UzWebiston: Йўлкирага пул топилмагани учун автомобил олиб қочилган
Самарқандлик кишининг ўғирлаб кетилган дея ҳисобланган Nexia русумли автомашинаси шаҳарга туташ Самарқанд туманидан топилган.
Ўзбекистон Ички Ишлар Вазирлигининг “На посту” газетаси хабарига кўра, автомобил ҳеч бир зарар келтирилмаган.
Тезкор-қидирув ишлари натижасида автомобилни олиб қочган шахс қўлга олинган.
У Самарқанд вилоятининг Оқдарё туманида истиқомат қилувчи 44 ёшли киши экан. Бу одам машинани ўғирлаш нияти бўлмагани, лекин манзилига тезроқ етиб олиш учун йўлкираси йўқлиги боис машинани ҳайдаб кетганини айтган.
Кейинги кунларда Ўзбекистоннинг турли томонларида машиналарни олиб қочиш борасидаги ҳодисалар ҳақида матбуот хабарлари кўпайган. Биргина «Постда» газетаси ва kun. uz вебсайтида айни шу мавзуда бир неча хабар берилган.
Жумладан, Хоразм вилояти Янгиариқ тумани ички ишлар бўлимига маҳаллий фуқародан “ВАЗ-2103” русумли “Жигули” автомашинаси ўғирлангани ҳақида ариза келиб тушган.
Жабрланувчининг сўзларига қараганда, у қисқа муддатга дўконга кириб чиққунича машинаси ғойиб бўлган. Кўрилган чоралар натижасида автомобил вилоятнинг Урганч туманидан топилган.
Машинани олиб қочган шахснинг ҳеч қаерда ишламайдиган 26 ёшли фуқаро эканлиги аниқланган. «У ўз айбига иқрор бўлиб, “сайр қилгиси келгани сабаб” машинани олиб қочганини айтди”, – дейилади хабарда.
Тунда Nexia русумли автомашинасини “Шаҳристон” ресторани олдида қаровсиз қолдирган Юнусобод туманида истиқомат қилувчи фуқаро унинг йўқлигини кўриб, тахта бўлиб колган.
“Постда” газетаси ёзишича, Тошкент вилоятининг Зангиота туманида истиқомат қилувчи фуқаро пайт пойлаб туриб, машинани олиб қочган бўлган.
Шахрихонлик фуқаронинг Damas автомашинасига ўтирган йўловчи эса, ҳайдовчининг 590 минг сўм пулини ўғирлаб тушиб кетган.
Пул ўғрисининг Асака туманида яшайдиган киши эканлиги аниқланган ва унга нисбатан жиноий иш қўзғатилган.
Жиззах вилоятининг Пахтакор тумани қишлоқларидан бирида яшайдиган кишининг ҳовлисидан беш бош қорамол ўғирлаб кетилган.
Мол ўғрилари жабрланувчининг маҳалласида яшайдиган кишилар эканлиги аниқланган. Уларнинг бири эркак, иккинчиси аёл экан.
Kun.uz сайтига кўра, Фарғона шаҳрида яшайдиган киши элликдан ошган аёлнинг бўйнидан тилла занжирини юлиб қочган. 32 ёшли бу йўлтўсар ўғри аёлнинг ўз қариндоши эканлиги аниқланган.
Хабар беришларича, ҳозирда ушбу ҳолат юзасидан тергов ишлари олиб борилмоқда.
Маҳаллий журналистнинг айтишича, Ўзбекистонда айни қиш фаслида ўғирликнинг авж олишига яқинда мамлакатда амалга оширилган авф боис кўп сонли ўғриларнинг озодликка чиқарилиши сабаб бўлган. Лекин маҳаллий таҳлилчилар ўғирлик ҳоллари кўпайишига ишсизлик ва қора қозон қайнатиш учун етарли маош олинмаслик ҳам сабаб бўлаётганини таъкидлашмоқда.
Би-би-си Ўзбек хизмати билан Whatsapp орқали боғланишни истасангиз телефонимиз - +44 7858 860002
