Ўзбекистон Ҳаво йўллари чипталарни хорижий валютага сота бошлашини маълум қилди

Ўзбекистон Ҳаво Йўллари ширкати 15 июлдан бошлаб хорижий йўналишлар бўйича учадиган парвозлар учун чипталар хорижий валютада сотила бошлашини маълум қилди.

Ширкат вебсаҳифасида ҳозирча хорижий валютада савдо қилиш фақат Россияга учадиган парвозларга таалуқли эканлиги айтилган.

Бошқа йўналишдаги парвозлар борасида кейинчалик қўшимча маълумот берилишини билдирилган.

2013 йил 1 февралидан Ўзбекистонда кучга кирган янги тартибга мувофиқ, банкларга жисмоний шахсларга нақд валюта сотиш тақиқланганди.

Шунинг учун оддий фуқаролар хорижий валютани давлат курсида сотиб олиш имконидан маҳрумлар.

Лекин Ўзбекистон Ҳаво Йўллари ширкатининг матбуот котибига кўра, хорижга учувчилар учун чипталарнинг долларда сотилиши Ўзбекистон Ҳаво Йўлларининг мижозларини камайтирмайди.

Ҳукумат қарори билан Ўзбекистон Ҳаво Йўлларининг хориж йўналишга чипта сотиш хабари интернет фойдаланувчиларининг кескин муносабатларига сабаб бўлган.

Ўзбекистон ҳаво йўллари ширкати матбуот котиби Феруза Қурбанованинг Би-би-сига айтишича, хорижга учиш учун ширкат чипталарининг фақат долларда сотилиши мижозларнинг камайиб ёда кўпайиб кетишига сабаб бўлмайди.

Унга кўра чипталар давлат курсида сотилади.

"Чипталар давлат курсидаги нархдаги валютада сотилади", - дейди Феруза Қурбонова.

Тошкентдаги авиакассалар берган маълумотларга кўра, чипталар долларда сотилган тақдирда бошқа ширкатларнинг чиптаси Ўзбекистон Ҳаво Йўлларига қараганда арзонроққа тушиши маълум бўлди.

Мисол учун Тошкент- Москва-Тошкент чиптаси ўзбек ширкатида Душанба кунидан бошлаб 560 доллардан сотилади. Россиянинг "Аэрофлот" ширкатидан эса 531долларга олиш мумкин.

Ҳозирча Ўзбек Ҳаво Йўллари чипталари хориж валютасига 15 июлдан бошлаб фақат Россия йўналишида долларга сотилиши билдирилган. Бошқа хориж йўналишларига чипталар савдоси ҳақида кечроқ қўшимча маълумот берилиши айтилган.

"Биза бирор аниқ кўрсатма келгани йўқ. Ўзимиз ҳам хайрон бўлиб ўтирибмиз. Ҳозирча Россияга долларда сотасизлар дейилган", - деб айтди Тошкентдаги авиакассалардан бири ходимаси.

Бироқ Ўзбекистон ҳаво йўллари ширкатининг расмий веб саҳифасида, миллий валютада чипта олиш ҳуқуқи бўлган саккизта тоифа келтириб ўтилган.

Уруш фахрийлари, 1-2 гуруҳ ногиронлари билан бирга хорижга даволаниш учун кетаётган шахслар Вазирликдан махсус маълумотнома олган тақдирда ва таъзия муносабати билан кетаётганлар сўмда чипта олишлари мумкин.

Ушбу қарор Интернетдаги ижтимоий тармоқларда кенг муҳокамага сабаб бўлмоқда.

Бир фойдаланувчи, "ўзингнинг сўмингни ўзингникилар олмагандан кейин бошқалар уни оёқости қилиши турган гап. Сиёсий тўраларининг бунга муносабатини кутамиз. Халқнинг бўлаги сифатида бу қарорга келганларнинг отасини "эслаб" қўяман", дейди.

"Йўловчилар сони кескин кўтариши кутилган қўшни давлатарнинг авиалинияларини қўллаймиз. Яна қозоқлар миннатдорчилик учун бирортасининг портретини осишади", дейди йўловчиларнинг бошқа авиаширкатларга кетиб қолишига шаъма қилиб яна бир фойдаланувчи фойдаланувчи.

Фикр қолдирувчилар ушбу ўзгаришлардан кейин Ўзбекистон Ҳаво Йўллари ширкати чипталари нархи 32 фоизга ҳеч қандай изоҳларсиз кўтарилиб кетишидан норози бўлмоқда.

Кузатувчилар ўзбек сўмининг йилдан йилга қадрсизланиши шу каби қарорларда яққол кўриниб қолганини айтишади.

Бунгача Ўзбекистонда ишлаб чиқариладиган машиналарни чет эл валютасида сотиш йўлга қўйилган эди.

Кейинчалик хорижлик авиа ширкатлар Ўзбекистонда топган пулларини конвертация қилишда муаммога дуч келавергач, ушбу ширкатларга чипталарни долларда сотишга рухсат берилди.