کراچی میں کئی جگہ پاکستانی ٹیم کے آنجہانی کوچ کی موت کا سوگ منایا گیا

پولیس کا کہنا ہے کہ آنجہانی وولمر کے کمرے میں کسی کے زبردستی داخل ہونے کے کوئی ثبوت نہیں ملے، جس سے اندازہ لگایا جا سکتا ہے آخری وقت میں ان کے ساتھ کوئی واقف کار ہی تھا۔

’کھلاڑی یا اہلکار ملوث نہیں‘

پولیس کی کھلاڑیوں سے پوچھ گچھ

وہ پاکستانی ٹیم کی دنیا تھے: ڈکی برڈ

وولمر کی موت پر پاکستانی کھلاڑی افسردہ

وولمر اپنے لڑکوں کے ساتھ

پولیس کمشنر نے اخباری کانفرنس سے اسی ہوٹل پیگسس میں خطاب کیا جہاں اٹھاون سالہ باب وولمر 18 مارچ کو اپنے کمرے میں بے ہوش پائے گئے تھے۔

جمیکا پولیس کے ڈپٹی کمشنر مارک شیلڈز کا کہنا تھا ’باب ایک جسیم شخص تھے اور انہیں قابو کرنے کے لیے کافی قوت درکار ہوئی ہوگی اور پولیس کو اب دو یا دو سے زیادہ قاتلوں کی تلاش ہے‘۔

بی بی سی ریڈیو لائیو سے بات کرتے ہوئے مارک شیلڈز کا کہنا تھا کہ ’اس موقع پر یہ بات ماننا مشکل ہے کہ باب کو مارنے والا شخص ان کے لیے اجنبی تھا۔ ضروری ہے کہ ہم اپنا ذہن کھلا رکھیں لیکن میں کہوں گا کہ یہ شخص باب کو جانتا تھا کیونکہ یہ بات واضح ہے کہ انہوں نے خود اسے اپنے کمرے میں آنے دیا۔‘

	ویسٹ انڈیز کا ایک نامعلوم پولیس افسر پاکستانی کرکٹ ٹیم کے ایک رکن عمران نذیر سے بوب وولمر کے بارے میں تفتیش کر رہا ہے

ڈپٹی کمشنر مارک شیلڈز ان افواہوں کی ’پر زور تردید‘ کی باب وولمر کی موت کے سلسلے میں کوئی گرفتار یاں بھی ہوئی ہیں۔ ’یہ بالکل لغو بات ہے۔ جہاں تک مجھے پتہ ہے اس بات میں کوئی سچائی نہیں ہے۔‘

پولیس کا کہنا ہے کہ کمرے میں زبردستی گھسنے کے کوئی شواہد نہیں ملے اور نہ ہی وولمر کے زیر استعمال کسی چیز کو اٹھایا گیا ہے۔ حکام ہوٹل میں لگے کلوز سرکٹ ٹی وی کیمروں کی ریکارڈنگ کو بھی دیکھ رہے ہیں۔

پولیس کمشنر نے اپیل کی کہ اگر کسی بھی شخص کے پاس اس واقعہ کے حوالے سے کوئی معلومات ہیں تو وہ مہربانی کر کے سامنے آئے۔ انہوں نے کہا کہ واقعہ میں ملوث اشخاص رضا کارانہ طور پر خود کو پولیس کے حوالے کردیں۔

کنگسٹن میں موجود بی بی سی کے نامہ نگار اینڈی گالچر کا کہنا ہے کہ وولمر کے قتل نے سب کو حیران کر دیا ہے اور ورلڈ کپ پیچھے رہ گیا ہے۔ ان کے مطابق قیاس آرائیاں کی جا رہی ہیں کہ وولمر کے قتل کے پیچھے کرکٹ کے ’جواریوں‘ کا ہاتھ ہے۔

باب وولمر کی ہلاکت اس وقت پورے ورلڈ کپ اور کرکٹ کی دنیا میں موضوع بحث بنی ہوئی ہے۔ وولمر دنیائے کرکٹ کے موجودہ کئی ستاروں کی کوچنگ کرنے کی وجہ سے کیریئر میں ان کے لیے باپ کی سی حیثیت رکھتے تھے۔

تاہم انٹرنیشنل کرکٹ کونسل نے اعلان کیا کہا ہے کہ ورلڈ کپ اپنے شیڈول کے مطابق جاری رہے گا۔ ایک اخباری کانفرنس کے دوران آئی سی سی کے چیف میلکم اسپیڈ نے کہا: ’میچ جاری رہیں گے۔۔۔ ہر ممکن طریقے سے ہم جمیکا کی پولیس کی مدد کرتے رہیں گے اور ہمیں یقین ہے کہ ہماری ٹیمیں بھی پولیس اور دیگر تحقیقاتی اہلکاروں کی مدد کریں گی۔‘

	کھلاڑی وولمر کی ناگہانی موت پر افسردہ بیٹھے ہیں

جنوبی افریقہ کے سابق کھلاڑی ایلن ڈونلڈ نے مطالبہ کیا ہے کہ وولمر کے قتل کی خبر آنے کے بعد ورلڈ کپ ملتوی کر دینا چاہیے۔ بی بی سی سے بات کرتے ہوئے انہوں نے کہا ’مجھے سمجھ نہیں آ رہی کہ اس واقعہ کے بعد ورلڈ کپ کیسے جاری رہ سکتا ہے‘۔

باب وولمر کی ہلاکت کِنگسٹن کے پیگسس ہوٹل کے کمرے میں اتوار کے روز ہوئی تھی۔ انہیں ان کے کمرے میں بیہوش پایا گیا تھا اور ہسپتال لے جانے پر مردہ قرار دیا گیا۔

جمیکا کی پولیس نے جمعرات کو پاکستانی کرکٹ ٹیم کے ہر کھلاڑی سے سوال جواب کیے اور ہر کھلاڑی سے سوال جواب کا سلسلہ لگ بھگ ایک گھنٹے تک جاری رہا تھا۔ پولیس نے پاکستانی کھلاڑیوں کے فنگر پرِنٹِنس اور ڈی این اے نمونے بھی لیے گئے ہیں۔

خبر رساں ادارے رائٹرز کے مطابق پاکستانی کرکٹ ٹیم نے جمیکا کی پولیس کو کہا ہے کہ اسے وطن واپس جانے کی اجازت دی جائے۔ ٹیم مینیجر طلعت علی نے کہا ’جتنی جلدی ممکن ہو سکے، ہم گھر واپس جانا چاہتے ہیں‘۔

پاکستانی ٹیم اس وقت مونٹیگو بے میں ہے جہاں سے اس نے سنیچر کو واپس روانہ ہونا ہے۔

جمیکا پولیس کا کہنا ہے ’ہمیں یقین ہے کہ جن لوگوں کی وولمر تک رسائی تھی یا جو ان سے وابستہ تھے، ان کے پاس اس تحقیقات کے سلسلے میں اہم معلومات ہوسکتی ہیں۔‘‘

	جمیکا پولیس نے ہر کھلاڑی سے ایک ایک گھنٹہ علیحدگی میں پوچھ گچھ کی ہے

پاکستان کرکٹ ٹیم کے میڈیا ترجمان پی جے میر سے جب برطانوی ٹیلی ویژن چینل اسکائی نیوز نے پوچھا کہ کیا کھلاڑیوں نے اس معاملے میں میچ فِکسنگ یا سٹے بازی سے متعقل کچھ باتیں کی ہیں تو انہوں نے کہا بالکل نہیں۔ ’جہاں تک میں جانتا ہوں کھلاڑیوں نے میچ فِکسنگ کے کسی واقعے کے بارے میں کوئی بات نہیں کی ہے، کیونکہ اس کا سوال ہی پیدا نہیں ہوتا۔

پی جے میر نے کہا کہ پاکستانی کھلاڑی اس بارے میں فکرمند ہیں کہ باب وولمر کے ساتھ کیا ہوا۔

سابق پاکستانی کھلاڑی سرفراز نواز نے چند روز قبل اس طرح کا خدشہ ظاہر کیا تھا کہ باب وولمر کی ہلاکت میچ فِکسنگ اور سٹے بازی میں ملوث لوگوں کی وجہ سے ہے۔

باب وولمر کی ہلاکت کی پولیس رپورٹ پر کرکٹ ٹیم کے میڈیا ترجمان پی جے میر نے اپنے افسوس کا اظہار کیا۔ ان کا کہنا تھا: ’پاکستانی ٹیم کو اس طرح کی خبر کی امید نہیں تھی اور میں کہنا چاہتا ہوں کہ یہ حیرت کی بات ہے، اس نے مجھے حیرت میں ڈال دیا ہے۔‘

صدر پرویز مشرف نے پاکستانی کرکٹ ٹیم کے آنجہانی کوچ باب وولمر کے لیے اعلی شہری اعزاز ستارۂ امتیاز کا اعلان کیا ہے۔ صدر مشرف نے باب وولمر کی بیوہ سے اظہار ہمدردی کرتے ہوئے کہا: ’پاکستانی عوام انہیں ہمیشہ یاد رکھیں گے ان کا خلاء پر ہونا بہت مشکل ہے۔‘