بلیئر کے اعلان کے بعد ان کے جانشین کے چناؤ کی دوڑ شروع ہو جائے گی

کابینہ سے ملاقات کے بعد وہ شمال مشرقی انگلینڈ میں اپنے انتخابی حلقے یعنی سیجفیلڈ جائیں گے اور توقع ہے کہ وہ وہاں اپنے مستعفی ہونے کے منصوبے کا باقاعدہ اعلان کریں گے۔

وزیراعظم کےترجمان کا کہنا ہے کہ ٹونی بلیئر اس وقت تک وزیر اعظم رہیں گے جب تک ان کی جماعت ان کے متبادل کا چناؤ نہیں کر لیتی۔ اس عمل میں چھ سے سات ہفتے لگ سکتے ہیں۔

وزیر اعظم کے دفتر نے تفصیلات بتائے بغیر اس بات کی تصدیق کی ہے کہ ڈاؤننگ سٹریٹ سے ٹونی بلیئر کے رخصت ہونے سے پہلے کے مراحل کیا ہوں گے۔ اس تصدیق کے بعد ٹونی بلیئر کے استعفے سے متعلق کئی ہفتوں سے جاری افواہوں کا بظاہر اختتام ہو گیا ہے۔

ٹونی بلیئر کے انتخابی ایجنٹ اور قریبی دوست جون برٹن کا کہنا ہے کہ انہیں توقع ہے کہ اگر ٹونی بلیئر کو کسی بین الاقوامی ادارے کی جانب سے کوئی پیشکش نہیں ہوتی تو وہ اگلے انتخابات تک سیجفیلڈ سے رکن اسمبلی کی حیثیت سے کام کرتے رہیں گے۔

وزیرِ اعظم کے دفتر کے ذرائع کے مطابق مستعفی ہونے سے پہلے ٹونی بلیئر کو داخلہ امور سے متعلق کئی کام کرنے ہیں۔ اس کے علاوہ موسم گرما میں جی ایٹ ممالک اور یورپی یونین کے سربراہ اجلاسوں کے حوالے سے بھی ان کی کئی بین الاقوامی ذمہ داریاں ہیں۔

لیکن دوسری طرف اس خبر کے عام ہونے کے بعد کہ نئے وزیر اعظم جولائی میں اپنی ذمہ داریاں سنبھال لیں گے، منتخب نمائندوں کی توجہ اُسی جانب ہو چکی ہے۔

لیبر پارٹی کی قیادت کے لیے کابینہ کے ارکان میں سے گورڈن براؤن کو کسی چیلینج کا سامنا نہیں ہے کیونکہ قیادت کے ممکنہ امیدوار اس دوڑ میں حصہ نہیں لے رہے ہیں۔ لیکن انہیں لیبر پارٹی میں بائیں بازو کے خیالات کے حامیوں، مثلاً جون میکڈونل اور مائیکل میچر، کی جانب سے چیلنج کا سامنا ہو سکتا ہے۔

پارٹی کی قیادت کے لیے انتخاب میں حصہ لینے کے لیے امیدوار کے لیے ضروری ہے کہ لیبر پارٹی کے کم ازکم پینتالیس ارکان پارلیمان اس کی حمایت میں دستخط کریں۔

اس دوران پارلیمان میں تیسری بڑی جماعت لبرل ڈیموکریٹس نے ایک بل پیش کیا ہے جس میں ملکہ پر زور دیا گیا ہے کہ وہ پارلیمان کو تحلیل کر کے نئے عام انتخابات کا اعلان کریں۔