اسرائیل کی جانب سے غرب اردن اور غزہ پر حملے جاری ہیں

فلسطینی پارلیمان میں فتح پارٹی کے رکن جمال تیواری کو غرب اردن کے شہر نابلس میں ایک چھاپے کے دوران حراست میں لیا گیا۔

گزشتہ سال اسرائیل نے 2006 کے انتخابات میں کامیابی حاصل کرنے والی شدت پسند تنظیم حماس کے درجنوں اراکین ِ پارلیمان کو گرفتار کر لیا تھا تاہم حال ہی میں گرفتار ہونے والے فتح پارٹی کے یہ پہلے رکن ہیں۔وہ فتح پارٹی کی جانب سے پارلیمان میں ترجمان کے فرائض سر انجام دیتے رہے ہیں۔

اسرائیل نے زیر حراست رکن پارلیمان پر الزام لگایا ہے کہ انہوں نے فتح پارٹی کے الاقصیٰ بریگیڈ کے خودکش بم حملہ آوروں کو اسرائیلی شہروں کو نشانہ بنانے کے احکامات جاری کیے، خاص طور پر 2002 میں تل ایب کے ایک کیفے میں ہونے والے بم دھماکہ جس میں ایک شخص ہلاک ہو گیا تھا۔

اسرائیل کے فوجی ترجمان نے تصدیق کرتے ہوئے بتایا کہ تیواری کو چھ دوسرے مطلوبہ مزاحمت کاروں کے ہمراہ حراست میں لیا گیا ہے۔

فتح پارٹی کے ترجمان نے ان گرفتاریوں کی مذمت کرتے ہوئے عالمی برادری سے کہا ہے کہ وہ اسرائیل کو انسانی حقوق کی خلاف ورزیوں اور خلاف جمہوریت اقدامات اٹھانے سے روکے۔

گزشتہ ہفتے اسرائیل نے حماس حکومت کے تقریباً تیس افسران کو غرب اردن سے گرفتار کیا تھا جس میں کابینہ کے دو وزراء بھی شامل تھے۔

دوسری طرف فلسطینی ذرائع کا کہنا ہے کہ غزہ میں جبالیہ مہاجر کیمپ پر ایک فضائی حملے میں دو فلسطینی مزاحمت کار ہلاک ہو گئے ہیں۔ اسرائیلی فوج کے ایک ترجمان کا کہنا تھا کہ جبالیہ کیمپ پر فضائی حملے میں مزاحمت کاروں کو نشانہ بنایا گیا ہے تاہم اس حملے کی مزید تفصیلات نہیں بتائی گئیں۔

حماس کا کہنا ہے کہ ہلاک ہونے والے افراد اس کے مسلح دھڑے کے اراکین تھے۔

اس سے قبل منگل کو غزہ کی جانب سے راکٹ حملوں کو روکنے کی کوشش کے دوران اسرائیل کے فوجی دستوں نے حماس کے مزید دو اراکین کو ہلاک کردیا۔