ذیشان ظفر بی بی سی اردو ڈاٹ کام، اسلام آباد

	جنرل کیانی چین کے دورے سے واپس آنے کے بعد فوراً باجوڑ چلے گئے

بری فوج کے شعبہ تعلقات عامہ کی جانب سے جاری ہونے والے ایک بیان کے مطابق اتوار کے روز جنرل اشفاق پرویز کیانی نے قبائلی علاقے باجوڑ ایجنسی کا دورہ کیا ہے جہاں انہوں نے عسکریت پسندوں کے خلاف جاری فوجی آپریشن کا جائزہ لیا۔ اس موقع پر جنرل کیانی کو میجر جنرل طارق اور فرنٹیر کور کے انسپکٹر جنرل نے آپریشن میں ہونے والی پیش رفت کے بارے میں بریفنگ دی۔

یاد رہے کہ جنرل کیانی چین کا پانچ روزہ دورہ مکمل کرنے کے بعد گزشتہ رات واپس پہنچے ہیں۔

باجوڑ ایجنسی کے دورے کے دوران جنرل کیانی نے مقامی قبائلی عمائدین سے بھی ملاقات کی اور اطمینان کا اظہار کرتے ہوئے کہا کہ مقامی قبائلی شر پسند عناصر کے خلاف اٹھ کھڑے ہوئے ہیں اور فوج کا بھر پور ساتھ دے رہے ہیں ۔ انہوں نے کہا کہ عوامی حمایت سے باجوڑ ایجنسی میں جاری فوجی آپریشن میں کامیابی ملی ہے۔

اس سے قبل باجوڑ ایجنسی پہنچنے پر کور کمانڈر پشاور لیفٹینٹ جنرل محمد مسعود اسلم نے جنرل کیانی کا استقبال کیا ۔انہوں نے آپریشن میں حصہ لینے والے فوجیوں اور کمانڈروں سے غیر رسمی ملاقات کی ہے۔

واضع رہے کہ باجوڑ ایجنسی میں سیکورٹی فورسز کا تقریباً دو ماہ سے آپرشن جاری ہے۔ سکیورٹی فورسز نے آپریشن میں پانچ بڑے کمانڈروں سمیت مقامی طالبان اور القاعدہ سے تعلق رکھنے والے کم از کم پانچ سو شدت پسندوں کی ہلاکت کا دعوٰی کیا ہے۔