Ўшда аҳолига газ баллонларини тарқатиш бошланди
Қирғизистон жанубидаги Ўш шаҳрида камбағал муҳтож оилаларга баллонларда арзон нархда газ тарқатиш бошланган.
Ўш шаҳри ҳокимлигидан маълум қилишларича, биринчи куннинг ўзида 240 оила газ цилиндрларини олганлар.
Шаҳар маъмуриятига кўра, Ўшда жами 1775 муҳтож оилага нархи арзонлаштирилган суюқ газ тарқатиш мўлжалланаяпти.
Газ баллонлари билан бирга газ плиталарини тарқатиш ҳам мўлжалланган.
Бу ишларни ноябр ойигача тугатиш режалангани ҳақида Ўш шаҳри ҳокимлиги расмийси.
Шу йил ёзида Ўшда бўлган Қирғизистон Президенти Алмазбек Атамбоев шаҳарликларга баллонли газ тарқатишга ваъда берган, ҳукумат Қирғизистон жанубидаги кам таъминланган оилалар учун мўлжалланган электр плиталари ва газ баллонларини сотиб олишга 14 миллион АҚШ долларига тенг маблағ ажратгани ҳабар қилинган.
Айни пайтда 23 октябр кунидан Ўшда электр қувватини вақти-вақти билан узиш амалиёти ҳам бошланган.
Бу электр энергиясини тежаш мақсадида амалга оширилмоқда.
Қирғиз расмийларига кўра, бу йил дарёларда сув кам бўлган, бу электр қуввати ишлаб чиқариш пасайишига ҳам олиб келган.
Шу йил 14 апрелидан Ўзбекистон Қирғизистон жанубига табиий газ узатишни тўхтатиб қўйган.
10 апрелида Россиянинг "Газпром" ширкати Қирғизистоннинг "ҚирғизГаз" ширкатини 1 АҚШ долларига сотиб олган.
Ўшанда Президент Алмазбек Атамбаев билан учрашган "Газпром" раҳбари Алексей Миллер келажакда Қирғизистоннинг газ тармоғини ривожлантириш йўлида йирик сармоя ётқизиш ниятида эканларини айтган.
""Қирғизгаз"нинг 40 миллион доллар қарзини яқин 5 йилликда тўлаб, келажакда Қирғизистоннинг газ тармоғини ривожлантириш учун 600 миллион доллар сармоя жалб этишни режалаштираяпмиз" - деб айтган "Газпром" раҳбари.
Ўзбекистон томони Қирғизистонда янги ташкил қилинган газ ширкати билан шартномаси йўқлигини сабаб қилиб таъминотни тўхтатганини айтган.
Қирғиз матбуотида Ўзбекистон Ўшга газ таъминотини қайта тиклаш учун Сўх анклавига йўлак очиб беришни талаб қилгани ҳақидаги хабарлар пайдо бўлган.
Аммо расмий Тошкент бу каби талаб илгари сурилганини тасдиқламаган.
Қирғизистондаги айрим нашрлар Ўзбекистон бунга қўшимча расмий Бишкекдан Норин ГЭСи қурилиши юзасидан халқаро экспертиза ўтказиш талабини ҳам газ масаласига боғлаётгани ҳақида ёзишган.
Президент Алмазбек Атамбоев сўзларига кўра, Ўзбекистон газ таъминотини тиклаш эвазига Қирғизистон олдига бажариб бўлмас шартлар қўйган.
"Улар бизнинг Чўнғ-Олой водийсидан ўтадиган Туркманистон-Қирғизистон-Хитой газ қувурига уланмаслигимизни талаб қилишаяпти. Ўзбекистон мамлакат жанубига газ таъминотини қайта тикламоқчи эмас", дея Президент Атамбоевдан иқтибос келтирган "Вечерний Бишкек" рўзномаси.
"Қирғизистон қўшниларидан газ беришни сўраб ялинмайди. Мен "Газпром"дан газ инқирозидан чиқиш йўлини топишни сўрадим. Россия ширкати Қозоғистоннинг Талас вилоятидан мамлакат жанубига газ қувури тортиб келтиради", деб айтган Президент Атамбоев.
