حیفہ شہر پر سترہ راکٹ پھینکے گئے

خدشہ ظاہر کیا گیا ہے کہ عمارت کے ملبے میں مزید لوگوں کی لاشیں دبی ہوئی ہیں۔ اس کے علاوہ اسرائیل کی سرحد کے قریب ایک لبنانی گاؤں پر حملے کے نتیجے میں سات افراد مارے گئے۔ اطلاعات کے مطابق ہلاک ہونے والوں میں کچھ افراد کے پاس لبنان اور کینیڈا کی دوہری شہریت تھی۔

اس سے قبل اسرائیل کے وزیر اعظم ایہود اولمرت نے کہا تھا کہ ساحلی شہر حیفہ پر حزب اللہ کے راکٹ حملوں کے دور رس نتائج ہوں گے۔ حیفہ میں کم از کم نو افراد ہلاک اور متعدد زخمی ہوئے تھے۔

دریں اثنا حزب اللہ کے رہنما حسن نصراللہ نے موجودہ صورتحال کے بارے میں ٹیلی ویژن پر اپنے پہلے خطاب میں کہا ہے کہ اسرائیل کے ساتھ لڑائی کی ابھی ابتدا ہوئی ہے۔ ایران کی وزارت خارجہ نے اسرائیلی الزامات کی تردید کی ہے کہ اس نے حزب اللہ کو میزائیل فراہم کیئے تھے۔ ایرانی وزارت خارجہ نے متنبہ کیا کہ سوریا(شام) پر حملے کی صورت میں اسرائیل کو ناقابل یقین نقصان اٹھانا پڑے گا۔

لبنان جنگ بندی، سلامتی کونسل میں عدم اتفاق

جنگ بندی کی لبنانی اپیل

حالیہ دنوں میں یہ دوسرا موقع ہے جب اسرائیلی شہر حزب اللہ کے راکٹوں کا نشانہ بنے ہیں۔ اسرائیلی فوج نے کہا ہے کہ جنوبی لبنان پر بڑے حملے کیئے جائیں گے اور اس نے تمام شہریوں کو وہاں سے نکل جانے کے لیئے کہا ہے۔

اسرائیل نے کہا تھا کہ ان تمام مقامات کو نشانہ بنایا جائے گا جہاں سے اسرائیل پر راکٹ فائر کیئے گئے تھے اور اس میں رہائشی علاقے بھی شامل ہیں۔

حزب اللہ کا موقف ہے کہ وہ اسرائیلی حملوں کا جواب دے رہی ہے جن میں درجنوں شہری ہلاک اور لبنان کے اہم مقامات تباہ ہوئے ہیں۔ اسرائیلی فوج کے فضائی حملوں میں اب تک کم از کم سو افراد ہلاک ہو گئے ہیں۔

اسرائیل نے بدھ کو اپنے دو فوجیوں کے اغوا کے بعد لبنان کے خلاف کارروائی شروع کی تھی۔

اسرائیلی ریڈیو کے مطابق حزب اللہ کی جانب سے حیفہ پر کیا جانے والا حملہ دو مرحلوں میں مکمل ہوا۔ پہلے مرحلے میں حیفہ پر تیرہ راکٹ گرے جن میں سے ایک کا نشانہ شہر کا ریلوے سٹیشن بنا۔

دوسرے مرحلے میں چار مزید راکٹ پھینکے گئے جن میں سے ایک شہر کی ایک مصروف سڑک پر گرا۔ اطلاعات کے مطابق ان حملوں کے دوران حیفہ شہر کی سڑکوں پر موجود اسرائیلی باشندے اپنی گاڑیاں چھوڑ کر بھاگ گئے۔

یروشلم میں بی بی سی کے نمائندے کا کہنا ہے کہ تاحال یہ خیال کیا جاتا تھا کہ لبنان کی سرحد سے جنوب میں واقع اسرائیل کے ساحلی شہر حزب اللہ کے راکٹ حملوں کی پہنچ سے باہر ہیں۔

تاحال یہ خیال کیا جاتا تھا کہ اسرائیل کے ساحلی شہر حزب اللہ کے راکٹ حملوں کی پہنچ سے باہر ہیں۔

اسرائیلی فوج کے مطابق اتوار کی صبح ہونے والے حملوں میں حزب اللہ کے المینار ٹی وی کی عمارت کو نشانہ بنایا گیا۔ اسرائیلی ٹی وی کے مطابق حزب اللہ کے قائد حسن نصر اللہ بھی ایک حملے میں زخمی ہوئے ہیں تاہم الجزیرہ ٹی وی نے حزب اللہ کے رہنماؤں کے حوالے سے اس خبر کی تردید کی ہے۔