Дунё, Ўзбекистон, янгиликлар: Артемий Лебедев ижод маҳсули Тошкент логотипига айланмайдими?

Тошкент логотипи учун овоз бериш жараёни якунланди. Эрон Британия танкерини қандай ҳибсга олди? Avengers: Endgame пул ишлаш борасида Avatar'ни ортда қолдириши кутилмоқда. Парламент сайловида Зеленский партияси ғолиб чиқди.

Тошкентда жойлашган MA'NO бренд агентлиги пойтахт логотипи учун ўтказилган танловда ғолиб чиқди, дея хабар бермоқда Фергана.ру.

Танлов онлайн овоз бериш йўли орқали Туризмни ривожлантириш давлат қўмитаси томонидан ўтказилган.

Овоз бериш жараёни бошлангандан бир неча кун давомида россиялик таниқли дизайнер Артемий Лебедев студияси таклиф қилган логотип катта фарқ билан рақибларидан ўзиб кетган. Бироқ жараён якунига бир неча кун қолганда, MA'NO варианти, кутилмаганда, саккиз минг кўпроқ овоз йиғиб, ғолибга айланган.

Лебедев варианти эса тўртинчи ўрин билан кифояланган.

Мамлакатнинг бошқа ҳудудлари логотипи учун ҳам танлов ташкил этилган. Натижада, Фарғона, Навоий, Жиззах, Андижон ва Қорақалпоғистонда ғолибни аниқлашнинг имкони бўлмаган. Эндиликда, ушбу ҳудудлар бўйича қайта овоз бериш бўлиб ўтиши кутилмоқда.

Ғолибларга 25 миллион сўм пул мукофоти ваъда қилинмоқда. Мукофот фондининг умумий миқдори 300 миллион сўмни ташкил этиши айтилади.

MA'NO агентлиги логотипи февраль ойида Тошкент шаҳар ҳокимлиги ҳузуридаги Жамоатчилик кенгаши томонидан ташкилланган ўхшаш танловда ҳам ғолиб чиққан эди.

Эрон Британия танкерини қандай ҳибсга олди?

Жума куни Эрон Ислом Инқилоби Ҳимоячилари Корпуси кучлари Буюк Британия байроғи остида сузаётган Stena Impero нефть танкерини қўлга олган эди.

Эрон ҳарбийлари ва Британия кемаларини муҳофаза қилиш учун Ҳормуз бўғозига юборилган Montrose ҳарбий кемаси ўртасида воқеага қадар бўлиб ўтган радиосўзлашувлар ёзуви эълон қилинди.

Аудиоёзувда эронликлар Montrose фрегатидан «хавфсизликни таъминлаш мақсадида» танкерни кўздан кечиришга халал бермасликни талаб қилаётгани эшитилади.

Шундан сўнг, Эрон ҳарбийлари танкерга ўз йўналишини ўзгартиришга кўрсатма берган.

«Агар бўйсунсангиз, сизга ҳеч нарса бўлмайди,» дейди эронлик ҳарбийга тегишли овоз.

Танкер билан алоқага чиққан Montrose эса экипажга эронликлар талабидан бош тортишни таъкидлаган.

«Сиз халқаро сув йўли бўйлаб транзит кесиб ўтишни амалга ошираётган экансиз, халқаро ҳуқуққа кўра, сизнинг йўлингизга бирор ким халал бериши, сизни қўлга олиши ва сизга ноқулайлик келтириш чиқариши мумкин эмас,» эслатган британиялик ҳарбийлар.

Шунга қарамай, қуролланган эронлик ҳарбийлар танкерга бостириб кирган. Ўша куннинг ўзида Эрон танкернинг қўлга олиниш жараёни тасвирланган видеоёзувни эълон қилган. Воқеа пайти танкердан анча узоқда бўлган Montrose фрегати Эрон кучларига қаршилик кўрсата олмаган.

Бундан икки ҳафта бурун Британия ҳарбийлари Гибралтар соҳилларида Эронга тегишли Grace 1 нефть танкерини қўлга олган эди.

Британия ушбу ҳолатни танкернинг Европа Иттифоқи санкцияларига зид равишда Сурияга нефть ташиётганлиги билан изоҳлаган ва бунда ҳеч қандай халқаро қонун поймол этилмаганини таъкидлаган.

Ўшанда, Эрон Grace 1'нинг ҳибсга олинишини «қароқчилик» ўлароқ баҳолаган ва қарши жавоб сифатида Британия танкерини босиб олиш билан таҳдид қилган эди.

Avengers: Endgame пул ишлаш борасида Avatar'ни ортда қолдириши кутилмоқда

Режиссёр Жеймс Камеруннинг Avatar фильми сўнгги 10 йил давомида энг кўп пул ишлаган ($2.7 миллиард) сифатида кўриб келинар эди. Бироқ Marvel студиясининг Avengers: Endgame (Қасоскорлар: Интиҳо) картинаси ушбу ҳафтада Avatar'ни ортда қолдириши кутилмоқда.

Ўтган жума кунги рақамлардан аён бўлишича, Қасоскорлар: Интиҳо Avatar'дан атиги ярим миллион доллар ортда қолмоқда, аммо дам олиш кунлари ушбу сумма ортиғи билан йиғилганига ишонилади.

Бироқ кузатувчилар ўн йил олдинги инфляция билан солиштирганда, Avatar барибир олдинда эканини таъкидлайди.

Парламент сайловида Зеленский партияси ғолиб чиқди

Якшанба куни Украина парламентига ўтган муддатидан олдин сайловда президент Владимир Зеленскийнинг Халқ Хизматкори партияси Олий Радада энг кўп ўринни эгаллаган.

Президентлик қасамёди нутқида жаноб Зеленский парламентни тарқатиб юборган ва муддатидан олдин сайлов ўтказилишини эълон қилган эди.

Парламентда кўп ўринни эгаллаган партия ёки коалиция ҳукуматни шакллантириш ҳамда Бош вазир номзодини кўрсатиш ваколатига эга бўлганидан Халқ Хизматкори партиясининг муваффақияти президент Зеленский учун энг муҳим ютуқ ўлароқ хизмат қилади.

Телеюлдуз ва қизиқчи сифатида шуҳрат қозонган Владимир Зеленский ҳокимиятга келганидан сўнг мамлакатда кескин ислоҳотлар ўтказиш ва коррупцияга қарши аёвсиз курашишга ваъда берган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek