جم میور بی بی سی لبنان

	امریکی حمایت سے لبنان اسرائیل تنازعے میں شدت پیدا ہوئی ہے

اس سلسلے کی پہلی قسط پڑھنےکے لیے یہاں کلک کریں

اس وقت جو بڑا فرق نظر آتا ہے وہ یہ کہ اسرائیل کو واشنگٹن کی بھرپور سرپرستی حاصل ہے جس نے اسے اس معاملے میں فری ہینڈ دے رکھا ہے جبکہ سابقہ امریکی حکومتوں نے اسرائیل سے دفاعی اشتراک ہونے کے باوجود کسی حد تک خود کو ابتدائی تنازعوں سے دور رکھا مگر اس وقت امریکی صدر جارج بش نے بلا تردد اسرائیل کے حملے کے جواز کو تسلیم کر لیا ہے۔

ان کا کہنا تھا کہ اس وقت تک جنگ بندی نہیں کی جائے گی جب تک کہ اس لڑائی کی اصل جڑ یعنی حزب اللہ کو ختم نہیں کر دیا جائے۔ اسرائیل حملے روکنے کے لیے اس وقت تک کوئی دباؤ قبول نہیں کرے گا جب تک حزب اللہ یا تو تباہ یا ختم نہیں ہوجاتی۔

واشنگٹن میں بیٹھے طاقت کے استعمال پر یقین رکھنے والے ’جدید کنزرویٹو’ نظریے کے حامی گروپ کے مطابق لبنان کی تباہی بھی عراق میں انسانی جانوں کے ضیاع کی طرح نئے مشرق وسطیٰ کے جنم کے لیے پیشگی پیش آنے والی تکالیف کا حصہ ہیں۔

اسرائیل کا خیال ہے کہ وہ اپنے حلیف امریکہ کی ’دہشت گردی کے خلاف جنگ‘ لڑ رہا ہے۔ اس کی خواہش ہے کہ وہ حزب اللہ کو تباہ کر دے یا کم از کم اسے غیرمسلح کرکے اسرائیل پر میزائل داغنے کی پہنچ سے دور کر دے۔

حالیے حملے 1996 کے گریپس آف رتھ سے بہت مختلف ہیں۔ امریکہ اور اسرائیل حزب اللہ کو کسی صورت قبول کرنے کو تیار نہیں ہیں اور نہ ہی وہ حزب اللہ کی پشت پناہی کرنے والے ممالک شام اور ایران سے سوائے بظاہر کسی شرائط نامے میں شرکت کرنے کے، اس معاملے میں مداخلت نہیں چاہتے ہیں۔

امریکہ اور اسرائیل کے لیے اس لڑائی پر کوئی سمجھوتہ حزب اللہ کی شکست اور اس کے ساتھیوں شام اور ایران کی بے عزتی پر ہی قابل قبول ہو گا۔

	جنگ جتنی طویل ہو گی لبنان حکومت اتنی ہی کمزور پڑتی جائے گی

لبنان میں ملک کے سنی اور شیعہ دھڑے کے آپس میں اتحاد کے اشارے بھی ملے ہیں۔ اگر ان کے اس اتحاد کی پذیرائی کی گئی تو وہ متحد ہو کر امریکہ کے خلاف اٹھ کھڑے ہو سکتے ہیں۔

بارہ جولائی کو حزب اللہ کے دو اسرائیلی فوجیوں کو قبضے میں لینے کے بعد اس کے اس عمل کی بظاہر جزوی طرو پر غزہ میں حماس حکومت نے حمایت کی ہے، شاید انہوں نے ایسا حزب اللہ کے حمایتی ایران کے اشارے پر کیا ہے۔

چنانچہ سنی اور شیعہ شدت پسند گروہوں کے درمیان تعاون کے بیج اس علاقے میں پہلے ہی سے موجود ہیں اور اسے ایران اور شام کی خوشنودی بھی حاصل ہے۔ یہ بیج خطے کے باقی حصوں میں بھی نمو پا سکتے ہیں۔

اگر لبنان پر جنگ بندی کے سلسلے میں کوئی دباؤ پڑتا ہے تو تہران منطقی طور پر عراق میں موجود اپنے حماتیوں کو متحرک کرنے کا اشارہ کردے گا۔

ایران کے بغداد کی حکومت میں موجود بہت سی شیعہ جماعتوں سے قریبی تعلقات ہیں اور یہ جماعتیں اپنے ہم مذہبوں کی لبنان میں تباہی بھی بغور دیکھ رہی ہیں۔ عراق میں مسلح گروہ مہدی ملیشیا اور ایران میں پنپنے والی تنظیم بدر برئگیڈ کو خطے میں ایک لاکھ بیس ہزار امریکی فوجیوں کی موجوگی کسی طور گوارہ نہیں ہے۔

ایران سے متاثر شیعہ عراقی دھڑے امریکی فوج کے خلاف آپس میں مل کر کاروائیوں کا آغاز کر سکتے ہیں چاہے انہیں سنی مزاحمت کار تنظیموں سے کوئی تعاون ملے یا نہ ملے۔ کیونکہ امریکہ اور اسرائیل کسی متوازن سمجھوتے سے صرف نظر صرف فتح پر بضد ہیں۔ ایسی صورت میں یہ لڑائی ایک دوہری جنگ میں تبدیل ہوکر اس وقت خطے کے باقی انشتار والے خطوں کو اپنی لپیٹ میں لیتی دکھائی دے رہی ہے۔

امریکہ اور اسرائیل کے سوا دنیا کے دیگر ممالک جنگ بندی اور اس لڑائی کا حل چاہتے ہیں۔ حزب اللہ بھی فوری جنگ بندی اور دو اسرائیلی فوجیوں کے بدلے قیدیوں کے تبادلے پر تیار ہے۔ اس کے بعد دیگر مسا ئل اٹھائے جائیں گے جیسے حزب اللہ کو غیر مسلح کرنا یا اس کے مسلح گروہ کی لبنانی فوج میں شمولیت۔ یہی وہ نکتہ ہے جو حالیہ بحران کے آغاز سےقبل زیر غور تھا۔

اگر لبنان پر موجودہ بمباری اور حملے رک جاسکتے ہیں تو پھر لبنان کے سیاسی منظر نامے میں حزب اللہ پر طویل المدتی استحکام کے لیے مختلف اقدام اٹھانے کے لیے شدید دباؤ ہو گا جیسے لبنانی فوج کی لبنان اسرائیل سرحد پر تعیناتی کی اجازت۔

حالیہ بحران نے ملک کے ایک بڑے حصے کو نقصان پہنچایا ہے۔لبنان کی مخلوط حکومت میں حزب اللہ کی ساتھی اہم سنی اور عیسائی جماعتیں اس اچانک
آ پڑنے والی افتاد سے مایوس اور غم وغصے کا شکار ہیں۔ جیسے جیسے جنگ طول پکڑتی جائے گی لبنانی حکومت میں شامل جماعتیں بھی اس کا ساتھ چھوڑتی جائیں گی اور پھر لبنانی حکومت حزب اللہ پر دباؤ ڈالنے کے لیے موثر نہیں رہے گی۔ دوسری طرف ملک کی شیعہ آبادی بھی حملوں کا نشانہ بننے پر غم وغصے کا شکار ہے۔

	عام لبنانی اس جنگ سے تنگ آ چکے ہیں

صدر بش کہہ چکے ہیں کہ حزب اللہ کے خاتمے تک جنگ جاری رہے گی اور اس وقت تک کوئی بات نہیں کی جائے گی۔

پورے خطے میں اعتدال پسند عرب اور بنیاد پرست، سنی اور شیعہ ہی اس مسئلے پر کوئی قدم اٹھائیں گے۔ وہ یہی کہیں گے کہ اس مسئلے کی اصل جڑ اسرائیل کا فلسطین پر قبضہ ہے اور اسرائیل کے اس علاقے سے انخلاء تک امن قائم نہیں
ہو سکتا۔ شاید وہ اس مسئلے کے حل کے لیے دو ہزار دو میں عرب اقوام کی بیروت کانفرنس کے ہونے والے اجلاس میں امن کے بدلے زمین کی پیشکش کے فارمولے کی تائید کریں۔