Ўзбекистон: Чегаралар ёпилди ва қайси машҳур хонанда қамоққа олинди? - янгиликлар

Ўзбекистон 2021 йил 10 январга қадар саккиз хорижий мамлакат билан халқаро авиаалоқаларни тўхтатишга қарор қилди. 25 декабрдан бошлаб Ўзбекистонга кириб келаётган шахслар коронавирус антигенини аниқлаш учун экспресс тест топширади. Ўзбекистон Россияга ишлашга кетаётган фуқароларини эмлаш учун 1 миллион дозада Спутник V вакцинасини сотиб олмоқчи. Бир қатор маҳаллий нашрлар хонанда Ж. У. вояга етмаган қизнинг номусига тегишда гумонланиб, қамоққа олингани ҳақида ёзган.

Мазкур муддатгача Буюк Британия, Италия, Германия, Дания, Австрия, Австралия, Нидерландия ва Жанубий Африка Республикаси билан халқаро авиарейслар тўхтатиб турилади.

Республика махсус комиссияси 22 декабрь куни шундай баёнот билан чиққан.

Баёнотда ушбу мамлакатларга нисбатан чегараларнинг ёпилаётганига сабаб сифатида коронавируснинг янги турининг шиддат билан тарқалиб бораётгани кўрсатилган.

Шунингдек, саккиз мамлакат фуқаролари билан бир қаторда 14 кун давомида мазкур давлатларда бўлган учинчи давлат фуқаролари ҳам 10 январга қадар Ўзбекистонга киритилмаслиги маълум қилинмоқда.

Республика махсус комиссияси эпидемиологик вазият барқарорлашгач, чекловлар босқичма-босқич бекор қилинишини билдирган.

Бундан бироз аввал 40 дан зиёд мамлакат коронавируснинг мутацияга учраган тури тарқалиб бораётган Буюк Британия билан қатновларни тўхтатган эди.

Мутахассислар вирусда кузатилган ўзгариш унинг тарқалишини 70 фоизгача тезлаштириши мумкинлигини айтмоқдалар.

Ўз ҳисобидан экспресс тест

25 декабрдан бошлаб Ўзбекистонга кириб келаётган шахслар коронавирус антигенини аниқлаш учун экспресс тест топширади.

21 декабрь куни Республика махсус комиссиясининг бу борадаги қарори эълон қилинган.

Янги тартибга кўра, экспресс тест аэропортларда, темир йўл вокзалларида ва чегара пунктларида Ўзбекистонга келувчиларнинг ўз ҳисобидан амалга оширилади.

COVID-19'га топширилган ПЗР тестининг манфий натижаси тўғрисида маълумотномага эга шахслардан ҳам экспресс тест олинади.

Агар тест натижалари мусбат чиқса, келувчилар шифохонага жойлаштирилади ёки уй шароитида даволанишга йўналтирилади.

1 миллион мигрант эмланади

Ўзбекистон Россияга ишлашга кетаётган фуқароларини эмлаш учун 1 миллион дозада Спутник V вакцинасини сотиб олмоқчи.

21 декабрь куни Россиянинг Ўзбекистондаги элчиси Владимир Тюрденев икки ўртада бу борада битим имзоланганини маълум қилди, дея ёзмоқда Gazeta.uz нашри.

4 декабрь куни Россияда ишлаб чиқилган Спутник V вакцинасининг илк намуналари Ўзбекистонга олиб келингани хабар қилинган эди.

"АЭС бўйича шартнома тайёр"

Шунингдек, Gazeta.uz 21 декабрь куни элчи Тюрденев атом электр станциясини қуриш бўйича Ўзбекистон ва Россия ўртасида "шартнома деярли тайёрлаб бўлингани"ни маълум қилгани ҳақида ёзган.

Россия элчиси айни вақтда томонлар лойиҳани амалга оширишнинг техник жиҳатларини ҳал этиш устида ишлаётганини қўшимча қилган.

2019 йил сентябрь ойида Россия томонидан АЭС қурилишига масъул бўлган "Росатом" корпорацияси раҳбари Алексей Лихачёв йил охирига қадар асосий шартномани имзолаш ва қурилиш майдонида 2020 йил бошидан ишларни бошлаш режалаштирилаётгани ҳақида гапирган эди.

2018 йилнинг октябрь ойида президентлар Шавкат Мирзиёев ва Владимир Путин Ўзбекистонда биринчи атом электр станциясини қуриш лойиҳасига старт беришган.

Ўзбекистон расмийлари электр станцияни қуриш ишлари 2022 йилдан бошланишини маълум қилган.

Баҳсларга сабаб бўлган АЭСни қуриш учун Жиззах вилоятидаги Тузкон кўлига яқин майдон танлаб олинган.

11 ойда 10 миллион мурожаат

2020 йилнинг 11 ойи давомида "тез ёрдам" хизматига 10 миллиондан ортиқ мурожаат келиб тушган.

Бу ҳақда Соғлиқни сақлаш вазирлиги хабар бермоқда.

Вазирлик энг кўп чақириқлар Фарғона, Андижон, Тошкент вилоятлари ва пойтахтда (1 миллиондан ортиқ), энг кам мурожаат Навоий вилоятида (297 мингдан ортиқ) кузатилганини маълум қилган.

ССВ мурожаатлар сонининг сезиларли ошгани сабабини коронавирус пандемияси билан боғлаган.

Қўшимча қилинишича, 2019 йил давомида "103" хизмати 10 миллионга яқин чақириқ қабул қилган.

Таниқли хонанда қамоққа олиндими?

Бир қатор маҳаллий нашрлар машҳур хонанда Ж. У. вояга етмаган қизнинг номусига тегишда гумонланиб, қамоққа олингани ҳақида ёзган.

Маҳаллий матбуот октябрь ойида эстрада хонандаси билан боғлиқ ушбу ҳолат юзасидан жиноят иши очилганини хабар қилган эди.

21 октябрь куни Самарқанд вилоят прокуратураси "тўпланган далиллар асосида хонанда Ж.У.га нисбатан" Жиноят кодексининг 118-моддаси (Номусга тегиш) 3-қисми "а" банди билан айблов эълон қилингани ҳамда суд ажримига асосан унга нисбатан қамоқ эҳтиёт чораси қўлланилганини маълум қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek