Британия депутати Ўзбекистон сайловлари ҳақида: “Номзодлар президентни қўллайдиган номзодлар бўлса-да, сифатига қараб керагини танлашингиз мумкин”
Британиянинг собиқ ташқи ишлар вазири ўринбосари, депутат Сэр Алан Данкан шу кунларда Тошкентга сафар қилиши кутиляпти.
У 22 декабрда Ўзбекистонда бўлиб ўтадиган парламент сайловларига хорижий кузатувчи сифатида баҳо беради.
Ўтган жума Лондондаги Ўзбекистон элчихонасида мазкур сайловларга тайёргарлик хусусида ҳисобот берилди.
Тадбир ҳайъати аъзоси сифатида иштирок этган Алан Данканнинг айтишича, Ўзбекистондаги сиёсий ўзгаришлар тўғри йўлда кетмоқда.
Дунёдаги энг кўҳна парламентлардан бўлмиш Британия парламентида Ўзбекистон нимани ўрганиши мумкинлиги сўралганда, Сэр Алан британ тизими ҳам мукаммал эмаслигини айтди.
"Бизнинг парламентга сайловлар юзлаб асрлар оша ўтказиб келинган. Ўзбекистон эса ўз тарихининг ўзгача босқичида. У ўзига мос тизимни шакллантиришга ҳақли", - дейди британ депутати.
Сэр Алан Данкан 2016 йил 15 июлдан жорий йилнинг 22 июлигача Британия ташқи ишлар вазирининг ўринбосари бўлиб фаолият юритган.
У мазкур лавозимда Ўзбекистонга икки марта сафар қилган ва Президент Шавкат Мирзиёев билан учрашган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Сенатор Содиқ Сафоевнинг элчихонадаги тадбирда айтишича, Сэр Алан билан учрашувдан сўнг Президент Мирзиёев муайян ислоҳотларни амалга оширган.
Ўзбекистон президенти билан сайловлардан икки кун ўтиб юз берган учрашувини эслар экан, жаноб Данкан унинг ўта "хушмуомала, очиқ ва суҳбатлашиш учун осон шахс" сифатида таассурот қолдирганлигини айтди.
"Унда ортиқча кибр йўқ эди. Ўзини жуда табиий ва самимий тутарди. Собиқ Бош вазир Маргарет Тетчернинг Михаил Горбачёв ҳақида айтган сўзлари бор эди. "Бирга ишлаш мумкин бўлган шахс" деганди. Мен жаноб Мирзиёев ҳақида худди ана шундай фикрга келдим".
Ўзбекистонда 22 декабрда бўлиб ўтадиган сайловларда бешта сиёсий партия номзодлари илгари сурилган, аммо халқаро таҳлилчилар улар орасида Президент Мирзиёев сиёсатини танқид қилишга қодир мухолиф ҳаракат йўқлигини айтишади.
Ўзбекистон Ташқи ишлар вазирлигига кўра, сайловларни бу сафар 50та давлатдан келадиган 700дан ортиқ кузатувчилар кузатади.
Европада Хавфсизлик ва Ҳамкорлик Ташкилотининг ўзидан 300 нафар эксперт Ўзбекистонга келиши кутилмоқда.
Алан Данкан билан суҳбатни Ибрат Сафо олиб борди.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
