ورجن گلیکٹک حادثہ، تحقیقات میں ایک برس لگ سکتا ہے

امریکی حکام نے ورجن گیلاکٹک نامی خلائی راکٹ کے گرنے کے واقعے کی تحقیقات مکمل ہونے میں ایک سال کا وقت لگ سکتا ہے۔

نیشنل ٹرانسپورٹیشن سیفٹی بورڈ نے اپنی پہلے دن کی تحقیقات مکمل کی لی ہے جبکہ سیفٹی بورڈ کے مطابق تحقیقات کے دوران ورجن گیلاکٹک اپنے فلائٹ ٹیسٹ جاری رکھ سکتی ہے۔

ورجن گلیکٹک سپیس شپ دوم نامی کرافٹ کیلیفورنیا کے صحرائے موہاوی میں تجرباتی پرواز کے دوران گر کر تباہ ہو گیا تھا جس کے نتیجے میں پائلٹ شدید زخمی اور معاون پائلٹ ہلاک ہوگیا۔

سنیچر کو نیشنل ٹرانسپورٹیشن سیفٹی بورڈ کی ٹیم بھی صحرائے موہاوی پہنچی جبکہ ورجن گروپ کے سربراہ سر رچرڈ برینسن نے کہا کہ وہ یقینی طور پر اس حادثے کے بارے میں یہ جاننا چاہتے ہیں کہ ’کیا غلط ہوا۔‘

اس حادثے میں ہلاک ہونے والے پائلٹ کا نام مائیکل ایلزبری بتایا گیا ہے جن کی عمر 39 سال تھی جبکہ اُن کے ساتھی جو اس حادثے میں بچ گئے تھے ان کے نام کے بارے میں کوئی تفصیل نہیں بتائی گئی ہے۔

سر رچرڈ برینسن نے موہاوی کے فضائی اور خلائی اڈے پر جہاں یہ جہاز تیار کیا گیا تھا بات کرتے ہوئے کہا کہ ’کسی نے بھی خلائی سفر میں درپیش خطرات کا غلط اندازہ نہیں لگایا تھا۔‘

ورجن نے امید ظاہر کی تھی کہ وہ خلائی سفر کا کمرشل طور پر آغاز 2015 تک کر سکے گی اور اس نے پہلے ہی 700 کے قریب مسافروں کی بکنگ کر رکھی ہے جو اس سفر پر جانا چاہتے ہیں جن میں سر رچرڈ برینسن بھی شامل ہیں جنھوں نے وعدہ کیا ہے کہ وہ پہلے سفر میں خود شریک ہوں گے۔

ایک مسافر نے بکنگ ڈھائی لاک امریکی ڈالر کے ساتھ کی ہے۔

سر رچرڈ برینسن نے کہا کہ ’یہ ہمارے تجرباتی پائلٹس کا حق ہے کہ ہم جانیں کہ کیا غلط ہوا اور جب ہمیں پتا چلے گا اگر ہم اس خامی کو دور کر سکے تو ہم اسے کریں گا تو یقینی بنائیں گے کہ یہ خواب حقیقت کا روپ دھارے۔‘

انہوں نے یقین دلایا کہ ان کی کمپنی اور اس کی اشتراکی کمپنیاں ’کئی سالوں سے تجربات کر رہی تھیں اور تحفظ ہماری سب سے اولین ترجیح تھی۔‘

نیشنل ٹرانسپورٹیشن سیفٹی بورڈکے 13 سے 15 اراکین کی ٹیم صحرائے موہاوی پہنچی تھی اور اس نے پانچ کلومیٹر تک پھیلے جہاز کے ملبے کی تحقیقات مکمل کیں۔

نیشنل ٹرانسپورٹیشن سیفٹی بورڈ کےقائم مقام سربراہ کرسٹوفر ہارٹ نے کہا کہ ان کا کام ہو گا کہ وہ دستیاب مواد کا تفصیلی جائزہ لیں اور گواہوں کے انٹرویو لیں۔

انہوں نے کہا کہ ’یہ ایک تجرباتی پرواز تھی جس کا ڈیٹا بہت محنت سے رکھا جاتا ہے۔‘