ابھی یہ کہنا قبل از وقت ہوگا کہ پاکستان کی پوزیشن کمزور ہے: وولمر

پاکستانی ٹیم کے کوچ باب وولمر کا خیال ہے کہ آئرلینڈ کی ٹیم کو کمزور نہ سمجھا جائے کیونکہ وہ جمعرات کو زمبابوے کے خلاف میچ ٹائی کرنے میں کامیاب ہو گئی تھی جو کہ ایک غیرمتوقع نتیجہ تھا۔

وولمر کا کہنا ہے ’میں نے آئرلینڈ کی پرفارمنس دیکھی ہے اور میں ان کے نظم و ضبط سے خاصا متاثر ہوا ہوں۔ آئرلینڈ کے خلاف پاکستان کا میچ ایک مشکل میچ ہوگا‘۔

باب وولمر کا کہنا ہے کہ ابھی یہ کہنا قبل از وقت ہوگا کہ پاکستان کی پوزیشن کمزور ہے۔ ان کا خیال ہے کہ منگل کو ویسٹ انڈیز کے خلاف پاکستان کی شکست ’ٹیم کے لیے آنکھیں کھولنے کا ایک موقع‘ ہے۔

منگل کے میچ میں ویسٹ انڈیز نے مقررہ پچاس اووروں میں نو وکٹوں کے عوض 241 رنز بنائے تھے جبکہ پاکستان کی تمام ٹیم اڑتالیسویں اوور میں 187 رنز بنا کر آؤٹ ہوگئی تھی۔

باب وولمر کے الفاظ میں ’ٹیم کو بقیہ ٹورنامنٹ کے لیے اپنا رویہ مثبت رکھنا چاہیے۔

متاثر ہوا ہوں۔۔  ’میں نے آئرلینڈ کی پرفارمنس دیکھی ہے اور میں ان کے نظم و ضبط سے خاصا متاثر ہوا ہوں۔ آئرلینڈ کے خلاف پاکستان کا میچ ایک مشکل میچ ہوگا‘۔ وولمر

دوسری جانب آئرلینڈ کی ٹیم کا مورال اپنی حالیہ کامیابیوں کی وجہ سے کافی بلند ہے۔

آئرلینڈ کے کپتان ٹرینٹ جونسٹن کا کہنا ہے کہ پاکستان کو ہرانا آسان نہ ہوگا۔ ’پاکستان کے پاس مضبوط بیٹنگ لائن ہے جبکہ چند اہم بالرز کی غیر موجودگی کے باوجود ان کی بالنگ کا معیار بھی بلند ہے‘۔

ٹرنٹ جونسٹن کا کہنا ہے کہ ’ہم یہ نہیں کہتے کہ ہم یہ میچ جیت جائیں گے لیکن اگر ہم نے ایک مقابلے کی بازی بھی کھیل لی تو ہم اپنے سر بلند رکھ کر میدان سے باہر آئیں گے‘۔

آئرش کپتان کے خیال میں پاکستان کو ہرانے کے لیے ان کی ٹیم کو اپنی کارکردگی 120 فیصد کرنا ہوگی۔

ورلڈ کپ کے اگلے راؤنڈ میں پہنچنے کے لیے پاکستان کو آئرلینڈ اور زمبابوے کو شکست دینا ہوگی۔