عبدالرشید شکور بی بی سی اردو ڈاٹ کام، کراچی

	شکست اور خراب کارکردگی کی ذمہ داری بھی قبول کرنی چاہئے: وسیم باری

ورلڈ کپ میں پاکستانی کرکٹ ٹیم کی شرمناک شکست کے بعد پیدا ہونے والی صورتحال کے بعد وسیم باری کا استعفی غیرمتوقع نہیں۔

پیر کی شب پاکستان کرکٹ بورڈ کے چیئرمین ڈاکٹر نسیم اشرف نے بھی اپنے عہدے سے استعفی دے دیا تھا جبکہ ان سے قبل انضمام الحق ون ڈے انٹرنیشنل کرکٹ کو خیرباد اور کپتانی چھوڑنے کا اعلان کرچکے ہیں۔

ورلڈ کپ کی شکست کا صدمہ اس قدر شدید تھا کہ پاکستانی ٹیم کے کوچ باب وولمر اسے برداشت نہ کرسکے اور چل بسے۔

وسیم باری کو شہریار خان کے دور میں عامرسہیل کی جگہ چیف سلیکٹر بنایا گیا تھا۔ چارسال قبل جنوبی افریقہ میں ہونے والے عالمی کپ میں بھی وہ چیف سلیکٹر تھے لیکن اس ورلڈ کپ میں بھی پاکستانی ٹیم پہلے مرحلے سے آگے نہ بڑھ سکی تھی۔

وسیم باری نے بی بی سی سے بات کرتے ہوئے کہا کہ موجودہ سلیکشن کمیٹی کی مدت ورلڈ کپ تک ہے تاہم ٹیم کی مایوس کن کارکردگی کے بعد اخلاقی طور پر اس عہدے پر رہنے کی ضرورت نہیں کیونکہ اس کی ذمہ داری بڑی حد تک سلیکشن کمیٹی پر بھی عائد ہوتی ہے۔

وسیم باری نے اس تاثر کو سختی سے مسترد کردیا کہ وہ ’ڈمی‘ یا ’یس مین‘ چیف سلیکٹر تھے۔ انہوں نے کہا کہ چونکہ پاکستان میں با اختیار چیف سلیکٹر ہونے کی روایت یا پالیسی نہیں رہی ہے لہذا انہوں نے کپتان اور ٹیم منیجمنٹ سے محاذ آرائی کے بجائے باہمی ملاپ سے اپنی ذمہ داری نبھائی۔

انہوں نے کہا کہ آج جو لوگ انہیں بے اختیار سلیکٹر قرار دیتے ہیں انہوں نے خود اپنے دور کپتانی میں سلیکشن کمیٹی کو خاطر میں نہ لاتے ہوئے پسند کے کرکٹرز ٹیم میں شامل کرائےاور یہ لوگ منیجرکے ذریعے پرچیاں بھجوادیتے تھے۔

وسیم باری نے کہا کہ کپتان کی خواہشات کو نظرانداز نہیں کیا جاسکتا لیکن پھر اسے جیت کے کریڈٹ کے ساتھ ساتھ شکست اور خراب کارکردگی کی ذمہ داری بھی قبول کرنی چاہئے۔