Гулнора Каримовани туғилган куни билан табриклашмоқда

Гулнора Каримованинг туғилган кунида ижтимой тармоқ фойдаланувчилари президентнинг омма кўзидан ғойиб бўлган қизини табриклаб Твиттер ва Инстаграм тармоқларида ўз изоҳларини қолдираяптилар.

Каримова хоним уй ҳибсида сақланаётганига 500 кундан ошди ва баъзи инсон ҳуқуқлари фаоллари, хусусан Ҳюман Райтс Вотчнинг Оврўпо матбуоти бўйича директори Андрю Штролайн унинг уй ҳибсидан озод этилиши ва унга маҳкамада ўзини ҳимоя қилиш ҳуқуқи берилишига чақирганлар.

Оврўпо ва АҚШдаги бир неча коррупцияга боғлиқ ишларда президент Каримовнинг тўнғич қизи Гулнора Каримованинг номи ҳам келтирилади.

Каримова хоним, Wikileaks ошкор қилган АҚШ дипломатлари ёзишмаларида "Ўзбекистондаги энг нафратланилган шахс" ўлароқ тасвирланган.

Инстаграмда таниқли актёр Умид Искандаров Гулнора Каримованинг суратини чоп қилиб "С днем рождения опажон!!" дея изоҳ берган. Сурат 700дан ортиқ "like" тўплади ва унинг остида кўплаб бошқа инстаграмчилар ўз тилакларини ёзиб қолдиришди.

Суратнинг қачон ва қаерда олингани номаълум.

Твиттерда блоггерлар орасида яхши танилган ва ўз вақтида парламент сайловларида ўз номзодлигини илгари сурган Хушнуд Худайбердиев (@xushnudbeck) ёшлар орасида "Опа" дея танилган Каримова ҳақида қуйидагича твитлар ёзди:

"Аяжоним доим айтадилар, ўғлим, мабодо қачондир мемориал асар ёзсанг, унда албатта Опага алоҳида бўлим ажрат, қилган яхшиликларини унутмагин. Ҳақиқатдан, Опанинг яхшиликларини унутиб бўлмайди. Гап фақат мен учун 6 йил контракт тўлаганликларида эмас, маънавий поддержкаларида ҳам. ФФ (Фонд Форум)да ўтган даврим, шахс сифатида шаклланишимдаги энг муҳим даврлардан бири бўлган. Бунда Опанинг роли жуда катта. Улар доим ўрнак бўлганлар".

Унга жавобан @Okaginam шундай жавоб қолдирган: "6 йил контракт?! Эна деворсангам бўлувраркан ука...".

Твиттерда фаол бўлган @_ELBEK_STUDIO қуйидагича қўшимча қилди: "Бу киссадан у киссага солганлар, холос".

@hikmatullau номли твиттерчи Гулнора Каримовани табриклай туриб, ўз соғинчини изҳор қилди: "Ҳурматли Гулнора Исломовна! Туғилган кунингиз муборак бўлсин! Биз ҳаммамиз сизни севамиз, биз сизни жуда соғиндик".

Айни дамда у инстаграмда ҳам табрикларини қолдирди: "Қадрли Гулнора Исломовна! Туғилган кунингиз билан табриклайман, сизга бахт ва саломатлик тилайман! Биз сизни жудаям соғиндик! Ҳар доим шундай гўзал бўлиб юринг, юзингиздан таббасум аримасин!"

olimxuja_azimov пости қуйидагича: "Гулнора Каримова, сизни 43 ёшни қарши олганингиз билан табриклаймиз. Ҳозирги кунда сиз ҳақингизда гапирилмаётган бўлса-да, қалблар сизга дуода, ҳаёллар сиз билан ва ширин ҳиссиётлар сизни қўмсамоқда, бу ҳаммага аён. Ҳозирги кунда сизнинг улкан лойиҳаларингиздан кўпчилик андоза олишга уринмоқда, лекин, натижа арзимас "Хитойнинг матохи" эканлиги ҳаммага маълум... Сиз борлигингиз учун раҳмат, туғилган кунингиз муборак бўлсин".

"mc_shurik" эса Гулнора Каримованинг тез кунларда "қайтиш"ига ишонч билдирган: "GooGoosha тез кунларда қайтинг. Иншоллоҳ у тез кунда қайтади".

Инстаграмчи "adolat_nazarova" Каримованинг таваллуд кунига қандай тайёргарлик бўлганини хотирлайди: Ҳар йили бу кунга қандай тайёргарлик қилганимиз эсимда... Туғилган кунингиз муборак бўлсин, Гулнора Исломовна! #fundforum билан ўтган мўъжизакор йиллар учун сизга раҳмат. Яхши хотиралар учун раҳмат!"

2014 йил бошида Гулнора Каримова "иҳоталаб қўйилганидан" бери унга алоқадар бўлган бизнеслар, хусусан кўплаб ёшларни ўз қаноти остига олган "Фонд Форум" хайрия ташкилоти фаолияти тақа-тақ тўхтади.

Бир пайтлар АҚШ дипломатик ёзишмаларида мамлакатдаги "энг нафратланилган шахс" ўлароқ таърифланган Каримова хоним ўз отаси назаридан тушгани, бунинг оқибати, бизнесларининг бирин кетин йўқ қилиниши, ТВ станцияларининг ёпилиши, ўз тарафдорларининг ҳибс қилиниши, хайрия фаолияти тўхталиши ҳақида Тwitter орқали дунёни огоҳ қилиб турарди, бирой уй ҳибсига тушганидан бери у Твиттердан йўқолган.

2014 йил 16 феврал куни унинг Twitter ҳисоби ишламай қолди. Унинг сўнгги твити Ўзбекистон хавфсизлик ходимлари Гулноранинг Тошкентдаги люкс хонадонига бостириб киришидан бир кун аввал битилганди.

Гулнора Каримованинг телеком бизнесидаги йирик коррупцияга алоқадорлиги қатор Оврўпо давлатлари ва АҚШда тергов қилинмоқда. Ўзбекистонда эса унинг энг яқин шериклари - ўнг қўли деб билинган Гаянэ Авакян ва турмуш ўртоғи Рустам Мадумаровлар қамалган.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.

Instagram – BBC UZBEK

Twitter – BBC UZBEK

Odnoklassniki – BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio