حیفہ شہر پر سترہ راکٹ پھینکے گئے

حالیہ دنوں میں یہ دوسرا موقع ہے جب اسرائیلی شہر حزب اللہ کے راکٹوں کا نشانہ بنے ہیں۔

لبنان جنگ بندی، سلامتی کونسل میں عدم اتفاق

جنگ بندی کی لبنانی اپیل

اسرائیلی ریڈیو کے مطابق حزب اللہ کی جانب سے کیا جانے والا حملہ دو مرحلوں میں مکمل ہوا۔ پہلے مرحلے میں حیفہ پر تیرہ راکٹ گرے جن میں سے ایک کا نشانہ شہر کا ریلوے سٹیشن بنا۔

دوسرے مرحلے میں چار مزید راکٹ پھینکے گئے جن میں سے ایک شہر کی ایک مصروف سڑک پر گرا۔ اطلاعات کے مطابق ان حملوں کے دوران حیفہ شہر کی سڑکوں پر موجود اسرائیلی باشندے اپنی گاڑیاں چھوڑ کر بھاگ گئے۔

یروشلم میں بی بی سی کے نمائندے کا کہنا ہے کہ تاحال یہ خیال کیا جاتا تھا کہ لبنان کی سرحد سے جنوب میں واقع اسرائیل کے ساحلی شہر حزب اللہ کے راکٹ حملوں کی پہنچ سے باہر ہیں۔

حزب اللہ نے راکٹ حملوں کی ذمہ داری قبول کر لی ہے اور کہا ہے کہ یہ اسرائیلی حملوں میں اسّی لبنانیوں کی ہلاکت اور لبنان کے انفراسٹرکچر کی تباہی کا بدلہ ہے۔

تاحال یہ خیال کیا جاتا تھا کہ اسرائیل کے ساحلی شہر حزب اللہ کے راکٹ حملوں کی پہنچ سے باہر ہیں۔

دریں اثناء اسرائیل نے پانچویں دن بھی لبنانی علاقوں پر بمباری جاری رکھی ہے اور بیروت کے جنوبی حصے کو نشانہ بنایا ہے۔ اسرائیلی فوج کے فضائی حملوں میں اب تک کم از کم سو افراد ہلاک ہو گئے ہیں۔

اسرائیلی فوج کے مطابق اتوار کی صبح ہونے والے حملوں میں حزب اللہ کے المنار ٹی وی کی عمارت کو نشانہ بنایا گیا۔ اسرائیلی ٹی وی کے مطابق حزب اللہ کے قائد حسن نصر اللہ بھی ایک حملے میں زخمی ہوئے ہیں تاہم الجزیرہ ٹی وی نے حزب اللہ کے رہنماؤں کے حوالے سے اس خبر کی تردید کی ہے۔

لبنان میں موجود غیرملکیوں نے حالات کی خرابی کے بعد ملک چھوڑنا شروع کر دیا ہے۔ بیروت سے بی بی سی کے نمائندوں کے مطابق غیر ملکیوں کے علاوہ مقامی افراد بھی ان علاقوں کی جانب جا رہے ہیں جو کہ اسرائیلی حملوں کا نشانہ نہیں ہیں۔