Владимир Жириновский Қирғизистонда "хоҳланмаган шахс"га айланди
Бу ҳақда 15 май куни Қирғизистон парламенти қарор қабул қилди. Қирғиз ҳукуматининг бундай хулоса чиқаришига россиялик сиёсатчининг "Қирғизистон биздан қарзини узиши учун Иссиқ Кўлни Россияга бериши лозим",- деган сўзлари сабаб бўлган.
Жаноб Жириновский ўзининг "ўткир тили", айниқса собиқ Иттифоқ республикалари раҳбарлари ва сиёсатчилари ҳақидаги танқидий луқмалари билан азалдан машҳур.
Бундан сал олдинроқ, у Тожикистон Президенти ҳақидаги гаплари билан Тожик расмийларининг ғазабини қўзғади.
Ўшанда у НАТО ўз қўшинларини Афғонистондан олиб чиққач, толиблар Тожикистонга кириб келишини башорат қилган эди.
"Сизнинг дўстларингиз, тожик коммунистлари базангиз учун нархни кўтаришади. Мана биз айтишимиз керак, биз сизга тўламаймиз ва одамларингизни ишга қабул қилмаймиз, деб. Ўшанда Раҳмон нима қилар экан? Афғон исломчилари кириб келиб, Нажибуллонинг кунини унинг бошига солишади",- дейди Жириновский.
Россия матбуотида Жириновскийнинг ўзига хос киноя ва маслаҳатларини тез-тез учратиш мумкин.
Жумладан, Арманистон ва Озарбайжон ҳақида гапираркан, "Бу икки республика Россиясиз Тоғли Қорабоғ муаммосини ҳал қила олмайди. Шунинг учун мен уларга Россия таркибига кириб, Кавказ орти федерал вилоятини тузишларини таклиф қиламан. Улар бунга кўнсалар биз ҳам Қорли Қорабоғнинг мустақиллигини тан оламиз", - дейди у.
2010 йилги Белоруссия сайловларини Жириновский шундай кузатади:" Лукашенко кеча ва сайлов куни минглаб намойишчиларни тирқиратиб, Белоруссияда демократия қандай аҳволдалигини кўрсатди. Юзлаб одамлар, жумладан рус журналистлари ва бошқа давлат фуқаролари панжара ортига ташланди. Бу ҳаммаси- давлатнинг нотўғри сиёсати оқибатидир. Диктатор ҳокимиятда қолди. У ўз курсисини 2015 йилда ҳам, 2020 йилда ҳам ҳеч кимга бермайди".
Гуржистон ҳақида доимо "ширин"сўзларини аямайдиган сиёсатчи "Грузияда ҳеч қачон халқлар дўстлиги бўлмаган. Ҳамма ёқ порахўрлик. Гуржистон чойи-туриши чанг, ҳеч ким харид қилмайди. Улар 40 йил олдин ҳам руслар устидан мазах қилишарди, ҳозир ҳам гуржиларни ёки қўрқувда сақла ёки уларни боқиб ҳурмат қилдир", дея маслаҳат беради.
Қозоғистон ҳақида эса "Қозоқ тили йўқ. Ёзуви ҳам бўлмаган. Умуман у ерда ҳеч нарса йўқ", деб кескин фикр билдиради Киевда бўлган матбуот анжуманида.
Ўша йиғилишда қатнашган украиналик талаба қиз Жириновскийга қарата Украина ва Қозоғистон ҳақида айтган ҳурматсиз сўзлари учун карам улоқтиради.
Лекин бундай ҳаракатлар Жириновскийга "тарбиявий таъсир" қилганини сезиш қийин.
Россиялик сиёсатчи ўзининг "миллатпарвар"лиги билан таниқли. Эстонияда Совет аскарининг ҳайкали кўчирилишига қарши "Эстония билан дипломатик алоқаларни узиш ва иқтисодий блокада қилиш керак. Эслатиб қўйиш керак биз уларни халос қилганимизни", деб айтади.
Қизиғи шундаки, Жириновский Туркманбошини жуда илиқ сўзлар билан таърифлайди. 2005 йил Ашхаботга сафаридан кейин "Бу ажойиб инсон билан учрашув эди. Ана сизга демократия. Дунёда энг арзон бензин. Бу ерда энг бахтли одамлар яшаса керак", дея Туркманистондаги ҳаётни олқишлайди.
Марказий Осиёдаги вазият ҳақида гапирар экан, "қозоқлар яхши, ўзбеклар яхши. Лекин келиша олишмайди. 20 йил олдин Ўш воқеаси бўлувди. Нима сиз ҳар 20 йилда бир-бирларингизни қирасизларми? Сизларга судья керак. У ҳам фақат рус бўла олади", деган сўзларни келтиради.
Жириновский нафақат собиқ Иттифоқ давлатлари, балки Россиянинг ўзидаги сиёсатчиларни ҳам танқидий фикрлари билан яхшилаб савалаб туришга ўрганган.
Жумладан, Михаил Горбачёв ва Борис Елцинлар ҳам унинг танқидидан қуруқ қолишмаган.
2012 йил Россияда ўтган президентлик сайловларида номзодини қўйган жаноб Жириновский берилган овозлар ҳисобидан Владимир Путин, Геннадий Зюганов, Михаил Прохоровдан кейин тўртинчи ўринни эгаллаган эди.
Сайлов кампанияси пайти Жириновский эълон қилган видеороликда Россия "жойида қотиб турган озғин эшшак"ка ўхшатилган, лавҳа россияликлар орасида баҳсларга сабаб бўлганди.
