باغیوں کا کہنا ہے کہ یہ فوج کی جانب سے ان کے ٹھکانوں کو نشانہ بنانے کا جواب ہے

اس حملے میں ایندھن کی دو تنصیبات پر بم گرائے گئے اور باغیوں کا کہنا ہے کہ یہ فوج کی جانب سے ان کے ٹھکانوں کو نشانہ بنانے کا جواب ہے۔

حکام کے مطابق ایک حملے میں گیس کے ایک ذخیرے کو آگ لگ گئی تاہم یہ ابھی تک واضٰح نہیں ہے کہ اس میں کوئی جانی نقصان بھی ہوا یا نہیں۔

حملے کے بعد حکام نے کولمبو کی بجلی اس وقت بند کر دی جب کرکٹ کے شائقین کے بڑے بڑے اجتماعات سری لنکا اور آسٹریلیا کے درمیان عالمی کپ کا فائنل دیکھنے کے لیے مختلف مقامات پر جمع ہو رہے تھے۔

باغیوں کے حملے کے چند گھنٹوں کے اندر ہی ملکی فضائیہ کے لڑاکا طیاروں نے تاملوں کے تسلط کے علاقوں میں شدید بمباری کی جس کا مقصد باغیوں کے طیارے کو تباہ کرنا تھا۔

دارالحکومت پر باغیوں کے فضائی حملے کے وقت فوجیوں نے طیارہ شکن گنوں سے فائرنگ کی اور کولمبو، اس کے ہوائی اڈے اور اس سے ملحق ایک فوجی اڈے کو بجلی کی ترسیل منقطع کر دی تھی۔

اس سے قبل حکومت نے عام شہریوں کو اس وقت باغیوں کے فضائی حملوں سےخبردار کر دیا تھا جب ایک ماہ کے اندر باغیوں نے دو مہلک فضائی حملے کیے تھے۔

رات گئے کیے جانے والے حملے کے بارے میں ٹائیگرز کے فوجی ترجمان راسیہ النتھرائین نے کہا کہ تامل ایلام ائر فورس کے دو سکواڈرنز نے حملے میں حصہ لیا۔ انہوں نے مزید کہا کہ حملے میں ایندھن کے دو ذخیروں پر بم گرائے اور مشن کے بعد ہمارے پائلٹ بحفاظت واپس آ گئے۔

دوسری جانب حکام کا کہنا تھا کہ گیس کے ایک ذخیرے میں آگ لگی تھی لیکن اسے بھی جلد ہی بجھا لیا گیا تھا۔