Меҳнат муҳожири яна фирибгарга учради

Меҳнат муҳожирларини алдаш, уларни хужжатларини олиб қўйиб ишлатиш Россияда ишлаётган Марказий Осиёликлар ҳаётида кўп учрайди.

Сурхондарёлик Фаррух Рахмонов ҳам ана шундай жабрдийдаларнинг бирига айланди.

У ишлаш учун Санкт-Петербургга келгач, аввало хужжатларини қонуний тайёрлади: вақтинчалик яшаш учун рўйхатдан ўтди, ишга рухсатнома олди. Кейин эса иш излай бошлади.

Интернетдан фирмаларнинг бирига мебелларни етказиб бериш бўйича ҳайдовчи кераклигини ўқиб қолди. Ўзига мос ишдек кўринган бу эълонда кўрсатилган телефон рақамига қўнғироқ қилди.

Фаррухга суҳбат учун Восстания кўчаси 1-уйда жойлашган бизнес марказга келиши лозимлигини айтишди.

- Мени белгиланган вақтда ўзини ходимлар бўлимининг бошлиғи, деб таништирган киши кутиб олди, - дейди Фаррух Рахмонов.

"Ичкарида одам кўплиги учун пастда гаплашдик. У мендан хужжатларимни бир неча дақиқага сўраб олди. Хужжат нусхаларини офисда ходимлар базасига киритиб чиқишини, мен эса шу ерда кутиб туришимни айтиб ичкарига кириб кетди. Аммо "бошлиқ" анча вақт йўқ бўлиб кетди. Ярим соатлардан зиёд чамаси вақт ўтгач, унга қўнғироқ қилдим. Аммо "бошлиқ"нинг телефони ўчирилган эди. Анча вақтдан кейин эса унинг ўзи менга қўнғироқ қилиб, унинг ҳисобига 5000 рубль ўтказсамгина хужжатларимни қайтаришини айтди", дея ҳикоя қилади Фаррух.

Шундан кейин Фаррух Рахмонов фирманинг офисини топишга ҳаракат қилди. Бироқ бизнес маркази ходимлари эълонда кўрсатилган ширкат бу бинода йўқлигини аниқлашди.

Ўзини иш берувчи қилиб таништирган кишининг исм-шарифи бино ижарачилари рўйхатидан ҳам чиқмади. Хуллас, навбатдаги фирибгарлик!

Фаррух аввалига полицияга мурожаат қилди, аммо полиция бўлими ходимлари мигрантлардан шикоят қабул қилмасликларини айтиб рад этишди.

Шундан сўнг Марказий Осиёлик меҳнат муҳожирларига ёрдам бериш Фондига кўмак сўраб борди.

Бу ерда ҳуқуқшунослар Ф.Раҳмоновнинг аризасини қабул қилиш борасида шаҳар Ички Ишлар Бошқармасини огоҳлантирдилар.

Фонднинг аралашувидан сўнггина, орадан икки кун ўтиб, жабрланувчининг аризаси қабул қилинди. Айни пайтда суриштирув ишлари бошланган.

"Бу меҳнат муҳожирларини алдашнинг энг кенг тарқалган усули, - дейди Марказий Осиёлик меҳнат муҳожирларига ёрдам бериш Фонди раҳбари Игорь Белоусов. - Чет эллик фуқароларнинг иш ҳақларини беришмайди, оғир шароитларга жойлаштиришади, қулликка олишади. Энди эса яна бир фирибгарлик тизимини ўйлаб топишибди - иш ҳақидаги таклиф ва ҳеч қандай жисмоний кучларсиз уларнинг ҳужжатларини олиб қўйиб эвазига пулларини шилиш. Ҳозир ҳатто бу "иш берувчи" топилганида ҳам фирибгарликни исботлаш қийин. Чунки улар гаплашишганида ёнларида ҳеч қандай гувоҳлар бўлмаган. Ф. Раҳмонов эса ҳозир паспорт ва ФМХ дан берилган ҳужжатларсиз қолган, ҳатто ватанига ҳам қайтиб кета олмайди".

Айни пайтда Фонд ходимлари сохта раҳбарни топиш учун имкон қадар ҳаракат қилмоқдалар ва бу муаммони тинч йўл билан ҳал этиш ниятидалар.