سری لنکا میں گزشتہ چند مہینوں کے دوران تشدد میں اضافہ ہوا ہے

سری لنکا کی فوج نے ان ہلاکتوں کی تصدیق کی ہے لیکن اس حملے میں باغیوں کی ہلاکت سے متعلق کوئی اطلاع نہیں ہے۔

سری لنکا میں بیشتر مسلح جھڑپیں ملک کے شمال میں ہوتی ہیں جہاں تامل باغیوں کا کنٹرول ہے۔ فوج کے مطابق حالیہ دنوں میں متعدد مسلح جھڑپوں میں بیس باغی ہلاک ہوئے ہیں۔

فوج کے مطابق حال میں باغیوں سے واوُونیا کے مقام پر گھمسان کی لڑائی ہوئی ہے۔ باغیوں نے اس لڑائی کی تصدیق نہیں کی ہے اور ہلاکتوں کی بھی غیرجانبدار ذرائع سے تصدیق نہیں ہوسکی ہے۔

سری لنکا میں تامل باغی برسوں سے ملک کی تامل اقلیت کے لیے ایک آزاد ریاست کا مطالبہ کرتے رہے ہیں۔ حال میں حکومتی افواج اور باغیوں کے درمیان شدید لڑائیاں ہوئی ہیں۔

بی بی سی کے نامہ نگار کا کہنا ہے کہ سری لنکا کے جنوب مشرقی ساحل پر یالا میں واقع جنگلی حیات کے تحفظ گاہ کے پاس منگل کے روز ہونے والی لڑائی غیرمعمولی نوعیت کی تھی۔

سری لنکا کی فوج کے ترجمان بریگڈیئر اوڈیا ننایاککرا نے بتایا کہ منگل کو جس فوجی چوکی پر حملہ ہوا وہاں نو فوجی تعینات تھے۔

چند گھنٹوں بعد ایک فوجی ٹریکٹر وہاں لاشیں لانے کے لیے بھیجا گیا لیکن اسے ایک دھماکے کا نشانہ بنایا گیا جس کے نتیجے میں ایک اور فوجی ہلاک ہوگیا جبکہ تین زخمی ہوگئے۔

دریں اثناء ملک کے شمال میں بھی شدید لڑائی کی اطلاعات ہیں۔

فوج کے مطابق واوُونیا میں ہونے والی جھڑپوں میں چوبیس باغی ہلاک ہوگئے۔ ایک فوجی بھی اس لڑائی میں ہلاک ہوا ہے۔

ایک دیگر واقعے میں ایک چیک پوائنٹ پر حملے میں دو پولیس اہلکار ہلاک ہوگئے ہیں۔