Тожикистон: "Сантўда-2" ГЭСининг илк агрегати ишга тушди

"Сангтўда-2" ГЭСи

Сурат манбаси, BBC World Service

Сурат тагсўзи, "Сангтўда-2" ГЭСи тўлалигича 2012 йил баҳорида ишга тушиши лозим
    • Author, Мардон Муҳаммад,
    • Role, Би-би-си, Душанбе

Тожикистон шарқидаги "Сангтўда-2" гидростанциясининг биринчи агрегати ишга тушган.

Бир миллиард киловатт-соат миқдорида электр қуввати ишлаб чиқариши режаланган ушбу ГЭСнинг иккинчи агрегати 2012 йилнинг март ойида ишга тушиши кутилмоқда.

"Сангтўда-2" ГЭСи Эрон сармояси ҳисобига қурилаяпти.

Тожикистон ва Эрон ҳукуматлари ўртасида имзоланган келишувга мувофиқ, дастлабки 12,5 йил давомида "Сангтўда-2" станциясидан Эрон фойдаланади ва сўнгра ГЭС Тожикистон ихтиёрига топширилади.

"Сангтўда-2" шарқий Тожикистондаги Вахш дарёсида қурилган бешинчи гирдростанциядир.

Уни қураётган Эроннинг "Сангоб" ширкати раиси Сайид Асғарийнинг айтишича, илк агрегат бир ҳафтадан сўнг электр қуввати ишлаб ҷиқара бошлайди.

"Янги йил арафасида ушбу агрегат ишлаб чиқарадиган электр қуввати Тожикистондаги ягона энергетик тизимга берилади. Агрегат йилига 500 минг киловатт-соат миқдорида электр қуввати ишлаб чиқариш имконига эга. Келгуси йилнинг март ойида иккинчи агрегат ҳам ишга туширилади ва иншоотда қурилиш ишлари охирга етади,"- деб айтди Асғарий жаноблари.

"Сангтўда-2" гидростанцсиясида қурулиш ишлари 2006 йилнинг феврал ойида бошланган эди. Ҳозирга қадар Эрон ушбу иншоотга 180 миллион АҚШ доллар миқдорида сармоя киритган.

Skip Энг кўп ўқилган and continue reading
Энг кўп ўқилган

End of Энг кўп ўқилган

"Барқи тожик" ширкатининг муҳандиси Рашид Гулов "Сангтўда-2" гидростанцияси ишга тушса ҳамки, мамлакатда электр қуввати тақчиллиги ҳал бўлмаслигини айтади.

"Бундай кичик гидростанциялар энергитик муаммоларни ҳал қила олмайди. Бунинг учун Роғун гидростанцияси қурилиши лозим. Кичик ва ўрта гидростанциялар қиш пайтида электр тақчиллигини бир қадар камайишига ёрдам бериши мумкин," - деди Рашид Гулов.

Қўшни Ўзбекистон "Роғун" гидростанцияси қурлишига қаршилик кўрсатиб келади.

Расмий Тошкентнинг ишонишича, "Роғун" ГЭСи Марказий Осиёда техник ва экологик фалокатларни келтириб чиқариши мумкин.

Ҳозирда Жаҳон Банки мутахассислари мазкур гидростанциянинг минтақа экологиясига эҳтимолий таъсирини ўрганмоқдалар.

Тожикистоннинг қиш мавсумида 2,5 -3 миллиард киловат-соат миқдорида электр қувватига эҳтиёжи бор.

Бу йил қишнинг жуда совуқ келиши кетидан Тожикистон аҳолиси катта қийинчиликга дуч келган.

Ҳозир мамлакат туманларига бир кеча-кундузда олти соат давомида электр қуввати узатилади.