رفعت اللہ اورکزئی بی بی سی اردو ڈاٹ کام، پشاور

	مظاہرے میں سکیورٹی فورسز اورعسکریت پسندوں دونوں کے خلاف نعرہ بازی کی گئی

مظاہرے کا انعقاد پختون امن جرگہ صوبہ سرحد کی طرف سے کیا گیا تھا جس میں مردان اور آس پاس کے علاقوں سے لوگوں نے شرکت کی۔

مظاہرہ مردان پریس کلب سے شروع ہوا اور باچاخان چوک میں ایک جلسے کی شکل اختیار کرگیا۔ مظاہرین نے پلے کارڈز اور بینرز اٹھارکھے تھے جس پر طالبان کے خلاف نعرے درج تھے۔

عینی شاہدین کا کہنا ہے کہ مظاہرین نے طالبان اور سکیورٹی فورسز دونوں کے خلاف شدید نعرہ بازی کی اور انہیں سوات اور قبائلی علاقوں میں جاری عام شہریوں کی ہلاکت کا ذمہ دار قرار دیا۔

مظاہرے میں سیاسی جماعتوں کے کارکنوں کے علاوہ عوامی نشینل پارٹی سے تعلق رکھنے والے ضلعی ناظم مردان حمایت اللہ مایار نے بھی شرکت کی۔

مظاہرے کی قیادت کرنے والے امن جرگہ کے سربراہ سید کمال شاہ نے بی بی سی سے گفتگو کرتے ہوئے الزام لگایا کہ حکومت نے سوات اور دیگر علاقوں میں عام شہریوں کی ہلاکت اور اسلام کے نام پر تعلیمی اداروں کی تباہی پر مجرمانہ خاموشی اختیار کی ہوئی ہے۔

انہوں نے کہا کہ شریعت اور اسلام کے نام پر پختونوں کی نسل کشی کی جارہی ہے اور ہر طرف بے گناہ پختونوں کا خون بہایہ جارہا ہے۔

انہوں نے کہا کہ پشاور میں عنقریب ایک لویا جرگہ کا انعقاد کیا جائے گا جس میں سرحد کے چوبیس اضلاع سے تعلق رکھنے والے سرکردہ عمائدین اور مشران کو دعوت دی جائیگی۔

انکے مطابق یہ ایک نمائندہ جرگہ ہوگا جس میں حکومت کا عمل دخل نہیں ہوگا۔ انہوں نے کہا کہ لویا جرگہ کے انعقاد کے بعد تمام فریقوں امریکہ، پاکستانی سکیورٹی فورسز اور طالبان سے مذاکرات کیے جائیں گے اور مل بیٹھ کر اس مسلے کو حل کرنے کی کوشش کی جائیگی۔

واضح رہے کہ پاکستان کے کسی علاقے میں طالبان کے خلاف پہلی مرتبہ اس قسم کا مظاہرہ منقعد کیا گیا ہے۔ اس سے پہلے طالبان کے خلاف حکومت حامی لشکروں کی پالیسی آزمائی جاچکی ہے جس میں حکام کو کوئی خاص کامیابی حاصل نہیں ہوسکی ہے۔