ارمان صابر بی بی سی اردو ڈاٹ کام، کراچی

	اے پی ایم ایس او کے کارکن عاطف کی نمازِ جنازہ جناح گراؤنڈ عزیزآباد میں ادا کی گئی

جامعہ کراچی میں دو طلبہ تنظیموں اسلامی جمیعت طلبہ اور آل پاکستان متحدہ اسٹوڈنٹس آرگنائزیشن کے درمیان تصادم میں تین طلبہ ہلاک ہوگئے تھے۔ جن میں اسامہ بن آدم اور عبدالجبار، کا تعلق آئی جے ٹی سے تھا جبکہ عاطف رضا عرف رامیش اے پی ایم ایس او کے کارکن تھے۔

جامعہ کراچی میں چار ہلاک

آئی جے ٹی اور جماعتِ اسلامی کے ارکان کی نمازِ جنازہ نمائش چورنگی پر جبکہ اے پی ایم ایس او کے کارکن عاطف کی نمازِ جنازہ جناح گراؤنڈ عزیزآباد میں ادا کی گئی۔

نمائش پر نمازِ جنازہ پڑھنے کے لئے آنے والے افراد سے خطاب کرتے ہوئے امیر جماعتِ اسلامی قاضی حسین احمد نے کہا کہ امن و امان کی ذمہ داری آصف علی زرداری اور صوبہ سندھ کے وزیرِاعلٰی قائم علی شاہ کی ہے۔ انہوں نے آصف زرداری اور قائم علی شاہ کومخاطب کرتے ہوئے کہا کہ جماعتِ اسلامی تعلیمی اداروں میں امن چاہتی ہے اور وہ تعلیمی اداروں کو محفوظ بنانے کے لیے ہر ممکن تعاون کرنے کے لئے تیار ہے۔

	اسلامی جمعیت طلبہ سے تعلق رکھنے والے طلبا کی نمازِ جنازہ نمائش چورنگی پر ادا کی گئی

دوسری جانب اسلامی جمیعت طلبہ کے ناظم حسن حماد نے الزام لگاتے ہوئے کہا کہ اے پی ایم ایس او تعلیمی اداروں میں تعلیمی ماحول خراب کرنے کی ذمہ دار ہے۔ انہوں نے حکومت سے مطالبہ کیا کہ قاتلوں کو بہتر گھنٹوں میں گرفتار کیا جائے بصورتِ دیگر جمیعت اپنا لائحہ عمل طے کرے گی۔

	ہمارا بچہ تھرڈ ائر میں تھا اور وہ ہمیشہ فرسٹ پوزیشن لے کر آتا تھا

طالبعلم عبدالجبار کے والد نثار احمد نے کہا کہ ہم منگھوپیر میں رہتے ہیں اور میرا بیٹا جامعہ کراچی میں پڑھتا تھا جو بہت ہی شریف النفس، بے ضرر اور پیار کرنے والا نوجوان تھا اور اس کی گواہی اس کے دوست، پڑوسی، اور جو بھی اس کا جاننے والا ہے دے سکتے ہیں۔ ظالموں نے میرے بیٹے کو مار دیا، مارنے کا کوئی مقصد نہیں، بس ماردیا‘۔

طلبہ تصادم کے بعد بدھ کو جامعہ کراچی میں وائس چانسلر ڈاکٹر پیرزادہ قاسم کی سربراہی میں ایک اجلاس ہوا جس میں فیصلہ کیا گیا کہ جن طلبہ نے تین اساتذہ سے نامناسب سلوک کیا ان کے خلاف سخت تادیبی کارروائی عمل میں لائی جائے گی اور اگلے دو روز تک جامعہ کراچی اور اس کے الحاقی تعلیمی ادارے بند رہیں گے۔