Савицкий коллекцияси директори ишдан олинди

Жаҳон бўйлаб "Савицкий коллекцияси" дея танилган Нукусдаги Қорақалпоқ Давлат Санъат Музейи директори Мариника Бабаназарова ишдан бўшатилган.

Маданият вазирлигининг ушбу қарори Савицкий коллекциясининг ташкил топганига 100 йил тўлиши муносабати билан тайёргарлик ишлари авжида кетаётган маҳал рўй берган.

Музей коллективи вазирликнинг ушбу қарорига ўз норозилигини билдириб чиққан.

Би-би-сига ошкор бўлган маълумотларга кўра, коллекциянинг 100 йиллик санасини ўтказмаслик учун қасддан ҳаракатлар кузатилган.

Игор Савицкий Сталин даврида қатағонга учраган ва отилган рассомларнинг минглаб асарларини сақлаб қолиб Нукусдаги музей ертўласида сақлаган.

Савицкий тўплами Рус авангард тасвирий санъатининг иккинчи энг йирик коллекцияси ҳисобланади.

Нукусдаги музейда кўп миллион долларлик санъат асарлари сақланиши айтилади.

Қорақалпоғистон Маданият ва спорт вазири қатнашган йиғилишда иштирок этган музейнинг барча 86 ходими вазирликнинг қароридан норози эканлигини баённома орқали изҳор қилган.

Мариника Бабаназарова Савицкий коллекциясини сақлаш ва жаҳонга тарғиб қилиши билан машҳур.

Бабаназарова хоним музей таъмири учун маблағ етмай қолган вақтларда ҳам коллекциядан бирорта ҳам асарнинг сотилишига йўл қўймагани билан ҳам таниқли.

Мариника Бабаназарова 23 ёшида музейга раҳбарликни Игор Савицкий ўлимидан сўнг қабул қилиб олган ва фаолиятининг бошида уни ҳимоя қилиш учун кўп жанжал ва можаролар ичида қолган.

Савицкий тўсатдан оламдан ўтганидан сўнг унинг коллекциясига кўз олайтирувчилар кўп бўлган. Бироқ музей коллективи ва Бабаназарова хонимнинг сайъ ҳаракатлари билан асарлар шу кунгача сақланиб келган.

Бабаназарова хоним Би-би-сига берган бундан 4 йил олдинги суҳбатида коллекцияни сақлаб қолишда қийинчиликлар бўлишини, аммо ҳозирча эплаб келаётганини айтган эди.

Ушбу музейдаги асарларнинг кўп миллион долларлик эканлигини таъкидлаб, уни ҳимоя қилиш осон эмаслигини ва ўзини занжирдаги қўриқчи итдек ҳис қилишини билдирганди.

Асли аслзодалардан бўлган Савицкий Иккинчи Жаҳон Урушидан аввал Ўзбекистонга кўчиб ўтган ва ўз коллекторлик фаолиятини қорақалпоқ осори-атиқаларини йиғишдан бошлаган. У сўнгра йиллар давомида Россия ва Ўзбекистонда совет тарғиботи ва совет реализмига тўғри келмайдиган авангард асарларни тўплай бошлаган. Унинг ёрдами билан совет ҳукумати қора рўйхатига тушган рассомларнинг кўргазмалари уюштирилган. Рассомликдан воз кечиб, ўзга рассомларга ёрдам беришга ўз умрини бағишлаган.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.

Instagram – BBC UZBEK

Twitter – BBC UZBEK

Odnoklassniki – BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio