ذیشان ظفر بی بی سی اردو ڈاٹ کام ، اسلام آباد

اسکول سے تعلیم حاصل کر چکے اسٹوڈینٹس بھی اسکول میں پڑھاتے ہیں۔

اسلام آباد میں موسم گرم ہو یا انتہائی سرد، ایف سکس کے اس پارک میں تقریباً گزشتہ پچیس سال سے کم آمدن والے خاندانوں سے تعلق رکھنے والے اور دن بھر سڑکوں پر محنت مزدوری کرنے والے بچے کسی معاوضے کے بغیر باقاعدگی سے تعلیم حاصل کر رہے ہیں ۔

پارک میں واقع اس سکول کی نہ تو کوئی عمارت ہے اور نہ ہی کوئی نام ہے۔ دلچسپ بات یہ ہے کہ یہ سکول کوئی غیر سرکاری تنظیم نہیں چلا رہی ہے بلکہ اس ٹاٹ سکول کا خالق ایک ادنٰی درجے کا سرکاری ملازم محمد ایوب ہے۔

محمد ایوب کا تعلق صوبہ پنجاب کے شہر منڈی بہاؤلدین سے ہے اور وہ گزشتہ پچیس سال سے اسلام آباد میں سول ڈیفنس کے محکمے میں ملازمت کر رہےہیں۔

انھوں نے بتایا کہ آج سے پچیس سال پہلے جب وہ اسلام آباد آئے تھے تو دفتر سے چھٹی کے بعد فارغ اوقات کے لیے اس نیک کام کا انتخاب کیا۔ ان کا کہنا تھا کہ ایک دن ان کو سٹرک پر چند بچے کوڑا چنتے نظر آئے تو انھیں خیال آیا کہ کیوں نہ فارغ اوقات میں ان بچوں کوتعلیم دی جائے۔

اس دن کے بعد سے محمد ایوب نے دوپہر تین بجے دفتر سے چھٹی کرنے کے بعد محنت مزدوری کرنے والے اور غریب گھروں کے بچوں کو ایف سکس کےسرکاری پارک میں پڑھانے کا سلسلہ شروع کیا جہاں سے اب تک سینکڑوں کی تعداد میں بچے مستفید ہو کر با عزت روزگار کما رہے ہیں۔

فخر  جو بچے دسویں جماعت تک پہنچتے ہیں، ان میں سے زیادہ تر کے بورڈ کے امتحانی اخراجات وہ خود پورے کرتے ہیں لیکن میرے لیے فخر کی بات یہ ہے کہ آج میرے شاگرد ماسٹرز اور بی اے کرنے کے بعد اچھے اداروں میں ملازمت کر رہے ہیں محمد ایوب

انھوں نے بتایا کہ چند ماہ کے بعد ایسے والدین جو مالی حالات کی وجہ سے اپنے بچوں کو سرکاری سکولوں میں بھیجنے کی بجائے محنت مزدروی پر لگا دیتے تھے انھوں نے شام کے اوقات میں اپنے بچوں کو میرے پاس تعلیم حاصل کرنے کے لیے بھیجنا شروع کر دیا اور آج بھی زیادہ تر بچے دن کو کام کرتے ہیں اور شام کو پڑھتے ہیں۔

محمد ایوب نے سخت سردی میں پارک کی ٹائلوں پر بیٹھے بچوں کی طرف دیکھتے ہوئے کہا کہ آج اس سکول میں ایک سو ساٹھ بچے پہلی جماعت سے لے کر دسویں تک تعلیم حاصل کر رہے ہیں ۔جبکہ ان کے تین شاگرد بھی اپنی نوکریوں کے بعد یہاں آ کر بچوں کو پڑھاتے ہیں۔

انھوں نے بتایا کہ اپنی نو ہزار روپے کی قلیل تنخواہ کا زیادہ تر حصہ بچوں کی پینسلیں، کتابیں خریدنے پر صرف کردیتے ہیں۔ خود وہ اپنے سرکاری دفتر کے ایک حصے میں سوتے ہیں اور بیوی بچے آبائی شہر منڈی بہاؤ الدین میں رہائش پذیر ہیں۔ ان کی اہلیہ بھی سرکاری سکول میں ٹیچر ہیں جس کی وجہ سے گھر کے اخراجات پورے ہو جاتے ہیں۔

ماسٹر محمد ایوب نے کہا کہ شروع میں پارک کی کچی زمین پر بچے بیٹھتے تھے جبکہ بارش یا تیز دھوپ میں پارک کے درختوں کے نیچے کلاس روم بنایا جاتا ہے۔ تاہم تین سال پہلے پارک میں پتھر کی ٹائلیں لگ چکی ہیں لیکن اب بھی سردی ، گرمی اور بارش میں پارک کے درخت ہی بچوں کا سہارا بنتے ہیں ۔تاہم شروع میں بچے گرمی سردی سے بیمار پڑ جاتے ہیں لیکن وقت کے ساتھ ساتھ سخت موسم کے عادی ہو جاتے ہیں۔

انھوں نے بتایا کہ جو بچے دسویں جماعت تک پہنچتے ہیں، ان میں سے زیادہ تر کے بورڈ کے امتحانی اخراجات وہ خود پورے کرتے ہیںء ’میرے لیے فخر کی بات یہ ہے کہ آج میرے شاگرد ماسٹرز اور بی اے کرنے کے بعد اچھے اداروں میں ملازمت کر رہے ہیں‘۔

	زیادہ تر بچے دن کو کام کرتے ہیں اور شام کو پڑھتے ہیں

عمران پر امید ہیں کہ وہ نہ صرف فارغ اوقات میں اپنی تعلیم جاری رکھیں گے بلکہ یہاں سے دسویں جماعت پاس کرنے کے بعد کالج میں داخلہ لےکر ڈاکٹر بننے کی کوشش کریں گے۔

پارک سکول میں پہلی جماعت کے طالب علم چاند یہاں آنے سے پہلے ایک سرکاری سکول میں جاتے تھے تاہم وہاں اساتذہ کی مار پیٹ کی وجہ سے سکول چھوڑ دیا تاہم مالی تنگی کی وجہ سے والدین چاند کو کسی نجی سکول میں تو نہیں بھیج سکتے ہیں لہذا اب وہ پارک سکول میں آتے ہیں اور یہاں کے ماحول سے خوش اور مطمئن بھی ہیں۔

پر اعتماد قندیل سرکاری سکول میں زیر تعلیم ہے تاہم مستقبل میں ڈاکٹر بننے کا خواب سجائے قندیل سکول سے چھٹی کے بعد کسی مہنگے ٹیوشن سنٹر جانے کے بجائے پارک کے سکول میں مفت پڑھنے کے لیے آتی ہیں تاکہ زیادہ سے زیادہ پڑھ کر جلدی سے ایک اچھی ڈاکٹر بن جائیں۔

پارک میں موسم کی پراہ کیے بغیر تعلیم حاصل کرتے دیکھ کر ایک خیال ذہن میں آتا ہے کہ ایک طرف تو صوبہ سرحد کے ضلع سوات میں جب بچوں کے سکول تباہ و برباد کیے جا رہے ہیں تو دوسری طرف ملک میں محمد ایوب جیسے لوگ بھی ہیں جو بغیر کسی لالچ کے اپنی ہمت اور لگن سے بچوں کو علم کی طاقت سے روشناس کروا رہے ہیں ۔