’سیٹلائٹ تصویر سے قدیم معبد کی تباہی کی تصدیق‘

اقوام متحدہ کا کہنا ہے کہ سیٹلائٹ سے لی گئی ایک تصویر سے شام میں پیلمائرا کے کھنڈرات میں واقع ایک اہم ترین معبد کی مکمل تباہی کی تصدیق ہوگئی ہے۔

اس سے قبل اطلاعات تھیں کہ شدت پسند تنظیم دولتِ اسلامیہ نے پیلمائرا کے کھنڈرات میں واقع بل معبد کو دھماکے سے تباہ کر دیا ہے۔

شام میں آثارِ قدیمہ اور نوادرات کے محکمے کے سربراہ مامون عبدالکریم نے ان اطلاعات کو مسترد کر دیا تھا کہ دو ہزار سال قدیم بل معبد کو تباہ کیا گیا ہے۔

تاہم اقوام متحدہ کے سیٹلائٹ ماہرین کا کہنا ہے کہ حالیہ لی گئی تصویر میں عمارت کا ملبا بھی دکھائی نہیں دے رہا۔

اقوام متحدہ کے ادارے یونیٹر کی جانب سے جاری کردہ بیان میں کہا گیا ہے کہ ’ہم بل معبد کی مرکزی عمارت اور اس کے پاس واقع ستونوں کی قطار کی تباہی کی تصدیق کر سکتے ہیں۔‘

اقوامِ متحدہ کے عالمی ثقافتی ادارے یونیسکو کی جانب سے عالمی ورثہ قرار دیے جانے والے ان کھنڈرات میں واقع بل معبد کی کم از کم جزوی تباہی کی خبریں عینی شاہدین اور مقامی افراد کی جانب سے اتوار کو ملی تھیں۔

اس وقت بھی یہ واضح نہیں ہو سکا تھا کہ اس قدیم معبد کو کس حد تک نقصان پہنچایا گیا ہے۔

بل کا معبد پہلی سنہِ عیسوی میں تعمیر کیا گیا تھا اور یہ عبادت گاہ پیلمائرا کے دیوتا کے لیے مختص تھی۔

یاد رہے کہ دولتِ اسلامیہ کے اس تازہ حملے کے بارے میں پیلمائرا کے ایک رہائشی نے خبر رساں ادارے اے پی کو بتایا تھا کہ ’مکمل تباہی ہے۔ اینٹیں اور ستون زمین بوس ہو گئے ہیں۔ یہ ایسا دھماکہ تھا کہ کوئی بہرا بھی اسے سن سکتا تھا۔ صرف عبادت گاہ کی دیوار ہی باقی بچی ہے۔‘

خیال رہے کہ بل معبد کی تباہی کی خبر شدت پسند تنظیم دولتِ اسلامیہ کے ہاتھوں پیلمائرا میں ہی واقع بعل شمین کی عبادت گاہ کی دھماکے سے تباہی کے ایک ہفتے بعد سامنے آئی تھی۔

دولتِ اسلامیہ نے رواں سال مئی میں پیلمائرا پر قبضہ کر لیا تھا، جس کے بعد وہاں کے تاریخی ورثے کے بارے خدشات بڑھ گئے تھے۔