.

Собиқ президентнинг тўнғич қизи Дариға Назарбоеванинг ўғли бўлмиш Айсултон Британия Қироллик ҳарбий академияси битирувчиси ҳисобланади.

4 июль куни ёш Назарбоевга нисбатан илгари сурилаётган айблов бўйича дастлабки тинглов маҳкамаси бошланган, аммо Айсултон, ҳозирча, барча айбловларни рад этмоқда.

Қораловчи томоннинг таъкидлашича, Айсултон Назарбоев 3 июнь куни Лондон марказидаги меҳмонхоналардан бирида тўполон кўтарган, балконга чиқиб олиб, ўзини ташлашини айтиб бақирган.

Сўнг ўхшаш ҳолат шаҳар марказидаги квартиралардан бирида яна такрорланган ва Айсултон қўшнилар чақирган полициячилардан бирига ташланиб, унинг кўкрагига зарба берган ва чап қўлини тишлаб олган.

Қораловчи томон «Қозоқ ҳукумати вакилларидан кимдир» полицияга қўнғироқ қилгани ва ишни «бости-бости» қилишга урингани, лекин полициячилар бундай таклифдан бош тортганини билдирган.

Айсултон Назарбоевнинг ўзи 2017 йилда отаси Роҳат Алиевнинг ўлими ортидан наркотик моддаларга берилиб қолганини тан олган эди. Президент куёви Роҳат Алиев Қозоғистондан Австрияга қочиб кетиб, ҳибсхонада сирли ҳолатда оламдан ўтган эди.

Адвокат мижозининг гиёҳванд эканини тан олган ва судья кенжа Назарбоевни гаров эвазига, аммо клиникага ётиш шарти билан озод этишга рози бўлган.

Айсултон ва унинг атрофидаги одамларнинг эндиликдаги вазифаси клиник реабилитация заруриятини исботлашдир, йўқса, президент набираси яна ҳибсда қолаверади.

Дунё, янгиликлар: Шайх ўлими, яна Трамп, фоҳишалар ва урушқоқ АҚШ

Вашингтонда «Трамп Паради» бўлиб ўтди

АҚШ президенти Доналд Трамп 4 июль - Мустақиллик Кунига бағишлаб ҳарбий парад уюштирди.

Парадда бир неча ҳарбий самолёт ва танклар иштирок этган. Мустақиллик Куни ҳали бундай тарзда ўтказилмагани айтилмоқда ва танқидчилар жаноб Трампни бюджет пулини совуриш ҳамда байрамни сиёсийлаштиришда айбламоқда.

Парадни ташкил этишга қанча маблағ сарфлангани расман айтилмаган бўлсада, айрим хабарларда $2.5 миллион ажратилгани билдирилади.

Катта оломон қаршисида сўзга чиққан президент Трамп ҳарбийларни мамлакат учун қилган хизматларини олқишлаган.

Жаноб Трамп пулни беҳуда совуриш ва байрам кунларини сиёсийлаштиришда илк бор айбланмаётир. Ўтган йилнинг ноябрь ойида президентнинг Ветеранлар Кунига бағишланган ҳарбий паради режаси $92 миллионга тушиши аён бўлгандан сўнг бекор қилинган эди.

Беқарорлик: Президент Трамп Эронга ҳужум бошлаш қарорини бериб, яна фикридан қайтдими?

Вьетнамда Хо Ши Мин танасини сақлаш учун илмий кенгаш тузилади

Вьетнам мамлакатни 1945 йилдан 1969 йилга қадар бошқарган миллий етакчи Хо Ши Миннинг бальзамланган танасини сақлаб қолиш йўлида халқаро илмий кенгаш тузилажагини эълон қилди.

1969 йил 2 сентябрда оламдан ўтган миллий етакчининг танасини бальзамлашга совет олимлари ёрдам берган эди. Ўшандан бери пойтахт Ханойдаги мақбарада сақланиб келинаётган тана доимий эътибор ва вақти-вақти билан бальзамланишни талаб этади.

Совет Иттифоқи парчаланиб кетгандан сўнг вьетнамликлар Москвадан танани сақлаш бўйича бепул кўмак олиш имкониятидан маҳрум бўлган эди.

Аслида, Хо Ши Мин ўзининг 1968 йилда ёзган васиятномасида танасини ёқиб юборилиши ва қолган кулни уч қисмга бўлиб, мамлакатнинг уч ҳудудидаги тепаликларга кўмилиши, дафн жойида бирор ҳайкал бўлмаслиги, ўрнига унинг атрофи ўрмонга айлантирилишини исташини билдирган. Бироқ васиятноманинг бу қисми фақат 1989 йилдагина оммага эълон қилинган.

Ўша йили Вьетнам Политбюроси «халқ ва армиянинг истаги ҳамда ҳиссиётига мувофиқ» Хо Ши Миннинг танасини узоқ йилларга сақлаб қолиш қарори олинганини маълум қилган.

Эрон ва Британия танкер туфайли жанжаллашмоқда

Буюк Британия ҳарбий денгизчилари Гибралтар ҳукуматига Гибралтардан ўтаётган Эрон нефть танкерини қўлга олишда ёрдам бериши ортидан Теҳрон ва Лондон ўртасида дипломатик совуқчилик юзага келган.

Ҳодиса ортидан Эрон расмийлари Теҳрондаги Британия элчисини чақириб, ҳолат юзасидан унга шикоят қилганлар.

Испания ташқи ишлар вазири танкернинг АҚШ сўрови билан қўлга олинганини билдирган. Айтилишича, танкер Европа Иттифоқи санкциялари талабларига зид равишда Сурия томон кетаётган бўлган.

Эрон ташқи ишлар вазирлиги вакили танкернинг ҳибсга олинишини «қароқчиликнинг бир кўриниши» дея баҳолаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek