Беқарорлик: Президент Трамп Эронга ҳужум бошлаш қарорини бериб, яна фикридан қайтдими?

Доналд Трамп пайшанба куни Эронга қарши жавобий ҳужумга розилик берган, аммо орадан кўп ўтмай қароридан воз кечган.

Бу ҳақда Америка матбуоти хабар бермоқда.

The New York Times Оқ Уйдаги юқори лавозимли мулозимларга таяниб хабар беришича, ҳужумлар "бир неча" нишонларга қарши режаланган бўлган.

Уларнинг айтишларича, махсус амалиёт "эндигина бошланган" бўлган ва Трамп Америка ҳарбийларига бу амалиётни тўхтатиш буйруғини берган.

Оқ Уй бу хабарларга муносабат билдиргани йўқ.

Америка Қўшма Штатлари ва Эрон ўртасида уруш бўладими?

Эрон ядро дастури шартномаси: Трампнинг шартномадан чиқиш қарори қандай оқибатларга олиб келади?

Аввалроқ Эрон Американинг дрон учоғини уриб туширгани ҳақида маълум қилганди.

Теҳроннинг даъво қилишича, дрон Эрон ҳаво ҳудудига кирган, аммо Вашингтон ўз учоғи халқаро ҳаво ҳудудида уриб туширилганини айтади.

Икки мамлакат ўртасидаги муносабатлар Форс кўрфазида нефт танкерларига ҳужумдан кейин таранглашиб кетган.

Вашингтон айни ҳужумларда Теҳронни айблайди.

Теҳрон эса бу даъволарни рад этмоқда.

Ўтган йил АҚШ Эроннинг ядро дастурига оид битимдан чиқиб кетганди.

Барак Обама даврида эришилган битим Теҳроннинг ядро дастурини жиловлашга қаратилган эди.

Би-би-си таҳлилчиси Жонатан Маркусга кўра, агар Трамп Эронга қарши ҳужум буйруғини бериб, кейин уни бекор қилган бўлса ҳам бу Теҳрон учун жиддий огоҳлантиришдир.

Иккала мамлакат ҳарбий зиддият ёқасига келиб қолган.

Теҳрон ҳам АҚШ дронини уриб тушириш билан ўзига хос огоҳлантирув йўллаган эди.

Аввалига Теҳроннинг айни амалини писанд қилмаган Трамп кейин фикрини ўзгартирган кўринади.

Аммо муаммо шундаки, Трампнинг беқарорлиги энди Теҳрондаги айрим мулозимларни руҳлантириши мумкин.

Бу эса Теҳрон яна ҳам ўжарроқ ўйинчига айланиш эҳтимоли бор.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek