МК: 'Қотил аёл руҳий касал бўлган'

"Ўз қарамоғидаги қизалоқнинг бошини кесган энага 15 йилдан бери шизофрениянинг оғир кўринишидан азият чекиб келган".

"Московский комсомолец" нашри Россияни ларзага солган қотиллик юзасидан ўтказган ўз текшируви ортидан ана шундай хулосага келган.

Газета вакиллари Ўзбекистонга қўнғироқ қилиб, қотилликда айбланаётган Гулчеҳра Бобоқулова яшаган қишлоқ билан ҳам боғланишгани ҳақида ёзишмоқда.

"У рўйхатда туради ва ҳар баҳор шифохонада даволаниб чиқади" - аёлнинг қишлоқ шифокоридан иқтибос келтиради газета.

Нашрга кўра, Ўзбекистон ҳуқуқ-тартибот идоралари ҳам аёлнинг қариндошларини сўроқ қилишган.

Гулчеҳра Бобоқулованинг яқинлари бу мудҳиш жиноятдан даҳшатга тушишган, бироқ унинг оғир руҳий касалликка чалингани сабаблими, қаттиқ ҳайратланишмаган.

Россия нашри, шунингдек, унинг касали баҳорда қўзиб туришини, айнан касаллиги туфайли бир неча йилдан бери эри билан ҳам яшамаганини ёзади.

"Московский комсомолец" гаплашган маҳаллий нозир унинг касали йил сайин кучайиб борганини билдирган.

"Бир марта уни икки йил касалхонада тутиб туришганди, афтидан, аҳволи жиддий бўлган" - маҳалла нозиридан иқтибос келтирган газета.

Нашр, шунингдек, Гулчеҳра Бобоқулованинг байрамларда Ўзбекистонга бориб турганини, уч нафар фарзанди борлигини ёзади.

"Московский комсомолец"га кўра, аёл ўз касаллигини бошқалардан яшириб, Россияга кетган бўлиши мумкин.

Кеча душанба, 29 феврал куни Москвадаги метро бекати яқинида кўлида ёш қизчанинг кесилган калласини кўтариб, "Оллоҳу Акбар!" дея қичқириб юрган аёл ушланганди.

Расмийларга кўра, Гулчеҳра Бобоқулова исмли самарқандлик аёл ўзи энагалик қилган оиладаги 4 яшар қизалоқни ўлдириб, бошини танидан жудо қилган, уйга ўт қўйган ва қизалоқ калласини олиб кўчага чиққан.

Россия нашрлари макзкур воқеани ёзишган бўлсалар-да, воқеага миллий ёки диний тус берилгани йўқ. Айрим телеканалларлар эса бу борада хабар ҳам беришмаган.

Миллатчилар ғазабланиб, Марказий Осиё давлатлари фуқароларига нисбатан виза тизими жорий этиш керак, деган талабларни илгари суришмоқда.

Бироқ Кремль расмийлари айни мудҳиш жиноят миллий масалага умуман боғлиқ эмаслигини таъкидлашган.